Ezekieli 20 - Baibuli Ekibono kya Katonda 2014

Musengwa Katonda by'ayenda, ate n'obudheemu obw'abantu

¹ Ku lunaku olweikumi mu mwezi ogwokutaanu, mu mwaka ogwomusanvu nga tuli mu bunhage, ghaabaagho abandi ku bakulembeze ab'omu Isiraeli abaidha ni batyama agho mu maiso gange nga benda okwebuuza ku Musengwa Katonda.

² Agho Musengwa Katonda yankoba ati:

³ “Iwe omuntu, yogera n'abakulembeze ab'omu Isiraeli abo obakobe oti nze Musengwa Katonda ndi kubakoba nti: Mwidhie kuneebuuzaaku? Aye ni, nze Musengwa Katonda ndayira nti nga bwendi omulamu tiidha kubaganha naire kuneebuuzaaku.

⁴ “Iwe omuntu, oli mwetegefu okubasalira omusango? Bwenebwene oli mwetegefu? Kale ni baidhukize ebyenhinhalwa badhaadha baibwe bye baakola.

⁵ Era obakobe oti nze Musengwa Katonda ndi kubakoba nti: Olunaku lwe neeroboza eighanga Isiraeli, abaana ba Yakobo abo, nabeeyandhulira nga bali mu nsi Misiri, naabamanhisa nti ninze Musengwa Katonda waibwe.

⁶ Era ku olwo nabasuubiza okubatoola mu nsi Misiri, mbatwale mu nsi ye nabategekera engimu era erimu ebirungi kamaala, esinga edhindi dhoonadhoona ekitiibwa.

⁷ Naabakoba nti basuule ere ebyenhinhalwa ebibasikiriza, era balobe kweyonoona nga basinza ebitali nze Katonda eby'omu Misiri, kuba ninze Musengwa Katonda waibwe.

⁸ Aye bandheemera, baaloba kuwulirisa bye nabakoba. Baaloba kusuula ere ebyenhinhalwa ebyabasikirizanga, waire okuva ku bisinzibwa ebitali nze Katonda eby'omu Misiri. Agho naayenda okubamaliraku ekiruyi kyange, mboolekeze obusungu bwange nga bali eyo mu nsi Misiri.

⁹ Aye ekyo tyakikola ku lw'eriina lyange, lirobe kunhoomebwa mu maghanga ge baalimu, kuba ab'omu maghanga ago baaligho nga nsuubiza Abaisiraeli abo nti ndi kuja kubatoola mu nsi Misiri.

¹⁰ “Kale naabatoola mu nsi Misiri naabatwala mu irungu.

¹¹ Naabagha ebiragiro byange, naabeegeresa n'amateeka gange kuba ebyo nga n'ebireetera omuntu okuba omulamu ng'abituukiriiza.

¹² Era naabateeragho n'olunaku lwa Sabbato ng'akamanhiso ghagati ghange ni beene, okubaidhukizanga nti nze Musengwa Katonda mwene, ninze mbatukuza.

¹³ Aye abantu ab'eighanga Isiraeli bandheemera nga bali eyo mu irungu, baaloba kujiira ku mateeka gange era baava ku biragiro byange, ebireetera omuntu okuba omulamu ng'abituukiriiza. Era baayonoona olunaku lwange olwa Sabbato. Agho naayenda mbamalireku ekiruyi kyange nga bali eyo mu irungu, mbazikirize mbamaliriregho.

¹⁴ Aye ekyo tyakikola ku lw'eriina lyange, lirobe kunhoomebwa mu maghanga ge baalimu, kuba ab'omu maghanga ago baabona nga ndi kubatoola mu nsi Misiri.

¹⁵ Kale, nze neerayirira mwene nga bali eyo mu irungu, nti tiribatuusa mu nsi ye nabagha, ensi engimu era erimu ebirungi kamaala, esinga edhindi dhoonadhoona ekitiibwa.

¹⁶ Neerayirira ntyo lwa kuba baava ku biragiro byange era baaloba kujiira ku mateeka gange. Baayonoona n'olunaku lwange olwa Sabbato, era baasinzanga ebitali nze Katonda.

¹⁷ “Aye nabasaasira, naaloba kubazikiriza kubamaliriragho nga bali eyo mu irungu.

