Amateeka Agokubiri 4 - Baibuli Ekibono kya Katonda 2014

Musa asikirira Abaisiraeli okubanga abawulize

¹ Musa yaayongera okukoba Abaisiraeli ati: “Agho ni muwulirenga amateeka n'ebiragiro bye ndi kubeegeresa mubituukirizenga, olwo mughange okuba abalamu, mwingire mu nsi Musengwa Katonda, Katonda wa badhaadha baimwe y'ali kubagha, era mugitwale.

² Mutayongeranga kintu kyonakyona ku bye ndi kubalagira, waire okubikendeezaaku. Mugemenga ebiragiro bya Musengwa Katonda waimwe bye ndi kubagha.

³ Imwe beene mweboneraku n'agaimwe, Musengwa Katonda waimwe bye yakolera e Peori, ebigema ku Baali. Nga bweyazikiriza mu imwe abo boonaboona abaali basinza Baali oyo.

⁴ Aye imwe abaagumira ku Musengwa Katonda waimwe, mukaali balamu ni leero.

⁵ “Nze mbeegereisa amateeka n'ebiragiro nga Musengwa Katonda wange bweyandagira. Mubigemenga, nga muli mu nsi ye muja okwingiramu okutwala.

⁶ Mubikuumenga era mubituukirizenga, kuba ekyo n'ekinaayolekanga abantu abamaghanga agandi nga bwe muli n'amagezi n'okutegeera. Bwe banaawuliranga amateeka ago goonagoona, baidha kukobanga bati, ‘Bwenebwene eighanga lino eikologho, lya bantu bagezi era abategeevu!’

⁷ “Agho Musa yaayongera okukoba ati: ‘Ezirayo ighanga lindi, ni bweriba eikologho litya, liri na katonda aliri okumpi einho, ng'oti ni Musengwa Katonda waife bw'atuba okumpi nga tumusabye okutubeera.

⁸ Era ezirayo ighanga lindi, ni bweriba eikologho litya, liri na mateeka ga butuufu ng'oti n'amateeka gano goonagoona ge ndi kubateeragho olwaleero.

⁹ “Aye mwegenderezenga era mwekuumenga, mulobe kwerabiranga mu bulamu bwaimwe bwonabwona, ebyo imwe beene bye mweboneraku n'agaimwe. Mukoberenga abaana n'abaidhukulu

¹⁰ olunaku lwe mwayemerera mu maiso ga Musengwa Katonda waimwe ku lusozi Sinai. Ku olwo Musengwa Katonda lwe yankoba ati, ‘Nsololeza abantu baidhe. Nhenda bawulire bye nja okubakoba, beege okuntyanga n'okumpuliranga enaku dhoonadhoona edh'obulamu bwaibwe, era beegerese n'abaana baibwe okukolanga batyo boona.’

¹¹ “Mukoberenga abaana baimwe nga bwe mwaseeta ni mwemerera ghansi gh'olusozi olwali lughembeibwa ebire ebigemu eby'omwosi omwirugavu, ni lwaka omuliro ni gweruupiika okutuuka ni ku igulu.

¹² Mubakoberenga nga Musengwa Katonda bweyayogera n'imwe ng'ali mu muliro, ni muwulira amamiro obumiro gonka ng'ali kwogera, aye ni mutamubona nga bw'afaanana naire.

¹³ Yaabakobera endagaano ye, ye yabalagira okutuukiriza, ago nga n'amateeka eikumi. Era yaagaghandiika ku bibaadho bibiri eby'amabaale.

¹⁴ Musengwa Katonda yandagira mu biseera ebyo okubeegeresa amateeka n'ebiragiro, mubituukirizenga mu nsi ye muja okwingiramu okutwala.”

Abaisiraeli balabulwa obutasinzanga bitali Katonda

¹⁵ Musa yaayongera okukoba Abaisiraeli ati: “Ku lunaku Musengwa Katonda lwe yayogera n'imwe ng'ali mu muliro ku lusozi Sinai, timwamubona nga bw'afaanana naire. Kale ni mwegendereze inho,

¹⁶ mwekuume mulobe kwonoona nga mwekolera ekisinzibwa ekitali Katonda eky'ensambo yoonayoona, ekifaanana ng'oti musaadha oba mukazi,

¹⁷ oba ensolo yoonayoona ey'oku nsi, oba enhonhi ey'amaghagha eguluka,

¹⁸ oba ekintu kyonakyona ekyekululira ku itaka, oba ekyenhandha ekiba ghansi mu maadhi.

