Ezekieli 31 - Baibuli Ekibono kya Katonda 2014

Misiri ogigeza ku muti muvule

¹ Ku lunaku olusooka mu mwezi ogwokusatu, mu mwaka ogweikumi n'omulala (11) nga tuli mu bunhage, Musengwa Katonda yankoba ati:

² “Iwe omuntu, koba kyabazinga wa Misiri n'abantu be boonaboona oti: “Nnaabageza ku ani omukologho ng'oti niimwe?

³ Bona eno, ndidha kubageza ku muti omuvule mu kibira e Lebanoni. Oguli n'ensaga enungi edhikola ekinsense ekizibirivu, era omuleeyiriri, ng'obusanso bw'ensaga dhaagwo butuuka ni mu bire.

⁴ Ghe gwali nga ghaligho amaadhi ge gunhwa, ensulo edh'omu itaka edhaakuuluulanga okwezungulula agho ghe gwasimbibwa, dhaaguleetera okukula. Era ensulo edho dhaatuuka ni ku miti egindi gyonagyona egyali mu kibira.

⁵ Olw'okufunanga obukalamu amaadhi, gwakula gwaleegherera inho ghaigulu okusinga emiti egindi gyonagyona egy'omu kibira ekyo. Ensaga dhaagwo dhaageedha era dhaaleegha.

⁶ Enhonhi dhoonadhoona edhiguluka mu ibbanga dhaazimba ebisu byadho mu nsaga dhaagwo. Ensolo dhoonadhoona edh'omu nsiko dhaazaaliranga abaana baadho ghansi gh'ensaga dhaagwo. N'amaghanga ag'amaani gaawuumuliranga ghansi mu kinsense kyagwo.

⁷ Omuti ogwo gwali mukologho nga guboneka bulungi, n'ensaga dhaagwo dhaaba ndeeyiriri; kuba emizi gyagwo gyaikanga ghansi inho eri amaadhi amangi.

⁸ Nga togugeza ku mivule gya mu nimiro ya Katonda, waire ensaga dhaagwo okudhigeza ku dh'emiti egindi emireeyiriri. Nga n'emiti emipulane gyona gizira nsaga dhaaga na dhaagwo. Mu nimiro ya Katonda timwalimu muti guboneka bulungi ng'ogwo.

⁹ Nagukola gwaboneka bulungi olw'ensaga dhaagwo enhingi enzibirivu. Nga n'emiti egindi gyonagyona egy'omu Edeni, enimiro ya Katonda, gigwegomba.

¹⁰ “Agho ni, nze Musengwa Katonda kyenva ndi kukoba nti: Ng'omuti ogwo bwe gwaleegherera, obusanso bw'ensaga dhaagwo butuuka ni mu bire, era ni gwekuluntaza olw'obuleeyi obwo,

¹¹ nze buti nguviireku. Era ndigughaayo mu ngalo edh'omufuzi ow'amaani, yaagubonereza olw'ebibi byagwo.

¹² Abantu abamaghanga agandi abasingayo obukambwe baligutema baaguleka agho. Ensaga dhaagwo dhirigwa eyo dhityo ku nsozi ni mu biiko byonabyona, n'obusanso bw'ensaga dhaagwo bwamenhekera mu myala gyonagyona egy'amaadhi mu nsi eyo. Era abantu boonaboona ab'oku nsi baliva mu kinsense kyagwo baaja baaguleka agho.

¹³ Enhonhi edhiguluka dhoonadhoona dhiriidha dheebunga ku muti ogwo ghe guligwa, n'ensolo edh'omu nsiko dhoonadhoona dhaatyankirira ensaga dhaagwo.

¹⁴ Ekyo kiriba kityo, olwo ghalobe kubaagho muti gwonagwona guleegherera nga guli n'obusanso bw'ensaga dhaagwo obutuuka ni mu bire, waire nga guliba aghali maadhi. Era ghalobe kubaagho muti ogulinhwa amaadhi ni gutuuka ku buleeyi bwa gule, kuba emiti gyonagyona giteekwa kufa ng'abantu obuntu bwe bafa. Era giteekwa okuja mu nsi ey'abafu ghalala n'abo abaika eyo ghansi mu lwina.”

¹⁵ Musengwa Katonda era akoba ati: “Omuti ogwo bwe guliserengeta e magombe, ndireetera emiiga egy'omu itaka okulira olwagwo. Ndirekeza emiiga n'ensulo okukuuluula, naaleeta enzikiiza ku nsozi edh'e Lebanoni, era naaleetera emiti egy'omu kibira gyonagyona okukala.

¹⁶ Bwe ndigusuula e magombe ghalala n'abo abaika eyo mu lwina, omuvuuma ogw'okugwa kwagwo gulitengeesa amaghanga. Emiti gyonagyona egy'omu Edeni, n'egyo egy'e Lebanoni gyonagyona egisinga bulungi egyanhwa amaadhi, era egyaserengeta mu itaka, girisangaala olw'okugwa kwagwo.

¹⁷ Girija nagwo mu nsi ey'abafu, eri abo abaamala eira okwitirwa mu ntalo. Bwenebwene abo abaabanga mu kinsense kyagwo balisansaanira mu maghanga baazikirira.

¹⁸ “Mu miti gyonagyona egy'omu Edeni, nnaakugeza ku guli gha, mu kitiibwa ni mu bukologho? Aye era weena oliika ghansi ghalala n'emiti egy'omu Edeni, waaba eyo mu nsi ey'abafu ghalala n'abatatya Katonda abo abataali bakekete abaitirwa mu lutalo. “Omuti ogwo ni kyabazinga wa Misiri n'abantu be boonaboona. Nze Musengwa Katonda ninze nkobye.”