Amateeka Agokubiri 6 - Baibuli Ekibono kya Katonda 2014

Ekiragiro ekisinga obukulu

¹ Agho Musa yaakoba Abaisiraeli ati: “Gano n'amateeka, n'ebiragiro, n'okulamba, Musengwa Katonda waimwe bye yandagira okubeegeresa. Mubituukirizenga mu nsi ye muli kumpi okwingiramu okutwala, ere nga musomoike omwiga Yorudani.

² Imwe n'abaana baimwe era n'abaidhukulu baimwe, mutenga mu Musengwa Katonda waimwe ekitiisa enaku edh'obulamu bwaimwe dhoonadhoona. Mutuukirizenga amateeka ge goonagoona n'ebiragiro bye, bye ndi kubagha, mughange okughangaalira mu nsi eyo.

³ Imwe Abaisiraeli muwulire: mwegendereze okutuukirizanga ebyo, musobole okubanga obukalamu era mweyongerenga okuba abangi einho era ab'amaani, nga muli mu nsi eyo engimu era erimu ebirungi kamaala, nga Musengwa Katonda, Katonda wa badhaadha baimwe bweyasuubiza.

⁴ “Imwe Abaisiraeli muwulire: Musengwa Katonda, era Musengwa Katonda oyo yenka, ni Katonda waife.

⁵ Mugonzenga Musengwa Katonda, oyo Katonda waimwe, n'omutima gwaimwe gwonagwona, n'amaani gaimwe goonagoona.

⁶ Muteerabirangaku waire ekirala ku biragiro bino bye ndi kubagha olwaleero.

⁷ Mubyegeresenga abaana baimwe. Era mubyogerengaku nga muli ghaka oba nga muli mu ngira mutambula, nga mulambaire oba nga musitwikegho.

⁸ Mubyesibenga ku mikono gyaimwe, era mubyetimbenga mu byeni byaimwe ng'akamanhiso.

⁹ Mubighandiikenga ku myango egy'emiryango gy'endhu dhaimwe, ni ku miryango gy'ebibuga byaimwe.”

Okulabula Abaisiraeli balobenga kudheema

¹⁰ “Nga Musengwa Katonda waimwe bweyasuubiza badhaadha baimwe, Aburahamu, Isaaka ni Yakobo, aidha kubagha imwe ensi erimu ebibuga ebikologho era ebirungi bye mutaazimba.

¹¹ Endhu dhaamu nga dhiidhwire ebintu ebirungi bye mutaataamu, era nga mulimu n'ensulo ensime dhe mutaasima, n'amasamba ag'emizabbibu n'ag'emiti emyoliva ge mutaasimba. Aye bwe munaamalanga okulya ni mwiguta nga muli mu nsi eyo,

¹² mwegenderezenga mulobe kwerabiranga Musengwa Katonda eyabatoola e Misiri, ye mwali nga mukola obwiru.

¹³ Mutyenga Musengwa Katonda waimwe, mumusinzenga, era eriina lye lyonka lye mube mulayirenga.

¹⁴ Mutasinzanga waire omulala ku bakatonda amaghanga agandi be gasinza.

¹⁵ Bwe mulisinza bakatonda abandi, obusungu bwa Musengwa Katonda bulibatumbukiraku ng'oti muliro bwabasaaniagho, kuba Musengwa Katonda waimwe oyo aba mu imwe, enkikidi emugema ku lw'abantu be.

¹⁶ “Mutalebanga Musengwa Katonda waimwe, nga bwe mwamuleba e Massa.

¹⁷ Mwegenderezenga okukuuma ebiragiro n'amateeka n'okulamba, Musengwa Katonda waimwe bye yabagha.

¹⁸ Mukolenga ebyo Musengwa Katonda by'abona nga bituufu era nga birungi. Olwo musobole okuba obukalamu, n'okwingira okutwala ensi enungi, Musengwa Katonda ye yasuubiza badhaadha baimwe.

¹⁹ Abazigu baimwe boonaboona be mulyagaana mu nsi eyo, mulibabingamu nga Musengwa Katonda bweyasuubiza.

²⁰ “Ye bwidha, abaana baimwe baidhanga kubabuuza imwe bati, ‘Amateeka n'ebiragiro n'okulamba, Musengwa Katonda waife bye yatuteeragho bitegeeza ki?’

²¹ Olwo munaabairangamu muti, ‘Twali bairu ba kyabazinga w'e Misiri, aye Musengwa Katonda yaatutoolayo ng'akozesa amaani ge agataloodheka.

²² Tweboneraku beene n'amaiso gaife ebyewuunhio n'ebyewuninkiriza eby'amaani era ebitiisa, Musengwa Katonda oyo bye yakola ku Misiri, ni ku kyabazinga waayo, ni ku bakungu ba kyabazinga oyo boonaboona.

²³ Ife yaatutoolayo yaatuleeta ghano, yaatugha ensi eno ye yasuubiza badhaadha baife.

²⁴ Musengwa Katonda waife oyo yaatulagira okutuukirizanga amateeka ago goonagoona n'okumutyanga, olwo tughange okubanga obukalamu buliidho, era atukuumenga nga tuli balamu, nga bwe tuli mpegaano.

²⁵ Ife kye tugwaine okukola, n'okwegendereza tutuukirizenga byonabyona Musengwa Katonda waife bye yatulagira.’ ”