¹⁹ “Mulobenga kusendebwasendebwa kusinza na kugheereza ebyo bye mubona ku igulu: endhuba, omwezi, n'emuunienie. Ebyo Musengwa Katonda waimwe yabitaagho abantu abandi boonaboona abali ku nsi n'ababe babisinzenga.

²⁰ Aye imwe yabagemaku, yaabatoola e Misiri ye mwabanga ng'oti n'abali mu muliro ogw'amaani ogusaanuusa ekyuma ekigumu einho. Yaabafuulira irala abantu be nga bwe muli mpegaano.

²¹ Era Musengwa Katonda yansungughalira ku lwaimwe, yeefuugha nga bwe ntaja kusomoka mwiga Yorudani, era nga bwe ntaja kwingira mu nsi eyo engimu, Musengwa Katonda oyo Katonda waimwe y'ali kubagha okuba obutaka bwaimwe.

²² Nze nja kufiira mu nsi eno. Tiidha kusomoka mwiga Yorudani. Aye imwe mwidha kusomoka, muje mutwale ensi eyo engimu.

²³ Mwekuume, mulobenga kwerabira ndagaano Musengwa Katonda waimwe ye yakola n'imwe. Muteekoleranga kisinzibwa kitali Katonda eky'ensambo yoonayoona kye yabalobera

²⁴ kuba Musengwa Katonda waimwe ali ng'oti muliro oguzikiriza buli kiri mu ngira yaagwo, era enkikidi emugema ku lw'abantu be.

²⁵ “Ni bwe muliba nga mumaze entangama endeeyi mu nsi eyo, nga muzaire abaana era nga muli n'abaidhukulu, mutagezangaku kwonoona nga mwekolera ekisinzibwa ekitali Katonda eky'ensambo yoonayoona. Ekyo kibi mu maiso ga Musengwa Katonda waimwe, era kirimusungughaza.

²⁶ Ndayira olwaleero eri eigulu n'ensi, babe abadhulizi bange ababalumiriza, nti bwe muligeza ni mwekolera ebisinzibwa ebitali Katonda, mulizikirira mangu, mwasaanagho mu nsi ye muli kumpi okwingiramu okutwala, ere nga musomoike omwiga Yorudani. Timuligibaamu ntangama ndeeyi, aye mulizikirira mwasaanagho.

²⁷ Musengwa Katonda alibasansaaniza eyo mu maghanga agandi, era batono ku imwe abalisigala nga bakaali balamu.

²⁸ Eyo ye mulisinziza ebintu ebitali Katonda ebyakolebwa abantu obuntu mu miti ni mu mabaale ebitabona waire okuwulira, era ebitalya waire okuwunhiza.

²⁹ Aye nga muli eyo, mwidha kusabanga Musengwa Katonda waimwe. Era bwe munaamusabanga n'omutima gwaimwe gwonagwona era n'omwoyo gwaimwe gwonagwona, aidhanga kubawulira.

³⁰ Bwe munaabanga nga muli mu nnaku ng'ebyo byonabyona bibaidhiire, mu biseera eby'oluvainhuma muliira eri Musengwa Katonda waimwe, mwagondera by'abakoba

³¹ kuba Musengwa Katonda waimwe wa kivunika. Talibalekulira agho waire okubazikiriza, era talyerabira ndagaano ye yakola ni badhaadha baimwe.”

Isiraeli ng'eighanga eigonzi ery'endhawulo

³² Musa yaayongera okukoba Abaisiraeli ati: “Mwekebeedhe ebyaligho mu byanda eby'eira, okuviira irala einhuma ere, bukyanga Katonda atonda abantu ku nsi. Mwekebeedhe ensi yoonayoona. Ekintu ekikologho ng'oti ni kino kyali kibaireghooku, era ghaligho eyaali akiwuliireku?

