Amateeka Agokubiri 18 - Baibuli Ekibono kya Katonda 2014

Omugabo gwa bakabona

¹ Musa yaakoba Abaisiraeli ati: “Bakabona ab'ekika kya Levi tibaabenga na mugabo gwa itaka lya nsikirano mu Isiraeli. Aye baidha kulyanga ku bigheebwayo ebyokebwa, ni ku misengo egindi egigheebwayo ye Musengwa Katonda.

² Tibaabenga na itaka lya nsikirano ng'ab'ebika ebindi. Omugabo gwaibwe gunaabanga mu kuba bakabona ba Musengwa Katonda, nga Musengwa Katonda bweyasuubiza.

³ “Guno n'omugabo abantu abali kughaayo omusengo, gwe banaaghanga bakabona: bw'enaabanga ente oba entaama, banaaghanga bakabona omukono, n'emba dhombi, n'ebyenda.

⁴ Bakabona era banaafunanga ekitundu ekisooka okukungulwa, eky'engaano yaimwe, n'eky'omwenge gwaimwe ogw'emizabbibu, n'eky'omuzigo gwaimwe ogw'ebibala eby'emiti emyoliva. Era bafunenga n'ekitundu eky'obuviiri bwe musooka okusala ku ntaama dhaimwe.

⁵ Kuba mu bika byaimwe byonabyona, Musengwa Katonda waimwe yalondamu eky'Abalevi, bamugheerezenga enaku dhoonadhoona mu kifo kye eky'okumusinzizangamu.

⁶ “Kiisi Mulevi anaabanga ng'asazeegho okuva mu kibuga kyonakyona mw'aba mu Isiraeli, ng'ayenda aje mu kifo Musengwa Katonda ky'aliba ng'alonzeegho okumusinzizangamu, anaabanga wa idembe okukola ekyo.

⁷ Era aidha kugheerezanga Musengwa Katonda we ng'oti ni Balevi baine boonaboona abagheerezaayo bwe bakola.

⁸ Aidha kufunanga omugabo gw'emere nga n'omulala n'ogwa baine, ng'otoireku ebyo by'anaabanga ng'afunie okuva mu boluganda lwe.”

Okulabula obutajiiranga ku mpisa edh'abatatya Katonda

⁹ Musa yaakoba Abaisiraeli ati: “Bwe mulimala okutuuka mu nsi Musengwa Katonda waimwe y'aja okubagha, mutagezangaku kwega kujiiranga ku mpisa edheenhinhalwa, ng'abamaghanga ago dhe bajiiraku.

¹⁰ Mu imwe mutabangamu muntu waire omulala ati ayokya mutabane we oba mughala we mu muliro ng'amughaayo ng'omusengo, oba akola eby'obulaguzi, oba akola eby'obulogo,

¹¹ oba avaala talasimu, oba akozesa amaghembe, oba asamira.

¹² Kuba kiisi akola ebintu ng'oti n'ebyo, aba kyenhinhalwa ye Musengwa Katonda. Era olw'ebikolwa ebyo, Musengwa Katonda oyo ky'ali kuva n'abinga amaghanga ago mu biketezo bye muli kumpi okutuukamu.

¹³ Imwe mubenga beesimbu mu maiso ga Musengwa Katonda waimwe.”

Katonda asuubiza okubasindikira omulanzi

¹⁴ Musa yaakoba Abaisiraeli ati: “Abantu ab'omu nsi eyo ye muli kumpi okutwala, bajiira ku bya bulaguzi na bya bulogo. Aye imwe, Musengwa Katonda waimwe tabaganha kujiira ku ebyo.

¹⁵ Aye aidha kubasindikira omulanzi okuva mu ighanga lyaimwe, ali ng'oti ninze. Oyo ye munaawuliranga.

¹⁶ “Ku lunaku lule lwemwesololezaaku eyo ku lusozi Sinai, mweghemba Musengwa Katonda waimwe mulobe kwirayo kuwulira ng'ali kwogera, waire okwiramu okubona omuliro gwe ogw'amaani. Kuba mwali muli kutya, muti musobola okufa.

¹⁷ Agho Musengwa Katonda yaakoba ati, ‘Byonabyona bye boogeire bituufu.

¹⁸ Ndidha kubasindikira omulanzi okuva mu ighanga lyaibwe, ali ng'oti niiwe. Ndidha kumukobera eby'okwogera, olwo abakoberenga byonabyona bye ndimulagira.

¹⁹ Era kiisi ataatengayo mwoyo ku bibono byange omulanzi oyo by'anaayogeranga mu liina lyange, ndidha kumuvunaananga.

²⁰ Aye omulanzi aneetulinkirizanga n'ayogera mu liina lyange ebibono bye ntamulagiire, oba n'ayogera mu liina lya bakatonda abandi, aidha kwitibwanga bwitibwe.’

²¹ “Musobola okwebuuza mule muti: ‘Tunaategeereranga ku ki ekibono Musengwa Katonda ky'ayogeire?’

²² Mwidha kutegeeranga, kuba omulanzi bw'ayogera mu liina lya Musengwa Katonda, aye ky'ayogeire ni kitabaagho oba ni kitatuukirira, ekyo kiba nga Musengwa Katonda ti n'akyogeire. Omulanzi aba ng'akyogeire lwa kwetulinkiriza, era kitabatiisanga.”