Isaia 24 - Baibuli Ekibono kya Katonda 2014

Musengwa Katonda alibonereza ensi

¹ Bona, Musengwa Katonda alyonoonayonoona ensi eno yaagireka ng'eri bw'agho etyo aligifunhafunha yaaleetera abagibaamu okusansaana.

² Kiisi muntu alibisibwa mu nsambo n'endala: abantu babuliidho ni bakabona, abairu ni basengwa baibwe, abaguzi n'abatunzi, abawola n'abo ababeewolaku, ababandha n'abo ababandhibwa.

³ Musengwa Katonda alyonoonayonoona ensi yaagimalamu buli kantu. Atyo bw'akobye era taliroba kukituukiriza.

⁴ Ensi ewolongeire n'ebigiriku byayongobera; eitaka likaze n'ebiririku byaniala. Ebiri ghaigulu ku igulu n'ebiri ghansi ku itaka byonabyona bifafaagaine.

⁵ Abantu boonoine ensi nga bava ku mateeka ga Musengwa Katonda, baadheemera ebiragiro bye, era baamenha endagaano ye etawaagho.

⁶ Musengwa Katonda kyaviire n'akolimira ensi, abantu baayo yaabasingisa omusango era yaabazikiriza mu bungi. Abasigairegho baaba nga bali bwa batono bati.

⁷ Emizabbibu giniaire, omwenge gw'emizabbibu gwakendeera. Abantu boonaboona abaalinga abasangaavu, buti bali bwa mu nnaku.

⁸ Abaakolanga ebinhumo nga bakubiraku obugoma, baalekera. Abaakubanga emizira baazima, n'abaakubanga endingidi tibakaadhikuba.

⁹ Baakomya ira okunhwa omwenge gw'emizabbibu, nga bemberaku enhembo. Abaagunhwanga mpegaano gubakaayira bukaayire.

¹⁰ Ekibuga kitabangwiketabangwike, buli muntu yeigaliza mumwe ghalobe kubaagho amwingirira.

¹¹ Abantu baasiikanira bwa mu nguudo olw'okubulwa omwenge gw'emizabbibu. Amasanhu goonagoona gaamala okutuuka ghe gakoma, era okusagamba mu nsi kwamala okukomezebwa.

¹² Ekibuga kisigaire agho kityo, nga kiri bwa bifulukwa byereere. Emiryango gyakyo bagikubyekubye, baagireka nga gimenheikemenheike.

¹³ Kityo bwe kiriba mu maghanga goonagoona ag'omu nsi. Kiriba ng'oti ni mu biseera eby'amakungula nga bamaze okukuba ebibala okuva ku miti emyoliva, n'okunoga emizabbibu egisembayo.

¹⁴ Abo abaliba bawoniegho balyemba n'eisanhu lingi; abaliba ku luuyi olw'e bugwandhuba balisaaka ekitiisa kya Musengwa Katonda.

¹⁵ Abo abaliba ku luuyi olw'e buvandhuba boona balimusaaka; n'abo abaliba mu biketezo eby'oku nhandha baamusaaka, oyo Musengwa Katonda, Katonda wa Isiraeli.

¹⁶ Tuliwulira enhembo okuva ensi y'ekoma nga dhisaaka ekitiisa ky'oyo Omutukuvu. Aye nze nkoba nti nga nkagwireku! Ndi kuseenena buseenene mwoyo era naagoogomba naawaagho. Abantu ab'enkwe baba bwa mukusalira banaibwe nkwe. Era enkwe dhaibwe dheeyongera bweyongere okuba embi.

¹⁷ Imwe abantu b'oku nsi mumpulirise! Entiisa n'olwina n'omutego, bibateegereire.

¹⁸ Ole alirumuka n'awona entiisa, aligwa mu lwina. Ate ole aligezaaku n'ava mu lwina, aligwa bwa ku mutego gwamugemya. Ebituli eby'oku igulu biigule, kale amaadhi galiyuyika okuva ku igulu, n'emisingi gy'ensi gyatengeeta.

¹⁹ Ensi eryetema entanda, yaagabulukukamu, era yaatengeesebwa ebitaloodheka.

²⁰ Ensi eritagala ng'oti mutamiivu, yaayuuzibwayuuzibwa ng'oti ntindi. Ebibi byayo bigizitooghereire byagigwisa, era teja kwirayo kusituka.

²¹ Ku lunaku olwo Musengwa Katonda alibonereza obuyinza bwonabwona obuli ghaigulu mu igulu, n'abafuzi abali ghansi ku nsi.

²² Musengwa Katonda alibasolokeza ghalala mu lwina ng'oti basibe. Alibasibira mu ikomera, yaamala yaababonereza ng'ekiseera kituuse.

²³ Olwo omwezi guligema enzikiiza, n'endhuba yaaloba kwaka; kuba Musengwa Katonda Afuga Amagye n'aliba kyabazinga ku lusozi Sioni ni mu Yerusalemu. Era alyoleka ekitiisa kye eri abakulembeze b'abantu.