Amateeka Agokubiri 5 - Baibuli Ekibono kya Katonda 2014

Ebiragiro Eikumi

¹ Agho Musa yaayeta Abaisiraeli boonaboona, yaabakoba ati: “Imwe Abaisiraeli, muwulire amateeka n'ebiragiro bye ndi kubagha olwaleero. Mubyege era mwegendereze okubituukirizanga.

² Musengwa Katonda waife yakola n'ife endagaano ku lusozi Sinai.

³ Endagaano eyo tiyagikola na badhaadha baife bonka, aye yagikola n'ife twena abalamu, abali ghano mpegaano.

⁴ Musengwa Katonda yayogera n'imwe maiso ku maiso eyo ku lusozi, ng'ali mu muliro ghagati.

⁵ Mu biseera ebyo nze nayemerera ghagati waimwe ni Musengwa Katonda, okubakobera bye yali ali kubakoba. Kuba mwatya omuliro, mwaloba kuniina lusozi. Musengwa Katonda yaakoba ati:

⁶ ‘Ninze Musengwa Katonda, oyo Katonda waimwe eyabatoola mu Misiri, ye mwali nga mukola obwiru.

⁷ Mutasinzanga Katonda wundi okutoolaku nze.

⁸ “ ‘Muteekoleranga kibaadhe oba kiwumbe ekifaanana ekintu kyonakyona ekiri ghaigulu ku igulu, oba ghansi ku nsi, oba waire ekiri mu maadhi agali ghansi agh'ensi.

⁹ Ebintu ebyo mutabisinzanga, kuba nze Musengwa Katonda waimwe ndi wa nkikidi ku bantu bange. Abo abankyagha mbabonereza, era naabonereza n'abaana baibwe n'abaidhukulu, okutuukira irala ku luse olwokusatu n'olwokuna.

¹⁰ Aye ndholeka okugonza okutakoma eri abantu enkumi n'enkumi abangonza, ni bagondera ebiragiro byange.

¹¹ “ ‘Mutakozesanga liina lyange nze Musengwa Katonda mu bya matamatama, kuba nze Musengwa Katonda waimwe tija kuloba kubonereza oyo yeenayeena akozesa eriina lyange obubi.

¹² “ ‘Mukuumenga olunaku lwa Sabbato nga lwange, nga nze Musengwa Katonda waimwe bwe nabalagira.

¹³ Muli n'enaku mukaaga edh'okukolerangaku emirimo gyaimwe gyonagyona.

¹⁴ Aye olunaku olwomusanvu, lwa Sabbato yange nze Musengwa Katonda waimwe. Olwo mutalukolerangaku mulimo gwonagwona waire imwe beene, waire batabane baimwe, waire baghala baimwe, waire abairu baimwe abasaadha oba abakazi, waire ensolo dhaimwe, waire abasenze be musuza. Olwo abairu baimwe abasaadha n'abakazi, boona baghange okuwuumulanga ng'oti niimwe.

¹⁵ Mwidhukirenga nga mwali bairu mu Misiri, nze Musengwa Katonda waimwe naabatoolayo, nga nkozesa amaani n'obuyinza bwange. Kyenva ni, mbalagira okukuumanga olunaku lwa Sabbato.

¹⁶ “ ‘Mughenga balata baimwe ni bainhaimwe ekitiibwa, nga nze Musengwa Katonda waimwe bwe mbalagira, olwo mughange okubanga obukalamu era mughangaalire mu nsi ye ndi kubagha.

¹⁷ “ ‘Mutatemulanga.

¹⁸ “ ‘Mutayendanga.

¹⁹ “ ‘Mutaibanga.

²⁰ “ ‘Mutaghanga ku bantu budhulizi bwa bulimba.

²¹ “ ‘Muteegwanizanga baka beene. Muteegwanizanga ndhu dha bantu bandi, waire enimiro dhaibwe, waire abairu baibwe abasaadha oba abakazi, waire ente dhaibwe, oba endogoyi, oba ekintu ekindi kyonakyona eky'omuntu owundi.”

²² “Ago n'amateeka Musengwa Katonda ge yabagha mwenamwena nga mwesoloiza ku lusozi. Yagabagha ng'ayogera mu mamiro ag'amaani, ng'ali mu muliro ghagati mu kire ekigemye enzikiiza, era tiyayongeraku bindi. Yagaghandiika ku bibaadho bibiri eby'amabaale, yaabimpa.”

Abantu batya inho

²³ Musa yaayongera okukoba ati: “Bwe mwawulira amamiro nga gava mu nzikiiza, olusozi nga luli kwaka omuliro, mwaseeta ghe ndi, nga muli n'abakulembeze baimwe, n'abakulu b'ebika byaimwe boonaboona.

²⁴ Mwakoba muti, ‘Musengwa Katonda waife atwoleike ekitiisa kye n'obukulu bwe. Tuwuliire amamiro ge nga gaviira mu muliro ghagati. Olwaleero tuboine nga Katonda ayogera n'omuntu, aye omuntu yaasigala ng'akaali mulamu.

²⁵ Aye mpegaano lwaki twereeterezaaku okufa? Omuliro guno ogw'amaani gwidha kutusaaniagho. Bwe tunairamu okuwulira amamiro ga Musengwa Katonda waife, twidha kufa.

²⁶ Naani mu bantu boonaboona, eyaali awuliireku amamiro ga Katonda omulamu ng'ali kwogera mu muliro ghagati, nga ife bwe tuwuliire, aye omuntu oyo n'asigala ng'akaali mulamu?

²⁷ Musa, niiwe obe oje, owulire Musengwa Katonda waife by'anaakoba. Memale oire otukobere byonabyona by'anaaba akukobye. Twidha kubiwulirisa, tubituukirize.’

²⁸ “Musengwa Katonda bweyawulira ebibono bye mwayogera ninze, yankoba ati, ‘Mpuliire ebibono abantu bano bye bakukobye. Byonabyona bye boogeire bituufu.

²⁹ Kale ngoli baba n'omwoyo ng'oti n'ogwo buliidho, ni bantya era ni bakuumanga ebiragiro byange byonabyona! Olwo beene n'abaidhukulu baibwe bandibairenga bukalamu enaku dhoonadhoona.

³⁰ Ja, obakobe baireyo eka.

³¹ Aye iwe oire ghano ghe ndi, nkukobere amateeka goonagoona n'ebiragiro byonabyona by'onaabeegeresa, babituukirizenga mu nsi ye ndi kubagha okuba eyaibwe.’ ”

³² Musa yaayongera okukoba ati: “Mwegenderezenga nga mukola nga Musengwa Katonda waimwe bweyabalagira, aghazira kudaaliimira eno oba ere.

³³ Mujiirenga ku ebyo byonabyona Musengwa Katonda waimwe bye yabalagira, mughange okuba obukalamu, mughangaalire mu nsi ye muja okutwala.”