Isaia 18 - Baibuli Ekibono kya Katonda 2014

Musengwa Katonda alibonereza Ethiopia

¹ Eruuyi ere ng'osomoike emiiga gy'e Ethiopia, eriyo ensi ewulirwamu okuziinhuuka ng'oti kwa maghagha ga nhonhi.

² Ensi eyo etuma abakwenda baidhire ku mwiga Kiyira, babitire ku maadhi mu maato agaakolebwa mu bitoogo, nga batumiibwa bati: “Muje mangumangu mu nsi yaimwe emiiga ye gyayawulamu, eighanga eryo ery'amaani era eighanguzi. Mutwale obukwenda eri abantu abaleeyi ab'emibiri emighegheevu, abatiibwa ensi yoonayoona.

³ Mubakobe muti, ‘Imwe abantu mwenamwena abali mu nsi, mwekalirisenga mubone nga bendera esimbiibwa ku lusozi, era mutegenga kutu muwulire ng'eigwala lifuuye.’

⁴ Musengwa Katonda ankobye ati aliba mu kifo kye mw'aba, yaalingirira kisiriikiriza ng'oti n'olwota bwe lukunkunira mu kasana akali kwememula, era yaaba ng'oti n'omusulo ogutoonhera mu lwota olw'obwire mu biseera by'amakungula.

⁵ Alizikiriza abalwani b'abantu abo nga bakaali na kulumba, ng'oti n'omuntu bwe yandiidhie ku muti ogumaze okumulisa ekimuli, nga gutaireku n'ebibala era nga biri na kwenga, aye nga bakaali bwa kubinoga, memale n'atema ensaga n'adhighanulayo yoonayoona ye dhaalandira.

⁶ Emirambo gyaibwe baligireka agho okuliibwa enhonhi edh'oku nsozi n'ensolo edh'omu nsiko. Enhonhi dhirirya ku egyo mu biseera eby'endoboozi, n'ensolo dhaalya okwo mu biseera eby'ekiinhogogo.”

⁷ Abantu abo abaleeyi ab'emibiri emighegheevu, abatiibwa ensi yoonayoona era beene nsi emiiga ye gyayawulamu, eighanga eryo ery'amaani era eighanguzi, ekiseera kiidha kutuuka baleetere Musengwa Katonda Afuga Amagye ebirabo, mu kifo kye bamusinzizaamu ku lusozi Sioni.