Amosi 3 - Baibuli Ekibono kya Katonda 2014

¹ Imwe Abaisiraeli abantu Musengwa Katonda be yatoola mu Misiri, muwulire Musengwa Katonda oyo by'aboogeireku.

² Akoba ati: “Mu maghanga goonagoona agali ku nsi, eryaimwe lyonka lye nalondamu. Ekyo n'ekireetera okwonoona kwaimwe okuba okubi einho, era zeena kyenva ni nteekwa okubabonereza olw'okwonoona kwaimwe okwo.”

Omulimo ogw'omulanzi

³ Era Amosi yaakoba ati, abantu ababiri basobola okutambulira aghalala nga tibaisainia?

⁴ Empologoma ewologomera mu kibira nga ghazira ky'ezize? Empologoma ento evuumira mu mpuku yaayo nga ghazira ky'egemiisa?

⁵ Enhonhi egwa ku mutego nga tibagiteze na kya kulya? Omutego gumasuka nga ghazira kigukonseeku?

⁶ Eigwala eriraalika olutalo, lifuuyibwa mu kibuga abantu baaloba kutya? Akabi kagwa ku kibuga nga Musengwa Katonda ti n'akasindiike?

⁷ Mu butuufu bwene, ghazira Musengwa Katonda ky'akola mu kyama nga takyoleike bagheereza be abalanzi.

⁸ Empologoma bw'ewologoma, naani asobola obutatya? Musengwa Katonda bw'ayogera, naani aghanga okuloba okulangirira obukwenda bwe?

Musengwa Katonda azikiriza ekibuga Samaria

⁹ Mulangirire eri ababa mu bisaagaati mu Ashidodi n'eri ababa mu bisaagaati mu nsi Misiri. Mubakobe muti: “Mwesololeze ku nsozi dha Samaria mubone ebikolwa eby'obukambwe ebitiisa, n'eby'okutuntuzibwa ebikolebwa mu Samaria.”

¹⁰ Musengwa Katonda akoba ati: “Abantu abo tibaidhi kukolera ku butuufu, okutoolaku okwidhuza endhu dhaibwe ebintu ebinhage n'ebiibe.

¹¹ Kyova abazigu baliidha baazingiza ensi yaibwe, baamenhamenha ebimante byaibwe ebigumu era baanhaga eby'omu ndhu dhaibwe.”

¹² Musengwa Katonda akoba ati: “Ng'omwayi w'entaama bw'awoniagho amagulu abiri obubiri, oba akatundu obutundu aka kutu, n'Abaisiraeli ababa mu Samaria boona batyo bwe baliwonezebwa n'ensonda ey'omwito, n'akatundu ak'obuliri.”

¹³ Musengwa Katonda afuga amagye akoba ati: “Muwulire bino era mulabule baidhukulu ba Yakobo:

¹⁴ Ku lunaku lwe ndibonerezaaku Abaisiraeli olw'ebibi byaibwe, nja kuzikiriza alutaari edh'e Betheli. N'ebintu ebiri ng'oti mayiga ga nsolo ebiba ku nsonda dhaadho nja kubimenhaku mbisuule ku itaka.

¹⁵ Nja kuzikiriza endhu dhe babaamu mu biseera eby'ekiinhogogo, ni dhe babaamu mu biseera eby'akasana. Endhu dhe baazimba n'amasanka dhija kusaanagho, n'endhu enkologho dhija kuzikirizibwa.”