Ezekieli 28 - Baibuli Ekibono kya Katonda 2014

Okulanga ebirituuka ku kyabazinga ow'e Tiro

¹ Kabiri Musengwa Katonda yankoba ati:

² “Iwe omuntu, kobera omufuzi ow'e Tiro oti nze Musengwa Katonda ndi kumukoba nti: Olw'okwekudumbaza kw'oli nakwo, weeyeta katonda. Okoba oti niiwe otyama ku kityamo kya bakatonda, eyo ghagati mu nhandha. Ate nga oli muntu buntu toli katonda naire, waire nga weetwala okuba ng'oli katonda mulamba.

³ Olowooza oti oli mugezi okusinga Danieli, era nga ghazira kyama kikwekeibwa ky'otaidhi.

⁴ Wakozesa amagezi go n'okutetenkania waafuuka omukombe. Weesolokeza zaabu ni feeza mu materekero go.

⁵ Olw'amagezi amangi g'oli nago mu by'obusuubuzi, weeyongeire okukombaghala, era waatoolera okwekudumbaza olw'obukombe obwo.

⁶ Kale nze Musengwa Katonda nkoba nti: Olw'okuba weetwala okuba omugezi einho nga bakatonda,

⁷ ndikusindikaku abantu abamaghanga agandi abasingayo obukambwe. Balikulumba mu lutalo, baazikiriza ebintu ebirungi bye wafuna mu magezi go, era baayonoona ekitiisa kyo.

⁸ Balikwita baakusindika e magombe. Era olifa ng'abo abaitirwa eyo mu nhandha ghagati.

⁹ Obwo era oliba ng'okaakoba oti oli katonda, ng'oli mu maiso g'abo abaja okukwita? Busa naire, bw'oliba ng'oli mu ngalo dhaibwe oliba muntu buntu se ti katonda.

¹⁰ Oliitibwa abantu abatatya Katonda waafa ng'oti bwa mbwa. Nze Musengwa Katonda ninze nkobye.”

Okugwa kwa kyabazinga wa Tiro

¹¹ Musengwa Katonda era yankoba ati:

¹² “Iwe omuntu, lira amaziga ku lwa kyabazinga wa Tiro, omukobe oti nze Musengwa Katonda ndi kumukoba nti: Wali kya kuboneraku eky'omuntu atuukiriire, ng'oidhwire amagezi era ng'oli mulungi inho mu mboneka.

¹³ Wabanga mu Edeni, enimiro ya Katonda. Ng'ovaala eby'okwewoomya ebyakolebwa mu mabaale ag'omughendo: sarudio, topazi, yasipera, kurisolito, berulo, onikisi, saffiro, karabunkule ni emeraludo. Era ng'oba n'ebyamadholobera ebya zaabu. Ebyo byonabyona byakolebwa ku lunaku lwe watonderwaku.

¹⁴ Nalonda ekitonde eky'amaghagha ekyetebwa kerubi naakitaagho okukukuuma. Waabanga ku lusozi lwa Katonda olutukuvu, ng'otambulira ghagati mu mabaale ag'omughendo agamirimiinha.

¹⁵ Empisa dho dhaali nkalamu okuva lwe watondebwa okutuusa lwe kyazuulibwa nti otooleire okukola ebibi.

¹⁶ Weemalira inho mu by'okusuubula byakuleetera okukozesa obukambwe, waakola ebibi. Kale naakubinga ku lusozi lwange olutukuvu ng'oli mwonoonefu. Era kikerubi ekyakukuumanga kyakubingirira okukutoola mu mabaale ag'omughendo agamirimiinha.

¹⁷ Weekudumbaza olw'obulungi obw'emboneka yo. Ebitiibwa bye wali nabyo byakuleetera okwebisa ng'omusiru. Kyenava ni nkusuula ghansi ku itaka, naakuleka agho, bakyabazinga abandi baakwerolera beene n'amaiso gaibwe.

¹⁸ Olw'ebibi byo olukunkumuli n'obukupankupania obungi mu kusuubula kwo, waleetera ebifo byo ebisinzibwamu okwonooneka. Kyenava ni ntumbusa omuliro mu iwe gwakwokya, abo boonaboona abakulingangaku baabona ng'osiriire ofuuse ivu.

¹⁹ Abantu ab'omu maghanga goonagoona abaali bakwidhi baatya inho olw'ebyo ebyakutuukaku. Era enkomerero y'otuuseeku etiisa inho, kuba tokairayo kubaagho ebyanda n'ebyanda.”

Okulanga ebirituuka ku nsi Sidoni

²⁰ Kabiri Musengwa Katonda yankoba ati:

²¹ “Iwe omuntu, amaiso go galingirize ekibuga Sidoni, olange akabi akali kukiidhira.

²² Okikobere bino, nze Musengwa Katonda, bye ndi kukikoba nti: Bona eno iwe ekibuga Sidoni, buti nfuuse muzigu y'oli, era abantu balisaaka ekitiisa kyange olw'ebyo bye ndikola mu imwe. Bwe ndyoleka nga bwendi omutukuvu, ni nsalira abo abakubaamu omusango era ni mbabonereza, olwo balimanha nga ninze Musengwa Katonda.

²³ Ndisindika endwaire ya kawumpuli mu iwe, era omusaayi gulikuuluulira mu nguudo dho. Abantu bo baliitibwa ng'olumbiibwa olutalo okuva ku ndhuyi dhoonadhoona, Olwo olimanha nga ninze Musengwa Katonda.”

Ensi Isiraeli eriba mu miraala

²⁴ Musengwa Katonda era yaakoba ati: “Ku maghanga goonagoona ageezungulwire ensi Isiraeli agaaginhoomanga, tighalibaagho waire eirala liti eririgifuukira olukandwa okugikwadula oba okugifuukira eiwa okugifumita. Olwo balimanha nga ninze Musengwa Katonda.”

²⁵ Musengwa Katonda era yaakoba ati: “Bwe ndimala okusoloza Abaisiraeli ni mbatoola mu maghanga mwe baasansaanira, olwo ab'amaghanga goonagoona balibona bwendi omutukuvu. Era Abaisiraeli abo baliba mu nsi yaibwe, ye nagha omugheereza wange Yakobo.

²⁶ Baligibaamu mu miraala, baazimba amayumba, baasimba n'amasamba ag'emizabbibu. Baliba mu miraala bwe ndisala omusango ni mbonereza baliraanwa baibwe boonaboona abaabanhoomanga. Olwo balimanha nga ninze Musengwa Katonda.”