Amateeka Agokubiri 34 - Baibuli Ekibono kya Katonda 2014

Okufa kwa Musa

¹ Agho Musa yaava mu kiketezo eky'oku museetwe e Moabu, yaaniinaniina ku lusozi Nebo, entwiko ya Pisiga, olulingiriire Yeriko. Musengwa Katonda yaamwoleka ekiketezo kyonakyona okuva e Gileadi, okutuuka e Dani,

² n'ekiketezo kyonakyona ekya Nafutali, n'ekya Efuraimu ni Manasse, n'ekiketezo kyonakyona ekya Yuda, okutuuka e bugwandhuba ku Nhandha Eyaghagati.

³ Era yaamwoleka n'ekiketezo ekikalukalu eky'oku luuyi olw'omukono omusaadha olw'e buvandhuba wa Yuda, n'eky'oku museetwe oguli mu kiiko eky'e Yeriko, ekibuga eky'emiti eminaazi, okutuuka e Zoari.

⁴ Agho Musengwa Katonda yaakoba Musa ati: “Eyo n'ensi ye nasuubiza Aburahamu, ni Isaaka, ni Yakobo, nti ndigigha baidhukulu baibwe. Nkuganhie waagibonaku bubone, aye toidha kusomoka kujaayo.”

⁵ Agho Musa omugheereza wa Musengwa Katonda yaafiira eyo mu nsi Moabu, nga Musengwa Katonda bwe yakoba.

⁶ Musengwa Katonda yaamuziika e Moabu mu kiiko ekiringiriire ekibuga Peori. Aye n'okutuusa mpegaano, ghazira aidhi kifo kyene ghe yaziikibwa.

⁷ Musa yaja okufa ng'agheziiza emyaka kikumi n'abiri egy'obukulu. Aye yali ng'akaabona bukalamu, era ng'akaali wa maani.

⁸ Agho Abaisiraeli baalira Musa okumala enaku amakumi asatu, nga bali mu kiketezo eky'oku museetwe e Moabu, okutuusa ekiseera eky'okumulira bwe kyawaaku.

⁹ Yoshua mutabane wa Nuni yali ng'aidhwire amagezi, kuba Musa yali ng'amaze okumutaagho aire mu kifo kye. Kale ni Abaisiraeli baawuliranga Yoshua oyo, era baakolanga nga Musengwa Katonda bwe yalagira Musa.

¹⁰ Okuva ku olwo tighabangaghooku kabiri mulanzi mu Isiraeli ali ng'oti ni Musa, Musengwa Katonda ye yamanha n'ayogeranga naye maiso ku maiso.

¹¹ Ghazira mulanzi wundi eyakola ebyewuunhio n'ebyewuninkiriza, ng'oti n'ebyo Musengwa Katonda bye yatuma Musa okukola ku kyabazinga w'e Misiri, ni ku bakungu be, ni ku bantu b'ensi eyo boonaboona.

¹² Era ghazira mulanzi wundi eyakola eby'amaani ebyo n'ebitiisa einho ebyo byonabyona, nga Musa bwe yakola ng'Abaisiraeli boonaboona babona.