Amateeka Agokubiri 3 - Baibuli Ekibono kya Katonda 2014

Abaisiraeli baghangula kyabazinga Ogi

¹ Musa yaakoba Abaisiraeli ati: “Ebyo bwe byawa, twakyuka, twagema engira eja e Bashani. Kyabazinga w'e Bashani, ayetebwa Ogi, yaidha n'abantu be boonaboona okutulwanisa mu lutalo mu Edurei.

² Aye Musengwa Katonda yankoba ati, ‘Otamutya, kuba ndidha kumughaayo omughangule n'abantu be boonaboona, era onhage n'ensi ye yoonayoona. Oidha kumukola kye wakola kyabazinga w'Abamori, Sihoni, eyabanga mu Heshiboni.’

³ “Agho Musengwa Katonda waife yaatugha ni kyabazinga w'e Bashani oyo Ogi. Twamughangula era twamuzikiriza n'abantu be boonaboona, aghazira kulekayo waire omulala ati.

⁴ Twanhaga ebyali ebibuga bye byonabyona mu biseera ebyo. Ghazira kibuga waire ekirala kye tutaanhaga. Byonabyona aghalala byali ebibuga nkaaga. Ebibuga ebyo n'ebyali eby'omu kiketezo kyonakyona eky'e Arugobu, era n'ebyali obwakyabazinga bwa Ogi oyo mu Bashani.

⁵ Ebibuga ebyo byonabyona byali byezungulwirwa ebimante ebigumu ebigulumivu, era nga biriku endhigi edhiriku ebisiba eby'ekyuma munda. Ghaabaagho n'ebyalo kamaala ebitaaliku bimante bibyezungulwire, bye twanhaga.

⁶ Twazikiriza ebibuga byonabyona n'abantu boonaboona, abasaadha, n'abakazi, n'abaana abato, nga bwe twakola mu bibuga ebyali ebya kyabazinga w'e Heshiboni, Sihoni.

⁷ Aye twatwala ebyayo byonabyona ng'omunhago, aghalala n'ebintu bye twanhaga mu bibuga.

⁸ “Kale ni, mu biseera ebyo, twanhaga ensi dha bakyabazinga abo bombi Abamori abaabanga ere ng'osomoike Yorudani, okuva ku kiiko Arunoni okutuuka ku lusozi Herimoni.

⁹ Abasidoni nga beeta olusozi Herimoni olwo Sirioni, ate Abamori baalweta Seniri.

¹⁰ Twanhaga ekiketezo kyonakyona eky'obwakyabazinga bwa Ogi ow'e Bashani: ebibuga byonabyona eby'oku museetwe, n'ebiketezo byonabyona ebya Gileadi n'ebya Bashani, okutuukira irala e Saleka n'Edurei.”

¹¹ Kyabazinga ow'e Bashani oyo, Ogi, n'eyali akaasigairegho ku lulyo olw'Abarefa. Obuliri bwe nga bwa kyuma ekigumu einho. Bwali bugheza mita ina mu buleeyi, n'emita kumpi ibiri mu bugazi, ng'ojiira ku bipimo ebitongole abantu bye baapimisanga. Obuliri obwo bukaaliyo mu Rabba, ekibuga ky'Abamori.

Ebika by'Abaisiraeli ebyasenga e buvandhuba wa Yorudani

¹² Musa yaakoba Abaisiraeli ati: “Bwe twanhaga ensi eno mu biseera ebyo, nagabira Abareubeni n'Abagadi ekiketezo ekiva ku Aroeri, ekiri ku mugo gw'ekiiko Arunoni, n'ekitundu eky'ekiketezo eky'ensi ey'ensozi edhiri e Gileadi, n'ebibuga byamu.

¹³ Ekitundu eky'ekiketezo eky'e Gileadi ekyasigalagho, n'ekiketezo eky'e Bashani kyonakyona obwali obwakyabazinga Ogi bwe yafuganga, ekyo nga n'ekiketezo kyonakyona eky'e Arigobu, nabigabira ekitundu eky'ekika kya Manasse.” Bashani yoonayoona yali eyetebwa nsi ya Barefa.

