Mariko 1 - Baibuli Ekibono kya Katonda 2014

Okwegeresa kwa Yoanne Omubatiza

¹ Entandiika y'Amawulire Amalungi aga Yesu Kurisito Omwana wa Katonda.

² Era nga bwe kyaghandiikibwa Isaia omulanzi kiti: “Bona, ndi kutuma omukwenda wange akukulembereremu akutegekere gh'onaabita.”

³ Nti era eriyo n'eiroboozi ery'oyo alangirira mu irungu ati: “Mutegeke engira ya Musengwa, mutereeze gh'anaabita.”

⁴ Ng'olwo ni Yoanne Omubatiza aboneka mu irungu ng'alangirira abantu beenenie, babatizibwe, memale basoniyibwe ebibi.

⁵ Abantu beesombanga okuva mu kiketezo eky'e Buyudaaya yoonayoona n'ab'omu Yerusalemu boonaboona baaja ye Yoanne, yaababatiza mu mwiga Yorudani, nga bwe baatula ebibi byaibwe.

⁶ Ekivaalo kya Yoanne kyali nga kya buviiri bwa ngamiya era nga yeesiba olukoba olw'oluwu mu nkende, era yalyanga nzige na mudheenene gwa mu nsiko.

⁷ Yayegeresa ati: “Oyo anandhiririra ansingira irala ghala obukumu era tigwanira na kukutama kusibulula busibiro bwa ngaito dhe.

⁸ Nze mbabatiza na maadhi, aye oyo alibatiza na Mwoyo Mutukuvu.”

Okubatizibwa kwa Yesu

⁹ Agho Yesu yaidha ng'ava e Nazarethi eky'e Galilaaya, Yoanne yaamubatiza mu mwiga Yorudani.

¹⁰ Olwava mu maadhi ati yaabona eigulu nga liryebuka, agho ni Mwoyo Mutukuvu yaamwikaku ng'oti njiibwa.

¹¹ Era n'eiroboozi lyawulikika okuva mu igulu nga likoba liti: “Niiwe mutabane wange omugonzi, nkwesiimiramu inho.”

Okukemebwa kwa Yesu

¹² Tighaabita na ntangama, Mwoyo Mutukuvu yaamusindika mu irungu.

¹³ Eyo Yesu yaamalayo enaku amakumi ana (40), Sitaani yaamukema. Yaabanga ghalala n'ensolo edh'omu nsiko, aye bamalaika nga bamugheereza.

Yesu atoolera okwegeresa

¹⁴ Agho Yoanne ng'amaze okugemwa, Yesu yaaja e Galilaaya yaalangirira Amawulire Amalungi agava ewa Katonda.

¹⁵ Era ng'akoba ati: “Obwire butuuse, Obwakyabazinga bwa Katonda buseese, mwenenie era mwikirize Amawulire Amalungi.”

Okwetebwa kw'Abeegeresebwa abaasooka

¹⁶ Yesu bwe yali atambula ku mbali okw'enhandha ey'e Galilaaya, yaabona Simoni ni muganda we Anderea nga bali kutega obutimba mu nhandha kuba baali bavubi.

¹⁷ Yesu yaabakoba ati: “Munnonereze ndidha kubafuula abavubi ab'abantu!”

¹⁸ Mangu ago baaleka obutimba bwaibwe baamunonereza.

¹⁹ Bwe yeeyongeraku emberi katono, yaabona Yakobo ni Yoanne, batabane ba Zebedaayo. Baali mu lyato nga batereeza obutimba bwaibwe.

²⁰ Era boona mangu ago yaabeeta baaleka iseibwe Zebedaayo n'abakozi mu lyato, baanonereza Yesu.

Awonia omuntu eyaliku omuzimu

²¹ Baatuuka e Kaperinaumu era Yesu tiyalwa, ku lwa Sabbato yangira mu sinagoga yaayegeresa.

²² Abantu baayasaamirira olw'endhegeresa ye, kuba yabeegeresa nga mwene buyinza, aye ti ng'Abanamateeka.

