Ezekieli 29 - Baibuli Ekibono kya Katonda 2014

Okulanga ebirituuka ku nsi Misiri

¹ Ku lunaku olweikumi n'eibiri mu mwezi ogweikumi, mu mwaka ogweikumi nga tuli mu bunhage, Musengwa Katonda yaayogera ninze, yankoba ati:

² “Iwe omuntu, amaiso go galingirize kyabazinga w'e Misiri, olange akabi akalimutuukaku mwene, n'ako akalituuka ku nsi Misiri yoonayoona.

³ Mukobe oti, nze Musengwa Katonda ndi kukoba nti: Bona eno, buti nfuuse muzigu y'oli, iwe kyabazinga wa Misiri. Niiwe ogusota ogukologho oguba mu miiga ni gukoba guti, ‘Omwiga Kiyira gwange ku bwange, ninze eyagukola.’

⁴ Olw'ekyo ndikutunga mu mba dho amalobo, era naaleetera ebyenhandha ebiba mu mwiga gwo okukweriipa ku bigalagamba byo. Memale naakughaluzaayo mu mwiga gwo, ghalala n'ebyenhandha byo byonabyona nga bikweriipye ku bigalagamba.

⁵ Naakusuula mu irungu, iwe mwene ghalala n'ebyenhandha ebyo byonabyona ebiba mu mwiga gwo. Oligwa mu nsiko waafiira eyo, ghaabulagho atoolagho omulambo gwo waire okuguziika. Nkughaireyo obe emere ey'enhonhi n'ey'ensolo edh'omu nsiko.

⁶ “Olwo abantu boonaboona ab'omu Misiri balimanha nga ninze Musengwa Katonda. “Nze Musengwa Katonda era nkoba imwe Abamisiri nti: Abaisiraeli baabeesiga, aye imwe mwababeera ng'oti mwigo gwa lugada.

⁷ Bwe baabagemaku okubeesiiraku mwamenheka bumenheke, mwabafumita enkwawa era mwabaluyiriza inho, mwabaleetera n'emigongo okubeekaasa.

⁸ Kale ni, nze Musengwa Katonda kyenva ni nkoba nti: Bona eno iwe ensi Misiri, ndikusindikira olutalo, lwakwitamu abantu n'ensolo.

⁹ Era olisigala bw'agho otyo ng'oli bifulukwa byereere omutaba bantu. Olwo balimanha nga ninze Musengwa Katonda. “Era olw'okuba wakoba mbu omwiga Kiyira gugwo, niiwe eyagukola,

¹⁰ bona eno, buti nfuuse muzigu y'oli era naafuuka muzigu n'eri emiiga gyo. Ndikuleetera okusigala obwagho otyo ng'oli bifulukwa byereere, okuva e Migidoli okutuuka e Siyene, n'okutuukira irala ku nsalosalo ni Ethiopia.

¹¹ Ezira kigere kya muntu waire kya nsolo ekiribita omwo. Ensi Misiri erisigala agho ng'eziramu muntu agibaamu okumala emyaka amakumi ana (40).

¹² Ndigifuula bifulukwa byereere okusinga n'ensi edhindi dhoonadhoona edhaali dhifuuliibwaku ebifulukwa. N'ebibuga byayo birizika okumala emyaka makumi ana (40), byaba bubi inho okusinga ebibuga ebindi byonabyona ebyali bizikiriziibwaku. Ndisansaaniza Abamisiri mu maghanga kamaala, naabasindika mu nsi enhingi baanoonia eyo obubudamo.”

¹³ Musengwa Katonda akoba ati: “Oluvainhuma olw'emyaka amakumi ana, ndisoloza Abamisiri naabatoola eyo mu bantu abamaghanga agandi ye nabasansaaniza.

¹⁴ Ndibaleetera ebintu okwiramu okubajiiranga obukalamu, naabaiza mu nsi yaibwe mwe baava, mu kiketezo eky'e Pathirosi. Baliba eyo nga bali bwakyabazinga bulamba, aye nga bunafu.

¹⁵ Buliba bwakyabazinga obusingayo kuba bunafu, obutaliiramu kabiri kwekudumbaliza ku maghanga gandi. Ndibufuula butono inho obutasobola kwiramu kufuga maghanga gandi.

¹⁶ Eighanga Isiraeli tiririirayo kabiri kwesiga Bamisiri, okutoolaku okweidhusanga olw'ekibi kye baakola okuja ye bali okufuna obuyambi. Olwo Abaisiraeli balimanha nga ninze Musengwa Katonda.”

Kyabazinga Nebukadinezzari alighangula Misiri

¹⁷ Ku lunaku olusooka, mu mwezi ogusooka, mu mwaka ogwamakumi abiri n'omusanvu (27) nga tuli mu bunhage, Musengwa Katonda yaayogera ninze, yankoba ati:

¹⁸ “Iwe omuntu, kyabazinga Nebukadinezzari owa Babilonia yasitula eigye lye, lyalumba Tiro n'amaani. Emitwe gy'abaisirukale be gyagwa empaata n'amabega gaabanuubuka, olw'okubbeeda ebizito. Aye ate k'abe kyabazinga mwene oba abaisirukale be, bazira naire kye baaganhulwa mu kulumba Tiro.

¹⁹ Agho ni, nze Musengwa Katonda kyenva ndi kukoba nti: Nditoola ensi Misiri naagigha kyabazinga Nebukadinezzari owa Babilonia, yaanhagulula obukombe bwayo yaabutwala ng'omunhago oguliba empeera ey'abaisirukale be.

²⁰ Mmughaire ensi Misiri okumusasula olw'okufaabiikana kwe, kuba eigye lye lyakolera nze. Nze Musengwa Katonda ninze nkobye.”

²¹ “Ekyo bwe kirituukirira, eighanga Isiraeli ndirifuula lya maani, era iwe Ezekieli ndikugha okulanga n'amaani, abantu boonaboona baakuwulira. Olwo balimanha nga ninze Musengwa Katonda.”