³³ Ghalighooku abantu abaawuliraku amamiro ga Katonda nga gali kwogera mu muliro, aye ni basigala nga bakaali balamu, ng'oti niimwe?

³⁴ Oba ghalighooku katonda eyaali ageziizaaku okuja okutwala abantu ab'eighanga erindi, abafuule ababe ng'abatoola ghagati mu ighanga erindi, nga Musengwa Katonda waimwe bweyabakolera imwe mu Misiri? Yakozesa amaani ge agataloodheka, yaasindika ebibamba n'olutalo, yaakola ebyewuunhio n'ebyewuninkiriza, era yaaleetera ebintu ebitiisa einho okubaagho, nga mubona.

³⁵ Ebyo Musengwa Katonda yabibooleka, musobole okumanha nga mwene ni Katonda yenka, ezirayo wundi.

³⁶ Imwe yabaleetera okuwulira amamiro ge ng'ali mu igulu, asobole okubeegeresa okumuwuliranga. Ni ku nsi yabooleka omuliro gwe ogw'amaani, mwawulira bye yayogerera ghagati ghaagwo.

³⁷ Olw'okugonza badhaadha baimwe, yalonda imwe baidhukulu baibwe, era yaakozesa obuyinza bwe obungi, mwene yaabatoola mu Misiri.

³⁸ Era bwe mwalinga nga muli kumpi okutuuka aghantu, yajanga ng'abingagho abantu ab'amaghanga agasinga eryaimwe obukologho n'amaani. Yababinganga mu biketezo byaibwe, aingizeemu imwe era abibaghe bibe obutaka bwaimwe, nga bw'eri mpegaano.

³⁹ Kale ni mukimanhe olwaleero era mukikuume mu myoyo gyaimwe muti Musengwa Katonda, ni Katonda mu igulu ni mu nsi. Ezirayo wundi.

⁴⁰ Mukuumenga amateeka ge n'ebiragiro bye, bye ndi kubagha olwaleero, mughange okubanga obukalamu, imwe n'abaana baimwe abaliiragho, era mughangaalire mu nsi, Musengwa Katonda waimwe y'ali kubagha okubanga eyaimwe enaku dhoonadhoona.”

Ebibuga omuntu mw'asobola okulumukira

⁴¹ Agho Musa yaalondagho ebibuga bisatu e buvandhuba wa Yorudani,

⁴² omuntu mw'asobola okulumukira n'awona, bw'aba ng'aise omuntu y'aziraku nzigu, nga tagendereire. Omuntu oyo ng'aghanga okulumukira mu kindi ku bibuga ebyo, yaawonia obulamu bwe.

⁴³ Ab'ekika kya Reubeni baafuna Bezeri eky'oku museetwe mu irungu. Ab'ekika kya Gadi baafuna Ramothi eky'omu kiketezo ky'e Gileadi. Ate ab'ekika kya Manasse baafuna Golani eky'omu kiketezo ky'e Bashani.

Musa agha Abaisiraeli Amateeka ga Katonda

⁴⁴ Gano n'amateeka ga Katonda, Musa ge yagha Abaisiraeli.

⁴⁵ Kuno n'okulamba, n'amateeka, n'ebiragiro, Musa bye yakobera Abaisiraeli bwe baava mu Misiri.

⁴⁶ Yabibagheera mu kiiko ekiringiriire Bethi Peori, e buvandhuba wa Yorudani, mu nsi eyali eya kyabazinga Sihoni ow'Abamori, eyabanga mu Heshiboni. Musa n'Abaisiraeli baaghangula Sihoni oyo nga baviire mu Misiri.

⁴⁷ Baanhaga ensi ye, n'ensi eya kyabazinga owundi ow'Abamori eyayetebwanga Ogi, era eyabanga e Bashani e buvandhuba wa Yorudani.

⁴⁸ Ekiketezo ekyo kiva ku kibuga Aroeri, ekiri ku mbali kw'ekiiko ekirimu omwiga Arunoni, okutuuka ku lusozi Sirioni, olwo nga ni Herimoni.

⁴⁹ Era kyatwalizaamu ekiketezo kyonakyona eky'e buvandhuba w'omwiga Yorudani, okutuuka ku Nhandha Eyomuunhu, ghansi gh'olusozi Pisiga.