²³ Tibwalwa ng'omuntu aliku omuzimu omubi aboneka mu sinagoga era yaayasiikana ati:

²⁴ “Otwendeza ki iwe Yesu ow'e Nazarethi? Oidhie kutuzikiriza? Nkwidhi niiwe omutukuvu wa Katonda.”

²⁵ Yesu yaakaabukira omuzimu ati: “Sirika, era omuntu ono muveeku.”

²⁶ Agho omuzimu gwamusikambula inho, gwamuvaaku nga gwana.

²⁷ Abaaligho boonaboona beewuunhia era beebuuzagania beene na beene bati: “Kino naani eyali akiboine? Eno ndhegeresa ki empyaka ey'obuyinza? Ono alagira n'emizimu gyamuwulira!”

²⁸ Era ebigema ku Yesu byasansaana mangu mu biketezo eby'e Galilaaya byonabyona.

Okuwonia abalwaire kamaala

²⁹ Agho, Yesu aghalala ni Yakobo ni Yoanne baava mu sinagoga baaja mu ndhu ya Simoni n'Anderea.

³⁰ Mukoirume wa Simoni yali mulwaire wa musuudha era ng'alambaire. Era Yesu olwatuuka ati nga bamukobera.

³¹ Yesu yaaja, yaamugema ku mukono, yaamusitusa. Era omusuudha gwawona yaabagheereza.

³² Endhuba bwe yagwa nga ni kanzimyenzimye agemye, baaleetanga gh'ali abalwaire aba buli nsambo nga n'abagemeibwa emizimu bali omwo.

³³ Abantu ab'omu kibuga boonaboona beesololeza agho ku mulyango.

³⁴ Yaawonia abantu kamaala abaali n'obulwaire obwa buli nsambo, emizimu kamaala yaagibinga ku be gyali gigemye, era nga tagiganha na kwogera, kuba gyali gimwidhi.

Okwegeresa kwa Yesu mu Galilaaya

³⁵ Enkyo Yesu yaawuuna be pwi pwi pwi nga n'endhuba ekaali kuvaayo, yaasituka yaaja mu kifo ezira bantu yaaba eyo ng'asaba.

³⁶ Simoni, ni baine bwe baali, baaja nga bamwagala.

³⁷ Era bwe baamuzuula baamukoba bati: “Abantu boonaboona bali kukwagala.”

³⁸ Yesu yaabakoba ati: “Tuje aghandi mu bibuga ebiriinaine ghano, yoona ndhegereseeyo abaayo kuba ekyo kye naidhirira.”

³⁹ Atyo ni, Yesu yaatambula mu Galilaaya mwonamwona ng'ayegeresa mu sinagoga dhaibwe era n'abaaliku emizimu ng'abawonia.

Yesu awonia omuntu ow'endwaire ey'ebigenge

⁴⁰ Ghaabaagho omuntu ow'endwaire ey'ebigenge, yaidha ye Yesu, yaakuba amakiryaivu era yaamweghemba ati: “Bw'oyenda oghanga okumponia.”

⁴¹ Agho Yesu yaamugemerwa ekisa, yaagolola omukono yaamugemaku, yaamukoba ati: “Nhenda, wona!”

⁴² Era mangu ago ng'endwaire ey'ebigenge eyo esaanagho, ng'awona.

⁴³ Yesu yaamusikirira inho, yaamusiibula,

⁴⁴ era yaamukoba ati: “Bona nga ghazira y'okoberaku, aye ja busimbalaala weeyandhule ewa kabona, ogheeyo ekirabo olw'okuwona kwo nga Musa bwe yalagira, memale boonaboona bakakase.”

⁴⁵ Aye, ono olwafuluma ng'atoolera kukobera buli ye yayagaananga, era atyo yaasansaania amawulire woonawoona. Era okuva ku olwo nga Yesu takaaghanga kungira mu kibuga mu lwatu, aye yaasigalira kubanga mu bifo eby'embali ezira bantu. Eyo, abantu okuva buli ghantu ye baamwagaananga.