Ezekieli 38 - Baibuli Ekibono kya Katonda 2014

Katonda akozesa Gogi okubonereza

¹ Agho Musengwa Katonda yaayogera ninze, yankoba ati:

² “Iwe omuntu, amaiso go galingirize Gogi omufuzi ow'ab'e Mesheki n'ab'e Tubali, mu nsi y'e Magogi. Olange akabi akali kumwidhira.

³ Mukobere bino, nze Musengwa Katonda, bye ndi kukoba nti: Bona eno, nze buti nfuuse muzigu y'oli iwe Gogi omufuzi ow'ab'e Mesheki n'ab'e Tubali.

⁴ Ndikukyusa naakulingiriza ye ndi, naakutunga mu mba dho amalobo era naakukwekwebya, naakutoolayo n'eigye lyo lyonalyona omuli embalaasi, n'abaisirukale ab'oku mbalaasi, boonaboona nga bavaire eby'omu lutalo mu bwidhuvu, nga bali igye ikologho lyene. Era nga bagemye engabo enene n'entono, eno bwe bazunza empiima.

⁵ Abalwani ab'e Perusia, n'ab'e Ethiopia, n'ab'e Puti, boona baliba ghalala nabo, nga boonaboona bagemye engabo era nga bavaire enkoofiira edh'ekyuma.

⁶ Abalwani abava e Gomeri, n'abava e Bethi Togarima ere eghala einho ku luuyi olw'omukono omugooda olw'e buvandhuba, n'abava mu maghanga agandi kamaala, boona baliba ghalala n'eigye lyo.

⁷ “Ba mwetegefu, n'amagye go goonagoona ogalagire gabe nga geetegeike.

⁸ Nga ghabiseeghooku ekiseera kinene, mu biseera eby'oluvainhuma ndikulagira okulumba ensi Isiraeli, olutalo ye lwagoya einho ni lugireka agho etyo ng'eri bifulukwa byereere omutaba bantu okumala entangama. Abantu baamu baali basansaine aye mpegaano baira nga bava mu maghanga kamaala, baaba ku nsozi dh'ensi yaibwe eyo nga bali mu miraala.

⁹ Oliidha n'eigye lyo lyonalyona, ghalala n'abalwani abava mu maghanga agandi kamaala, mwalumba ensi eyo ng'oti n'amaadhi agalimu kiwunga era mwagighembaku ng'oti kire.”

¹⁰ Musengwa Katonda era akoba, ati: “Ku lunaku olwo ebidhuubo biriidha mu mwoyo gwo, waategeka okukola akabi,

¹¹ ng'okoba mule oti, ‘Ndidha kuja numbe abantu ab'omu nsi eyo ey'ebibuga ebiteezungulwirwa bimante bigumu. Ndibagwaku nga bali mu miraala, nga bazira kye beekengeera naire, era nga bazira ntegeka yoonayoona ya kwekuuma.’

¹² Olirumba abantu abali mu bifo ebyali byonooneibwa, waabanhagululaku ebintu byaibwe waabitwala ng'omunhago. Ebifo ebyo mpegaano birimu abantu abaasolozebwa eyo mu maghanga, nga buti bali n'ebyayo n'ebintu ebindi, era nga bamanhiibwa mu nsi yoonayoona.

¹³ Abantu ab'e Sheba, n'ab'e Dedani, N'abasuubuzi ab'omu bibuga eby'e Tarushishi, balikubuuza bati, ‘Oidhie kunhagulula? Osoloiza eigye lyo osobole okutwala ebintu ng'omunhago? Oidhiriire feeza, na zaabu, na kutwala bintu na byayo, ng'omunhago.’ ”

¹⁴ Kale ni, iwe omuntu, langa okobere Gogi oti nze Musengwa Katonda ndi kumukoba nti: “Mu biseera abantu bange Abaisiraeli bye balibeera mu miraala, ng'olwo ositukiramu obalumba.

¹⁵ Oliviira mu nsi yo, eyo eghala einho ku luuyi olw'omukono omugooda olw'e buvandhuba, waidha n'eigye einene ery'amaani, ghalala n'abalwani abava mu maghanga agandi kamaala nga boonaboona baisirukale ba ku mbalaasi.

¹⁶ Olirumba abantu bange Abaisiraeli waababuutikira ng'oti kire kighembye ku nsi. Mu biseera ebyo eby'oluvainhuma ndikuleetera okulumba ensi yange, amaghanga gasobole okuumanha nze. Bye ndikolera mu iwe, biryoleka amaghanga ago nga bwendi omutukuvu.

¹⁷ Nze Musengwa Katonda nkukakasa nti: Niiwe ye nayogeraku mu biseera eby'eira nga mbita mu bagheereza bange abalanzi ab'omu Isiraeli, baamala emyaka kamaala nga balanga bati ndikusindika waabalumba.”

Katonda agha Gogi ekibonerezo

¹⁸ Musengwa Katonda akoba ati: “Ku lunaku olwo Gogi lw'alirumbiraku ensi Isiraeli, ekiruyi kija kunsituka.

¹⁹ Ndi kwogeza enkikidi endiku olw'abantu bange, n'obusungu obundiku obuli kutumbuka ng'oti muliro, era ndi kulangirira nti ku lunaku olwo ghalibaagho musisi ow'amaani mu nsi Isiraeli.

²⁰ Ebyenhandha mu maadhi, enhonhi edhiguluka, ensolo edh'omu nsiko, ebyeghaluliza ku itaka byonabyona, n'abantu boonaboona ku nsi, biritengera olw'okuntya nga ntuuse. Ensozi dhirisuulibwa ghansi, ebifo ebiri mu biiko byagwa, n'ebimante ebyezungulwire ebibuga byamenhekamenheka.

²¹ Ndireetera Gogi oyo ebitiisa ebya buli nsambo, n'abalwani be baitagana beene na beene. Nze Musengwa Katonda ninze nkobye.

²² Ndimubonereza n'endwaire ya kawumpuli n'okutemulagana. Era mwene, n'eigye lye, n'abalwani abava mu maghanga agandi kamaala abaliba aghalala naye, ndibasindikira amaadhi ag'omwidhuzo, ni kiwunga alimu amabaale g'omugozi, n'omuliro, n'obunhota bwa salufa.

²³ Kale ntyo bwe ndyoleka amaghanga nga bwendi omukologho era omutukuvu. Olwo balimanha nga ninze Musengwa Katonda.”