Ezekieli 11 - Baibuli Ekibono kya Katonda 2014

Ekibuga Yerusalemu bakisalira omusango okukisinga

¹ Agho omwoyo gwa Katonda gwambeeda gwantwala ku mulyango ogw'eisinzizo lya Musengwa Katonda ogulingiriire ku luuyi olw'e buvandhuba. Okuja okulinga nti nga mbona abasaadha abiri na bataanu nga bali agho gha mulyango. Nga mu abo mulimu ni Yaazania mutabane wa Azzuri, ni Pelatia mutabane wa Benaia, bombi abaali bakulembeze b'abantu.

² Katonda yankoba ati: “Iwe omuntu, abo n'abantu abayiiya okukola ebibi era abagha abantu ab'omu kibuga kino amagezi amabi,

³ nga bakoba bati, ‘Ekiseera eky'okuzimbiramu amayumba kinaatera okutuuka.’ Era bati, ‘Ekibuga kino n'ensaka efumba, ate ife niife emamba.’

⁴ Kale ni, iwe omuntu, langirira obavumirire.”

⁵ Agho omwoyo gwa Musengwa Katonda gwandhikaku, Musengwa Katonda yankoba ati: “Yogera oti Musengwa Katonda akoba ati imwe abantu Abaisiraeli, nze ndidhi bukalamu bye mulowooza.

⁶ Mweyongeire inho okuja nga mwita abantu mu kibuga kino, mwaidhuza enguudo dhaakyo emirambo.

⁷ “Kale nze Musengwa Katonda kyenva nkoba nti ekibuga kino n'ensaka, era abantu be mutirimbula ni mubaleka omwo nga bagwire, n'emamba. Aye imwe ndibabinga naabafulumya mu kibuga kino.

⁸ Waire nga mutya okwitibwa empiima, ndireeta abantu abali n'empiima baabalumba.

⁹ Ndibatoola mu kibuga kino, naabata mu ngalo edh'abagwira, babaite. Ekyo n'ekibonerezo kyaimwe kye nabasalira.

¹⁰ Ndibabonereza yoonayoona ye muliba mu Isiraeli, naabaleetera okwitibwa mu ntalo. Memale olwo mwamanha nga ninze Musengwa Katonda.

¹¹ Ekibuga kino tikiribakuuma ng'oti n'ensaka bw'ekuuma emamba egirimu. Ndibabonereza yoonayoona ye muliba mu Isiraeli.

¹² Olwo muliimanha nga ninze Musengwa Katonda, kuba timwajiira ku mateeka gange waire okukola ng'ebiragiro byange bwe bikoba. Aye mwajiira bwa ku mateeka ga nsi edhibaliiraine.”

¹³ Nali nkaalangirira ebyo, Pelatia mutabane wa Benaia yagwa ghansi yaafa. Agho naakuba amakiryaivu era naakutama n'ekyeni kyatuuka ku itaka. Naaleekaana nti: “Aa, Musengwa Katonda, obwo bwenebwene oja kumaliragho irala buli muntu eyali awoniegho mu Isiraeli?”

Katonda asuubiza abali mu bunhage

¹⁴ Agho Musengwa Katonda yankoba ati:

¹⁵ “Iwe omuntu, abatyamye b'omu Yerusalemu bakwogeraku iwe ni Baisiraeli baino abali mu bunhage, nga bakoba bati, ‘Abo abaatwalibwa mu bunhage baviire inho ku Musengwa Katonda. Era buti Musengwa Katonda oyo yatugha ensi eno ebe yaife ku bwaife.’

¹⁶ “Kale kobera abo bwe muli mu bunhage, oti nze Musengwa Katonda nkoba nti waire nga nabatoola mu nsi yaibwe, naabasindika mu nsi edh'eghala era naabasansaaniza mu maghanga kamaala, aye ndidha kubanga ghalala nabo eyo mu nsi dhe balimu okumala ekiseera.

¹⁷ “Kale bakobere oti nze Musengwa Katonda nkoba nti, Ndibatoolayo eyo mu maghanga, naabasolozaayo eyo mu nsi ye nabasansaaniza, naabairiza ensi yaibwe Isiraeli.

¹⁸ Era bwe baliira, balitoolagho ebintu byonabyona ebibi ebyenhinhalwa.

¹⁹ Ndibagha omwoyo omuyaaka n'endowooza empyaka. Naabatoolamu omwoyo omukalangafu oguli ng'oti ibaale, naabataamu omwoyo omugonvu omuwulize.

²⁰ Baajiiranga ku mateeka gange era baagemanga bye nkoba. Olwo baabanga bantu bange, nze naabanga Katonda waibwe.

²¹ Aye abo abamaliire omwoyo gwaibwe ku kusinza ebintu ebibi ebyenhinhalwa, ndibeesasulizaaku olw'ebikolwa byaibwe. Nze Musengwa Katonda ninze nkobye.”

Ekitiisa kya Katonda kiva mu Yerusalemu

²² Agho bikerubi byayandhuluza amaghagha gaabyo byaguluka. Byaja nga n'enkede dhoona dhiri kujiira ghalala nabyo, era nga n'okumesunkana okw'ekitiisa kya Katonda wa Isiraeli kuli ghaigulu ghaabyo.

²³ Ekitiisa kya Musengwa Katonda kyasituka kyava ghagati mu kibuga, kyaja kyaba ku lusozi olwali ku luuyi olw'e buvandhuba olw'ekibuga ekyo.

²⁴ Agho omwoyo gwa Katonda gwambeeda nga ndi mu kubonekerwa okwo, gwandhizaayo y'abaali mu bunhage e Babilonia. Olwo bye nabona mu kubonekerwa byakoma agho.

²⁵ Naakobera abaali mu bunhage ebintu byonabyona Musengwa Katonda bye yandholeka.