Isaia 36 - Baibuli Ekibono kya Katonda 2014

Abassiria batiisatiisa Yerusalemu

¹ Mu mwaka ogweikumi n'ena (14) nga kyabazinga Hezekia n'afuga Buyudaaya, Sennakeribu kyabazinga w'e Assiria yalumba ebibuga byonabyona ebya Buyudaaya ebyezungulwirwa ebimante ebigumu, yaabighangula.

² Agho kyabazinga w'e Assiria oyo yaasindika omukungu we akulira baine boonaboona, ave e Lakishi ng'ali n'eigye eikologho, aje alumbe kyabazinga Hezekia e Yerusalemu. Bwe baatuukayo, baayemerera gha mweta oguleeta amaadhi okuva mu nsulo y'eitale eri ku ngira eja mu kifo ekyetebwa Ekyolezo.

³ Agho abakungu bano Abayudaaya baidha ye bali: Eliakimu mutabane wa Hilikia, nga n'eyalabiriranga ekisaagaati kya kyabazinga Shebuna eyali omughandiisi w'omu kisaagaati kya kyabazinga ni Yoa mutabane wa Asafu, nga n'eyali omukuumi w'ebighandiiko.

⁴ Omukungu oyo Omuassiria yaabakoba ati: “Mukobe kyabazinga Hezekia muti, ‘Kyabazinga omukologho ow'e Assiria ali kukubuuza ati, kiki ekiri kukwesiguza?

⁵ Olowooza oti okwogera obwogere n'okunaafuuka amagezi n'amaani ag'okulwana olutalo? Naani y'oli kwesiga okutuuka n'okundheemera?

⁶ Bona, oli kwesiga ensi Misiri eri ng'oti n'olugada olumenhefu, olufumita engalo dh'oyo alugema n'alwesigamaku. Atyo kyabazinga w'e Misiri bw'ali y'abo abamwesiga.’ ”

⁷ Omukungu Omuassiria yaayongera okukoba ati: “Aye bwe munkoba muti, ‘Twesiga Musengwa Katonda waife,’ ndidha kubabuuza nti, ‘Musengwa Katonda oyo ti n'oyo Hezekia ye yatooleragho ebifo bye ebigulumivu eby'okusinzizangamu ni alutaari dhe, era Hezekia oyo n'akoba abantu ab'omu Buyudaaya ni mu Yerusalemu ati okusinzizanga ku alutaari endala ey'omu Yerusalemu yonka?’

⁸ Mpegaano ni, ka mbasonsoonie mu liina lya musengwa wange kyabazinga ow'e Assiria: ndidha kubagha imwe embalaasi enkumi ebiri (2,000), bwe munaasobola okufunayo abanaadhivuga!

⁹ Oba nga timusobola naire kulwanisa muduumizi mulala ati ow'eidaala erisembayo mu baduumizi b'eigye lya musengwa wange, olwo musobola mutya okwesiga ensi Misiri olw'ebigaali byayo eby'omu lutalo n'olw'abavuzi baayo ab'embalaasi?

¹⁰ Mulowooza muti nalumba ekifo kino okukizikiriza nga Musengwa Katonda tali ghalala ninze? Musengwa Katonda mwene n'eyankoba ati, ‘Lumba ensi eyo ogizikirize.’ ”

¹¹ Agho Eliakimu mutabane wa Hilikia, ni Shebuna, ni Yoa, baakoba omukungu oyo Omuassiria bati: “Tukweghembye, yogera n'ife mu lulimi Oluaramaika, kuba tulutegeera. Aye otayogera n'ife mu Luheburayi ng'abantu abali ku kimante bawulira.”

¹² Omukungu Omuassiria yairamu ati: “Mulowooza muti musengwa wange yantuma okukobera ebibono ebyo musengwa waimwe kyabazinga n'imwe mwenka? Busa, yantuma okubikobera n'abantu abo abatyaime ku kimante, abanaatuuka n'okulya obubi obwaibwe bwene n'okunhwa enkali eyaibwe yeene, ng'oti n'imwe bwe munaakola.”

¹³ Agho omukungu Omuassiria oyo yaayemerera, yaalangirira mu lulimi Oluyudaaya, ng'ayogera mu mamiro ag'amaani ati: “Muwulire kyabazinga omukologho ow'e Assiria ky'akoba!

¹⁴ Ali kubalabula ati Hezekia atabaguumaaza, kuba tasobola kubatoola mu ngalo dhange n'abawonia.

¹⁵ Era atabasendasenda kwesigulira ku Musengwa Katonda, nga mukoba muti, ‘Musengwa Katonda aidha kutuwonia, era aidha kulobera kyabazinga w'Abassiria okugema ekibuga kyaife.’

¹⁶ Mutawulirisa Hezekia, kuba kyabazinga w'e Assiria akoba ati, ‘Muveeyo bya bulungi mwegheeyo ye ndi. Olwo kiisi muntu aidha kulyanga ku bibala eby'emizabbibu egigye gyene, n'eby'emiti emitiini egigye gyene, era anhwenga amaadhi ag'omu nsulo eyiye yeene,

¹⁷ okutuusa lwe ndiidha ni mbatwala mu nsi eri ng'oti n'eyaimwe yeene, ensi erimu engaano ey'okufumbamu emigaati, n'amasamba ag'emizabbibu ag'okutoolangamu omwenge ogw'emizabbibu.’

¹⁸ Aye mutawulirisa Hezekia ali kubaguyaguya ati, ‘Musengwa Katonda aidha kutuwonia!’ Ghalighooku omusambwa waire omulala guti ogw'abamaghanga agandi ogwali gusoboireku okuwonia ensi yaagwo ni gugitoola mu ngalo dha kyabazinga w'e Assiria?

¹⁹ Emisambwa egy'e Hamathi n'egy'e Arupadi, buti giri gha? Ate emisambwa egy'e Sefarivaimu, buti giri gha? Gyali giwoniizaaku ekibuga Samaria, kyanva mu ngalo?

²⁰ Musambwa ki, ku misambwa egy'ensi dhoonadhoona, ogwali guwoniizaaku ensi yaagwo ni gugintoola mu ngalo, memale olwo katyo mulowooze muti Musengwa Katonda asobola okuwonia Yerusalemu, yaakintoola mu ngalo?”

²¹ Aye abantu baasirika busirike, baaloba kumwiramu kibono naire, kuba kyabazinga Hezekia yali abalagiire ati: “Mutamwiramu.”

²² Agho Eliakimu mutabane wa Hilikia, nga n'eyalabiriranga ekisaagaati kya kyabazinga, ni Shebuna eyali omughandiisi w'omu kisaagaati kya kyabazinga, era ni Yoa mutabane wa Asafu, nga n'eyali omukuumi w'ebighandiiko, baaja eri Kyabazinga Hezekia nga bakanwiremu ebivaalo byaibwe olw'enaku. Baamukobera omukungu w'e Assiria bye yakoba.