¹⁸ Agho naalabula abaana baibwe nga bali eyo mu irungu, nti mutajiira ku mateeka badhaadha baimwe ge baataagho, era mutagondera biragiro byaibwe, waire okweyonoona nga musinza ebyo bye basinza ebitali nze Katonda.

¹⁹ Nze Musengwa Katonda ninze Katonda waimwe, mujiirenga ku mateeka gange era mukolenga bye ndagira.

²⁰ Mukuzenga olunaku lwa Sabbato nga lutukuvu, lubenga akamanhiso ak'endagaano nze ye nakola n'imwe, era lubaidhukizenga nga nze Musengwa Katonda mwene, ninze Katonda waimwe.

²¹ “Aye abaana boona bandheemera, baaloba kujiira ku mateeka gange era baava ku biragiro byange, ebireetera omuntu okuba omulamu ng'abituukiriiza. Baayonoona n'olunaku lwange olwa Sabbato. Agho naayenda okubamaliraku ekiruyi kyange, mboolekeze obusungu bwange nga bali eyo mu nsi Misiri.

²² Aye neefuga, ekyo naaloba kukikola ku lw'eriina lyange, olwo lirobe kunhoomebwa mu maghanga ge baalimu, kuba ab'omu maghanga ago baabona nga ndi kubatoola mu nsi Misiri.

²³ Kale, nze n'okwiramu kabiri okwerayirira mwene nga bali eyo mu irungu, nti ndidha kubasansaaniza eyo mu maghanga, mbaidhuze eyo mu nsi enhingi.

²⁴ Neerayirira ntyo lwa kuba baava ku biragiro byange era baaloba kujiira ku mateeka gange. Baayonoona n'olunaku lwange olwa Sabbato, era baasinzanga ebitali nze Katonda ebya badhaadha baibwe.

²⁵ “Agho naabaleka bajiire ku mateeka ni ku biragiro, ebitaleetera muntu abijiiraku kuba mulamu naire.

²⁶ Naabaleka beeyonoona nga bagheereza eri emisambwa ebigheebwayo, era nga baghaayo y'emisambwa egyo abaana baibwe ababeri bookebwe mu muliro ng'emisengo. Ekyo nakikola nga nhenda mbabonereze era bamanhe nga ninze Musengwa Katonda.

²⁷ “Agho ni, iwe omuntu, yogera n'ab'eighanga Isiraeli, obakobe oti nze Musengwa Katonda ndi kubakoba ati: Eyo n'eyindi ku ngeri badhaadha baimwe dhe baanhoomangamu nze Musengwa Katonda, era ni balobanga okuba abeesigwa ye ndi.

²⁸ Bwe nabatuusa mu nsi nze mwene ye neerayirira okubagha, ng'olwo buli ghe baabonanga akasozi akagulumivu oba omuti ogw'amakaba amangi amazibirivu, ng'agho bagheeragho emisengo gyaibwe. Ebigheebwayo byaibwe bye baagheeranga mu bifo ebyo, n'obuwoowo bwe baaniokezangayo, era n'ebigheebwayo eby'okunhwa bye baafukangayo, byansungughazanga busungughaze.

²⁹ Naababuuza nti, ‘Kifo ki ekigulumivu eyo ye mujanga okusinziza?’ N'okuva ku olwo kyayetebwanga ‘Ekifo ekigulumivu eky'okusinzizaamu’ ni ye buli eno.

³⁰ Agho ni, kobera abantu ab'eighanga Isiraeli oti nze Musengwa Katonda ndi kubabuuza ati: Mwena muli kwenda kweyonoona ng'oti ni badhaadha baimwe, nga musinza ebitali nze Katonda ebyenhinhalwa bye baasinzanga?

³¹ Ni ye buli eno mukeeyonoona nga musinza ebitali nze Katonda, mwaghaayo ebigheebwayo byaimwe, era mwaghaayo n'abaana baimwe bookebwe mu muliro ng'emisengo. Memale ng'obwo era imwe abantu ab'eighanga Isiraeli mwidha mbu kuneebuuzaaku? Bwenebwene nze Musengwa Katonda ndayira nti nga bwendi omulamu, tija kubaganha kuneebuuzaaku.

³² Ni bwekiba ekyo kye mulowooza mbu mwenda mube ng'abamaghanga agandi n'abantu ab'omu nsi edhindi, musinze emiti n'amabaale, tikija kubaagho naire.

