Mariko 11 - Baibuli Ekibono kya Katonda 2014

Okwingira n'ekitiisa mu Yerusalemu

¹ Nga bali kumpi okutuuka e Yerusalemu, agho kumpi n'ebibuga Bethifage ni Bethania ku Lusozi olw'Emiti Emyoliva, yaatuma babiri ku Beegeresebwa be, yaabakoba ati:

² “Muje mu kyalo ekibali mu maiso, era bwe munaaba mukingira muti, mwidha kubona endogoyi ento ng'esibiibwa nga tetyamwangaku muntu yeenayeena mugisibule mugireete.

³ Bwe ghabaagho abakoba ati, ‘Mukola ki?’ Mumukobe muti, ‘Musengwa n'agyenda era aidha kugiiza mangu.’ ”

⁴ Baaja era baayagaana endogoyi ento ng'esibiibwa ku luya ku mulyango, mu luguudo baagisibula.

⁵ Abandi ku baali bemereire agho n'okubakoba bati: “Mubaire ki abali kusibula endogoyi?”

⁶ Baabakoba nga Yesu bwe yali akobye, era baabaleka baaja.

⁷ Endogoyi baagireeta ye Yesu, baagyalaku engoye dhaibwe yaagityamaku.

⁸ Abantu kamaala baayalirira mu ngira engoye dhaibwe, abandi baatema ensaga edh'emiti okuva mu nimiro.

⁹ Agho abaali emberi n'abaanonereza baayasiikana bati: “Hosanna! Wa nkabi oyo aidha mu liina lya Musengwa.

¹⁰ Bwa nkabi obwakyabazinga bwa iseife Daudi obuli kwira! Hosanna! Ghaigulu irala.”

¹¹ Yatuuka e Yerusalemu, yangira mu isinzizo era ng'amaze okwekalirisa buli kintu, yaaja e Bethania n'Eikumi n'Ababiri, kuba obwire bwali bujiire.

Akolimira omuti omutiini

¹² Olunaku olwairirira, bwe baali bava e Bethania, Yesu endhala yaamuluma.

¹³ Agho bwe yalengera omuti omutiini nga guliku amakaba, yaaja ghe guli abone oba ng'ayagaanaku akantu. Aye yaja okugutuukaku nga kuzira kantu, okutoolaku amakaba gonka kuba ebiseera tibyali bya mitiini.

¹⁴ Agho yaagukoba ati: “Tighabanga alya ku iwe kibala ebyanda n'ebyanda!” Era Abeegeresebwa be baakiwulira.

Abinga abatundira mu isinzizo

¹⁵ Agho baatuuka e Yerusalemu. Bwe yangira mu isinzizo yaatoolera okubingamu abaali batundira n'abaali bagulira mu isinzizo. Yaafundika emeeza edh'abafaanisa empiiya n'ebityamo by'abo abaali batana enjiibwa.

¹⁶ Era yaaloba kuganha muntu yeenayeena kubisa kantu mu isinzizo.

¹⁷ Agho yaayegeresa ng'abakoba ati: “Tikyaghandiikibwa kiti, ‘Endhu yange enaayetebwanga yaakusabiramu amaghanga goonagoona.’ Aye imwe mugifiire mpuku ya banhazi!”

¹⁸ Bakabona Abakulu n'Abanamateeka olwawulira ebyo, baanoonia engeri ey'okumuzikiriza. Baali bamutya kuba abantu boonaboona baali nga basamaaliriire olw'endhegeresa ye.

¹⁹ Olunaku bwe lwaseenena, baava mu kibuga.

Ekyegebwa ku muti mutiini

²⁰ Enkyo ku lunaku olwairirira bwe baabitagho, baabona omuti omutiini nga gukaze okuviira irala ku mizi.

²¹ Agho Petero yaidhukira, yaamukoba ati: “Mwegeresa, bona omuti omutiini gwe wakolimiire gukaze!”

²² Yesu yaabairamu ng'akoba ati: “Mubenga n'okwikiriza mu Katonda.

²³ Bwenebwene mbakobera, buli alikoba olusozi nga luno ati, ‘Va ghano weesuule mu nhandha’, nga tabuusabuusa mu mwoyo gwe, aye ng'aikiriza ati ky'akobye kya kubaagho, ekyo kirimukolerwa.

²⁴ Kale ka mbakobere, buli kye musaba nga mweghemba Katonda, mwikirize muti mukifunie, era timuliroba kukifuna!

²⁵ “Era buli lwe musaba, bweghabaagho ye muliku ekibono, mumusonighenga, olwo Lata waimwe ali mu igulu yeena abasonighe ebisobyo byaimwe. [

²⁶ Aye bwe mutasonighanga, ni Lata waimwe ali mu igulu talibasonigha bisobyo byaimwe.]”

Obuyinza bwa Yesu

²⁷ Agho kabiri baatuuka e Yerusalemu, era bwe yali mu isinzizo ng'atambula, Bakabona Abakulu, Abanamateeka, n'abakulu b'ebika baidha y'ali,

²⁸ baamukoba bati: “Buyinza ki bw'okozesa bino by'okola? Era naani eyakugha obuyinza obwo okughanga okukola ebyo?”

²⁹ Yesu yaabakoba ati: “Ka mbabuuze ekibono kirala, bwe mundhiramu, ndidha kubakobera obuyinza obunkoza ebyo.

³⁰ Okubatiza kwa Yoanne kwava mu igulu oba mu bantu? Mundhiremu.”

³¹ Agho baakubagania ebidhuubo beene na beene, baakoba bati: “Bwe tukoba tuti kwava mu igulu, aidha kukoba ati, ‘Memale lwaki timwamwikiriza?’

³² Mperaano tukobe tuti kwava mu bantu?” Baali batya abantu, kuba boonaboona baali bakitwala bati Yoanne yali mulanzi mwene.

³³ Agho baakoba bati: “Titwidhi!” Yesu yaabakoba ati: “Niini zeena tiibakobere buyinza bunkoza ebyo.”