Amateeka Agokubiri 2 - Baibuli Ekibono kya Katonda 2014

¹ Musa yakobera Abaisiraeli ati: “Bwe twava agho, twakyuka. Twatambula nga twira mu irungu nga twolekeire Enhandha Emyufu, nga Musengwa Katonda bweyandagira. Twamala entangama ndeeyi nga tutambulatambula eyo tutyo mu nsi ey'ensozi Edomu.

² Agho Musengwa Katonda yankoba ati,

³ ‘Mutambwiretambwire eyo mutyo mu nsi eno okumala ekiseera ekimala. Mpegaano mukyuke, muje ku luuyi olw'omukono omugooda olw'e buvandhuba.’

⁴ Era yankoba ati, ‘Lagira abantu oti muli kumpi kubita mu nsi ey'ensozi ey'aboluganda lwaimwe baidhukulu ba Esau, ababa mu Edomu. Baidha kubatya. Aye mwegendereze inho,

⁵ mutabatanulaku lutalo. Imwe tiidha kubaghaaku ku itaka lyaibwe naire waire akatundu akaniinibwaku obuniinibwe ekigere. Kuba Edomu nagigha Esau ebe yiye.

⁶ Munaabagulangaku bugule emere ey'okulya, n'amaadhi ag'okunhwa.’

⁷ “Musengwa Katonda waimwe yabagha enkabi, ebintu byonabyona byabajiira bukalamu. Yaabalabirira nga muli kubita mu irungu lino einene. Emyaka gino amakumi ana yaaba ghalala n'imwe, nga muzira kye mudhulirira.

⁸ “Agho twabita ku boluganda lwaife, baidhukulu ba Esau, ababa mu Edomu. Twagema engira eja mu irungu, okuva ku kibuga Elathi ni Ezioni Geberi. Twakyuka, twabita mu ngira ey'omu irungu ly'e Moabu.

⁹ Agho Musengwa Katonda yankoba ati, ‘Mutadaazadaaza bantu ab'e Moabu, baidhukulu ba Loti, era mutabatanulaku lutalo. Imwe tiidha kubaghaaku kitundu waire ekitono kiti ku nsi yaibwe, okuba ekyaimwe. Ekibuga Ari nakigha ira Abamoabu abo kibe kyaibwe.’ ”

¹⁰ Mu biseera eby'eira, mu Ari mwabangamu abantu Abaemi. Bano baali eighanga eikologho era ery'amaani, nga bawaigufu ng'oti Banaki.

¹¹ Era boona baayetebwanga Barefa ng'Abanaki, aye nga Abamoabu babeeta Baemi.

¹² Abahori boona baabanga mu Edomu mu kusooka. Aye baidhukulu ba Esau, Abaedomu, bwe baidha, baababingamu, baazikiriza eighanga lyaibwe, era baasenga mu kifo kyaibwe. Baakola ekyo ng'oti n'Abaisiraeli bwe baamala ni bakola, bwe baabinga abazigu baibwe mu nsi Musengwa Katonda ye yagha Abaisiraeli abo okuba obutaka bwaibwe.

¹³ Musa yaakoba Abaisiraeli ati: “Agho Musengwa Katonda mu biseera ebyo yaatukoba ati, ‘Mpegaano ni, musituke musomoke akaiga Zeredi.’ Twasomoka akaiga ako Zeredi, nga Musengwa Katonda oyo bweyatukoba.

¹⁴ Okuva lwe twava e Kadeshi Barinea, okutuusa lwe twasomoka akaiga Zeredi, gyali gigheze emyaka amakumi asatu na munaana. Abasaadha abalwani ab'oluse olwo boonaboona baali nga bamaze okuwaagho okufa, nga Musengwa Katonda bweyeesoomera okubamalagho.

¹⁵ Kuba bwenebwene yabalwanisa okutuusa lwe yabazikiriza n'abamaliragho irala.

¹⁶ “Agho abalwani abo boonaboona bwe baamala okufa ni bawaagho,

¹⁷ Musengwa Katonda yankoba ati:

¹⁸ ‘Olwaleero muja kusala ensalosalo ey'ekiketezo ky'e Moabu, nga mubitira mu kibuga Ari.

¹⁹ Bwe munaaba nga muli kumpi okutuuka mu nsi ey'Abammoni, mutabadaazadaaza era mutabatanulaku lutalo. Kuba imwe tija kubaghaaku kitundu waire ekitono kiti ku nsi yaibwe, okuba ekyaimwe. Ensi eyo namala ira okugigha Abammoni abo baidhukulu ba Loti, ebe yaibwe.’ ”

²⁰ Ensi eyo era eyetebwa ya Barefa. Abarefa abo n'abaagibangamu eira. Aye Abammoni nga beeta Abarefa abo bati, Bazamuzumu.