Katonda abonereza era yaasonigha

³³ “Nze Musengwa Katonda ndayira nti nga bwendi omulamu, mu busungu obubitirivu ndikozesa obuyinza bwange obungi n'amaani gange agataloodheka, naabafuga nga ninze kyabazinga waimwe.

³⁴ Mu busungu obubitirivu ndikozesa obuyinza bwange obungi n'amaani gange agataloodheka, naabatoolayo eyo mu maghanga, naabasolozaayo eyo mu nsi ye mwasansaanira.

³⁵ Ndibatwala mu irungu ery'abamaghanga agandi, naabasalirira eyo omusango nga tubonagana maiso ku maiso.

³⁶ Nga bwe nasalira badhaadha baimwe omusango mu irungu ery'ensi Misiri, mwena ntyo bwenja okubasalira.” Musengwa Katonda atyo bw'akoba.

³⁷ “Ndibafuga na mwigo naabaleetera okugondera endagaano yange.

³⁸ Ndibasunsulamu abo abadheemu, n'abo abakola ebibi ni bansungughaza. Ndibatoola mu nsi dhe baasengamu, aye tiribaganha kwirayo mu Isiraeli. Olwo mulimanha nga ninze Musengwa Katonda.”

³⁹ Musengwa Katonda era akoba ati: “Mperaano imwe Abaisiraeli, oba nga timwenda kumpulira, buli muntu aje agheereze ebisinzibwa bye ebitali nze Katonda. Aye mbalabula obutairayo kwonoona liina lyange eitukuvu, eno nga mumpa ebigheebwayo ate ere nga bwemusinza ebitali nze Katonda.

⁴⁰ “Mu kifo eky'okusinza ebyo, mwenamwena mulisinzanga nze Musengwa Katonda waimwe, ku lusozi lwange olutukuvu, olusozi oluleeyi olw'omu nsi Isiraeli. Eyo ye ndibasangaalira, era naasiima ebirabo byaimwe ebisinga kuba birungi, ghalala n'ebigheebwayo byaimwe ebitukuvu.

⁴¹ Bwendimala okubatoolayo eyo mu maghanga, ni mbasolozaayo eyo mu nsi ye mwasansaanira, ndisiima emisengo gyaimwe egyokebwa, era mulirangirira eri amaghanga nga bwendi omutukuvu.

⁴² Bwe ndibatuusa mu nsi Isiraeli, ensi ye nalayira okugha badhaadha baimwe, olwo mulimanha nga ninze Musengwa Katonda.

⁴³ Nga muli eyo muliidhukira emize gyaimwe n'ebikolwa byaimwe byonabyona bye mweyonoona nabyo. Olwo mwenenia era mwawulira n'enaku olw'ebibi byaimwe byonabyona bye mwakola.

⁴⁴ Imwe abantu b'eighanga Isiraeli, ku lw'eriina lyange bwe ndibabisa obukalamu mu kifo eky'okubabisa obubi nga njiira ku bikolwa byaimwe ebikyamu ni ku mpisa dhaimwe embi, olwo mulimanha nga ninze Musengwa Katonda.”

Omuliro ku luuyi olw'omukono omusaadha olw'e buvandhuba

⁴⁵ Agho kabiri Musengwa Katonda yankoba ati:

⁴⁶ “Iwe omuntu, amaiso go galingirize ku luuyi olw'omukono omusaadha olw'e buvandhuba. Olange ng'ovumirira ekiketezo ekyo ekikalukalu, era ng'ovumirira n'ekibira ekiri mu kiketezo ekyo.

⁴⁷ Koba ekibira ekyo ekiri mu kiketezo ekikalukalu ekyo, kiwulirise nze Musengwa Katonda bye ndikukoba nti: Bona eno, ndikukunaaniaku omuliro gwayokya buli muti gwonagwona ogukulimu, ka gube omubisi oba omukalu. Omuliro gulibbeibbera era tighalibaagho muntu asobola kuguzikiza. Gulyokerera buli muntu, okuva ku luuyi olw'omukono omusaadha olw'e buvandhuba okutuuka ku luuyi olw'omugooda olw'e buvandhuba.

⁴⁸ Abantu boonaboona balibona nga nze Musengwa Katonda mwene, ninze nkunaaniza omuliro ogwo, era tighalibaagho asobola kuguzikiza.”

⁴⁹ Aye nze naakoba nti: “Aa, Musengwa Katonda, abantu bali kundhogeraku bati nze buli kiseera ndhogera mu nfumo.”