Amateeka Agokubiri 7 - Baibuli Ekibono kya Katonda 2014

Eighanga lya Musengwa Katonda lye yalonda

¹ Musa yaakoba Abaisiraeli ati: “Musengwa Katonda waimwe aidha kubaingiza mu nsi ye muja okutwala okuba obutaka bwaimwe. Amaghanga musanvu agasinga eryaimwe obukologho n'amaani, buti n'agaba mu nsi eyo, era ni gano: Abahitti, Abagirigashi, Abamori, Abakanaani, Abaperizzi, Abahivi, n'Abayebusi. Aye bwe munaabanga nga muli kumpi okutuukayo, Musengwa Katonda waimwe oyo aidha kugabingangamu goonagoona.

² Musengwa Katonda waimwe bw'alita abantu abo mu ngalo dhaimwe ni mu baghangula, muteekwa okubasaaniagho boonaboona. Mutakolanga nabo ndagaano waire ndala eti, era mutabagemerwanga kivunika naire.

³ Mutafumbirwagananga nabo, nga mughaayo baghala baimwe okubayira batabane baibwe, oba okutwala baghala baibwe okubayira batabane baimwe.

⁴ Bwe mulikikola, olwo abantu abo baliba nga baghanga okukyusa abaana baimwe baabatoola ku Musengwa Katonda, baasinza bakatonda abandi. Olwo obusungu bwa Musengwa Katonda bulibatumbukiraku ng'oti muliro, yaabazikiriza mu kaseera buseera.

⁵ Agho ni mubabisenga muti: mumenhemenhenga alutaari dhaibwe, mutemetemenga empango dha bakatonda baibwe edh'amabaale, mwasaageyasaagenga ebifaananie ebibaadhe eby'omusambwa gwaibwe omukazi Ashera, era mwokyenga n'omuliro ebintu byaibwe bye basinza ebitali Katonda.

⁶ Kuba muli ighanga lya Musengwa Katonda waimwe. Yabalondamu okuba eighanga lye erirye ku bubwe mu maghanga goonagoona agali ku nsi.

⁷ “Musengwa Katonda yabagonza era yaabalondamu, ti lwa kuba nga mwali kamaala inho okusinga amaghanga agandi mu butuufu mwali eighanga erisingayo obutono mu maghanga goonagoona.

⁸ Aye olw'okuba Musengwa Katonda yabagonza, era yaayenda okukuuma ekisuubizo, kye yasuubiza badhaadha baimwe, kyeyava n'akozesa amaani ge agataloodheka okubanunula. Yaabatoola mu ngalo dha kyabazinga ow'e Misiri, ye mwakolanga obwiru.

⁹ Agho ni, mukimanhe nga Musengwa Katonda waimwe ni Katonda yenka era nga mwesigwa. Akuuma endagaano n'abantu ab'ense n'ense abamugonza era ni bakuuma ebiragiro bye, era abagonza obutalekera.

¹⁰ Aye abamukyagha alibeesasuuza ng'abazikiriza. Talirwagho naire kubonereza muntu amukyagha.

¹¹ Kale ni mwegendereze okutuukirizanga amateeka, n'ebiragiro, n'okulamba, bye mbaghaire olwaleero.”

Enkabi edhiva mu buwulize

¹² Musa yaayongera okukoba Abaisiraeli ati: “Bwe munaajiiranga ku biragiro bino, ni mu bigema era ni mu bituukiriza, Musengwa Katonda waimwe aidha kukuumanga endagaano, ye yakola n'imwe. Era aidha kubagonzanga obutalekera nga bweyasuubiza badhaadha baimwe.

¹³ Aidha kubagonzanga, abaghe enkabi mweyongerenga okwala nga muzaala abaana kamaala. Aidha kughanga eitaka lyaimwe enkabi mufunenga emere, n'omwenge ogw'emizabbibu, n'omuzigo ogw'ebibala eby'emiti emyoliva. Aidha kuleeteranga ebyayo byaimwe okuzaalagana: ente, embuzi, n'entaama. Ebirungi ebyo byonabyona aidhanga kubibagheera mu nsi ye yasuubiza badhaadha baimwe okugibagha imwe.

¹⁴ Musengwa Katonda aidha kubaghanga enkabi okusinga amaghanga agandi goonagoona. Mu imwe timuubengamu musaadha atazaala, oba mukazi mugumba, oba waire mu byayo byaimwe okubaamu ekitazaala.

¹⁵ Musengwa Katonda aidha kubakugiranga endwaire dhoonadhoona dhirobe kubagema. Taidha kubasindikiranga ndwaire mbi dhe mwabona nga muli e Misiri. Aye aidha kudhisindikiranga abo ababakyagha.

¹⁶ Muzikirizenga amaghanga goonagoona Musengwa Katonda waimwe g'anaabatanga mu ngalo, era mutagagemerwanga kivunika. Mutasinzanga bakatonda baago, kuba ekyo kisobola okubafuukira imwe omutego.

¹⁷ “Mughanga okwebuuza mule muti, ‘Abantu bano batusinga obungi! Tughanga tutya okubabingamu?’

¹⁸ Aye mutabatyanga. Mwidhukirenga Musengwa Katonda waimwe kye yakola kyabazinga w'e Misiri, ni ku bantu b'e Misiri boonaboona.

¹⁹ Mwidhukirenga ebibamba ebitiisa bye mweboneraku beene n'amaiso gaimwe, n'ebyewuunhio, n'ebyewuninkiriza, n'amaani agataloodheka, Musengwa Katonda waimwe bye yakozesa okubanunulayo. Atyo Musengwa Katonda waimwe bw'aidha okukola ni ku bantu abo boonaboona be muli kutya.

²⁰ Alibaleetamu okutya n'okudhugumira, okutuusa lw'alizikiriza abo abaliba nga bakaasigairegho nga beegisiisa.

²¹ Kale ni mutabatyanga, kuba Musengwa Katonda waimwe aba mu imwe, era oyo n'omukologho ali n'okutiibwa.

²² Bwe munaabanga nga muli kumpi okutuuka mu kiketezo, Musengwa Katonda aidha kubingangamu abo abamaghanga agandi, batonobatono. Timulisobola kubamalamu mukuzi mulala, olwo ensolo edh'omu nsiko dhirobe kweyongera inho obungi na kubabitiriraku.

²³ Musengwa Katonda waimwe alita abazigu baimwe mu ngalo dhaimwe era yaabaleetamu okutya n'okudhugumira, okutuusa lwe balizikirizibwa.

²⁴ Alita bakyabazinga baibwe mu ngalo dhaimwe, mwabazikiriza beerabirwa ku nsi. Tighaliba muntu waire omulala alisobola kubalobera mulibasaaniagho boonaboona.

²⁵ Mwokyenga n'omuliro ebifaananie ebibaadhe eby'emisambwa gyaibwe. Muteegwanizanga feeza waire zaabu abiriku, era mutamutwalanga, olwo alobe kubafuukira imwe mutego, kuba okusinza ebitali Katonda kiba ekyenhinhalwa eri Musengwa Katonda.

²⁶ Mutaleetanga waire ekirala ku bisinzibwa ebyo ebitali Katonda, mu ndhu dhaimwe, olwo mulobe kwereetaku kikolimo kya Musengwa Katonda ekibiriku. Ebisinzibwa ebitali Katonda ebyo mubikyayirenga irala era mubyesambenga, kuba Musengwa Katonda yabikolimira. ”