²¹ Baali eighanga eikologho ery'abantu kamaala abawaigufu ng'oti Banaki. Aye Musengwa Katonda yaabazikiriza. Olwo Abammoni baababingamu, beene baasenga mu kifo kyaibwe.

²² Musengwa Katonda era atyo bweyakolera Abaedomu, baidhukulu ba Esau, ababa mu nsi ey'ensozi Edomu. Yazikiriza Abahori, olwo baidhukulu ba Esau baabingamu Abahori abo, beene baasenga mu kifo kyaibwe n'okutuusa mpegaano.

²³ Ate ebiketezo ebiiririra okutuukira irala e Gaza, byabangamu Abavvi. Aye Abafilisiti abaava e Filisitia, baabazikiriza, beene baasenga mu kifo kyaibwe.

²⁴ Musa yaakoba Abaisiraeli ati: “Bwe twamala okubita mu Moabu, Musengwa Katonda yankoba ati, ‘Musituke, mweyongereyo mu lugendo lwaimwe, mubite mu kiiko Arunoni. Kyabazinga w'e Heshiboni, ayetebwa Sihoni Omuamori, mmubataire mu ngalo. Mumutanuleku olutalo mutwale ensi ye, ebe yaimwe.

²⁵ Okuva n'olwaleero, nja kukuba amaghanga goonagoona agali ku nsi entiisa, gabatye. Kiisi anaawuliranga ku liina lyaimwe, aidha kudhugumiranga olw'okutya.’”

Abaisiraeli baghangula kyabazinga Sihoni

²⁶ Musa yaakoba Abaisiraeli ati: “Nga tuli mu irungu ery'e Kedemothi, nagheereza kyabazinga w'e Heshiboni ayetebwa Sihoni, obukwenda obw'emiraala, nga nkoba nti,

²⁷ ‘Tuleke tubiteku mu nsi yo. Twidha kubita bwa mu ngira mwonka aghazira kugonhokaku naire.

²⁸ Twidha kugulanga bugule emere ye tunaalya n'amaadhi ge tunaanhwa. Kye tukusaba n'okutuganha tubiteku mu nsi yo,

²⁹ okutuusa lwe tunaasomoka omwiga Yorudani, ni twingira mu nsi Musengwa Katonda waife y'ali kutugha. Tukusaba otuganhe ng'oti ni baidhukulu ba Esau ababa mu Edomu, n'Abamoabu ababa mu Ari, bwe baatuganha okubita mu nsi yaibwe.’

³⁰ “Aye kyabazinga w'e Heshiboni, ayetebwa Sihoni, yaaloba kutuganha kubita mu nsi ye, kuba Musengwa Katonda waimwe yamukalangusa omwoyo. Yaamuleetera okudheema, olwo tughange okumughangula, n'okutwala ensi ye, mwe tukaali ni mpegaano.

³¹ “Agho Musengwa Katonda yankoba ati: ‘Bona, Sihoni wuuyo mmubataire mu ngalo ghalala n'ensi ye. Kale ni mutwale ensi ye ebe yaimwe.’

³² Olwo Sihoni yaidha n'abantu be boonaboona okutulwanisa mu lutalo e Yahazi.

³³ Era Musengwa Katonda waife yaamutugha, twamughangula ni batabane, n'abantu be boonaboona.

³⁴ Mu biseera ebyo twanhaga ebyali ebibuga bye byonabyona, twabizikiriza n'abantu boonaboona, abasaadha, n'abakazi, n'abaana abato, aghazira kulekagho waire omulala ati.

³⁵ Ebyayo byonka bye twatwalaku nga n'omunhago, aghalala n'ebintu bye twanhaga mu bibuga.

³⁶ Okuva ku Aroeri ekiri ku mugo ogw'ekiiko Arunoni, n'ekibuga ekiri mu kiiko ekyo mwene, okutuukira irala e Gileadi, ghazira kibuga kyatulema lwa bugulumivu bwa bimante bigumu ebikyezungulwire. Byonabyona Musengwa Katonda waife yabitugha twabinhaga.

³⁷ Aye titwaseeta ku nsi y'Abammoni, waire ku kiketezo kyaibwe ekiri ku mbali kw'omwiga Yabboki, n'ebibuga eby'omu nsi ey'ensozi, n'ebifo ebindi byonabyona Musengwa Katonda waife ye yatulobera okuja.”