¹⁴ Yairi ow'omu kika kya Manasse yatwala ekiketezo kyonakyona eky'e Arigobu ekyo nga ni Bashani. Ekiketezo ekyo nga kituukira irala ku nsalosalo ey'Abageshuri n'Abamaaka. Ebyalo ebyo byonabyona yaabituuma eriina lye, era bimanhiibwa ng'ebyalo bya Yairi n'okutuusa mpegaano.

¹⁵ “Ekiketezo eky'e Gileadi nakigabira ab'ekika kya Makiri mutabane wa Manasse.

¹⁶ Ate Abareubeni n'Abagadi, naabagabira ekiketezo okuva ku Gileadi okutuuka ku kiiko Arunoni, nga ghagati gh'ekiiko ekyo, n'aghali ensalosalo ku luuyi lw'omukono omugooda olw'e buvandhuba. Ate omwiga Yabboki nga n'ensalosalo n'Abammoni, ku luuyi olw'omukono omusaadha olw'e buvandhuba.

¹⁷ Mu bugwandhuba, ng'ekiketezo eky'ebika ebyo ebisatu kituuka ku mwiga Yorudani, okuva ku nhandha y'e Galilaaya ku luuyi lw'omukono omugooda olw'e buvandhuba. Olwo kyaserengeta ku Nhandha Eyomuunhu ku luuyi olw'omukono omusaadha olw'e buvandhuba, n'okutuuka ghansi gh'olusozi Pisiga mu buvandhuba.

¹⁸ “Agho naabalagira mu biseera ebyo nti, ‘Musengwa Katonda waimwe abaghaire ensi eno ebe yaimwe. Kale ni abalwani baimwe nga bagemye eby'okulwanisa baidha kwesookayo baganda baibwe Abaisiraeli.

¹⁹ Aye bakazi baimwe, n'abaana baimwe abato, n'ebyayo byaimwe (ndidhi nga muli n'ebyayo kamaala), biidha kusigala mu bibuga byaimwe, bye nabagabira.

²⁰ Mubeereku baganda baimwe abo, okutuusa lwe balitwala ekiketezo kyaibwe, Musengwa Katonda ky'ali kubagha e bugwandhuba gh'omwiga Yorudani, era okutuusa boona Musengwa Katonda lw'alibagha okutyama ni batereera ng'oti niimwe. Memale mwaira, kiisi muntu ku butaka bwe, bwe namugha.’

²¹ “Naalagira Yoshua mu biseera ebyo nti, ‘Weeboneireku n'agago ebyo byonabyona Musengwa Katonda waimwe by'akoze ku bakyabazinga abo ababiri, Sihoni ni Ogi. Atyo ni, bw'aja okukola ku buli bwakyabazinga bwe munaajanga okulumba.

²² Mutabatyanga naire, kuba Musengwa Katonda waimwe, n'aidhanga okubalwaniragho.’”

Musengwa Katonda aloba okuganha Musa okwingira mu Kanaani

²³ “Mu biseera ebyo naasaba Musengwa Katonda nti:

²⁴ ‘Wo Musengwa Katonda waife, nze ndidhi nga waakatoolera butoolere okundholeka ebikologho n'ebyewuninkiriza by'oja okukola. Ezira katonda mu igulu oba mu nsi asobola okukola eby'amaani by'okoze.

²⁵ Nkweghemba, onganhe nsomoke omwiga Yorudani, mbone ensi ey'ensozi eri eyo enungi, era mbone n'ekiketezo ky'e Lebanoni.’

²⁶ “Aye Musengwa Katonda yansungughalira ku lwaimwe, yaaloba kumpulirisa. Yankoba ati, ‘Lekera agho. Otairayo kwogera ninze ku kintu ekyo.

²⁷ Ja, oniine ghaigulu ku lusozi Pisiga, olinge e buvandhuba n'e bugwandhuba, era olinge ku luuyi olw'omukono omugooda olw'e buvandhuba, ni ku lw'omukono omusaadha olw'e buvandhuba ensi eyo ogyekalirise bukalamu. Kuba toja kusomoka mwiga Yorudani guno.

²⁸ Aye sikirira Yoshua abe mumalirivu era omugumye, kuba n'alikulemberamu abantu bano basomoke, okuja okutwala ensi eyo y'oja okulengera.’

²⁹ “Kale twasigala mu kiiko ekiringiriire ekibuga Bethi Peori.”