Amateeka Agokubiri 16 - Baibuli Ekibono kya Katonda 2014

Ekibinuko eky'Okwidhukiriraku Okubitizibwa

¹ Musa yaakoba Abaisiraeli ati: “Mukuzenga omwezi gw'Abibu, nga mukola Ekibinuko eky'Okwidhukiriraku Okubitizibwa. Kuba mu mwezi ogwo, Musengwa Katonda waimwe gwe yabatooleramu e Misiri obwire.

² Mwidha kujanga mu kifo Musengwa Katonda ky'aliba ng'alonzeegho okumusinzizangamu, mugheerengayo eyo omusengo ogw'Ekibinuko eky'Okwidhukiriraku Okubitizibwa, nga mwita ku nte dhaimwe, oba ku ntaama dhaimwe, oba ku mbuzi dhaimwe.

³ Ensolo eyo mutagiriirangaku migaati gizimbulukusiibwa. Mwidha kumalanga enaku musanvu nga muli kulya emigaati egitazimbulukusiibwa, nga bwe mwakola nga muva mu bwiru e Misiri, ye mwava embirombiro. Egyo n'emigaati egy'okunakughala. Mwidhanga kugirya, mughange okwidhukiranga mu bulamu bwaimwe bwonabwona olunaku lwe mwaviiraku e Misiri.

⁴ Mu nsi yaimwe timuubengamu ali na kizimbulukusa, okumala enaku musanvu. Era emamba ey'ensolo edhinaitibwanga eigulo ku lunaku olusooka, teesulengagho kutuusa nkyo.

⁵ “Mutagheeranga musengo ogw'Ekibinuko eky'Okwidhukiriraku Okubitizibwa nga muli eyo mu bibuga byaimwe Musengwa Katonda waimwe by'abagha.

⁶ Aye mwidha kugugheeranga mu kifo ky'aliba alonzeegho okumusinzizangamu. Eyo ye munaagugheerangayo eigulo, ng'endhuba eri kugwa, mu kiseera nga kye mwaviiramu mu Misiri.

⁷ Mwidha kufumbanga emamba ey'ensolo eyo era mugiriire, mu kifo Musengwa Katonda waimwe ky'aliba ng'alonzeegho okumusinzizangamu. Nga mumaze munairangayo mu weema dhaimwe, nga bukyeire enkyo.

⁸ Mu nnaku omukaaga edhinairangaku, mwidha kulyanga emigaati egitazimbulukusiibwa. Ku lunaku olwomusanvu, mwidhanga kwesoloza musinze Musengwa Katonda, oyo Katonda waimwe, era timuulukolerengaku mulimo gwonagwona.”

Ekibinuko eky'Amakungula

⁹ Musa yaakoba Abaisiraeli ati: “Mwidha kubalanga wiiki musanvu okuva lwe munaatooleranga okukungula engaano mu nimiro,

¹⁰ memale olwo mukolenga Ekibinuko eky'Amakungula, eky'okuta mu Musengwa Katonda waimwe ekitiisa. Mwidha kumuleeteranga ekigheebwayo eky'ekyeyendere, nga mujiira ku bungi bw'ebintu by'anaabaghanga.

¹¹ Era mwidha kusagambiranga mu maiso ga Musengwa Katonda waimwe, mu kifo ky'aliba ng'asazeegho okumusinzizangamu, ghalala ni batabane baimwe, ni baghala baimwe, n'abagheereza baimwe abasaadha n'abakazi, n'Abalevi ab'omu bibuga byaimwe, n'abasenze, ni bamulekwa, ni banamwandu ababa mu imwe.

¹² Mufengayo inho okutuukiriza amateeka gano, nga timwerabiire bwe mwali abairu mu Misiri.”

Ekibinuko eky'Entindi

¹³ Musa yaakoba Abaisiraeli ati: “Bwe munaamalanga okukuba emere yaimwe ey'empeke n'okugikunguuta, ni mumala n'okukunha omwenge gwaimwe ogw'emizabbibu, munaakolanga Ekibinuko eky'Entindi okumala enaku musanvu.

¹⁴ Mu kibinuko ekyo, mwidha kusagambiranga ghalala ni batabane baimwe, ni baghala baimwe, n'abagheereza baimwe abasaadha n'abakazi, n'Abalevi, n'abasenze, ni bamulekwa, ni banamwandu abali mu bibuga byaimwe.

¹⁵ Mwidha kutanga mu Musengwa Katonda waimwe ekitiisa nga mukola Ekibinuko ekyo okumala enaku musanvu, mu kifo Musengwa Katonda ky'aliba ng'alonzeegho okumusinzizangamu. Kuba Musengwa Katonda oyo aidha kubaghanga enkabi mu bye munaakolanga byonabyona ni mu bye munaakungulanga byonabyona. Era byonabyona biidha kubaleeteranga okusagamba.

¹⁶ “Abasaadha boonaboona ab'omu ighanga lyaimwe, baidha kujanga basinze Musengwa Katonda waimwe emikuzi esatu mu mwaka, mu kifo ky'aliba ng'alonzeegho okumusinzizangamu. Baidha kukolerangayo ebibinuko bino: eky'Emigaati Egitazimbulukusiibwa, eky'Amakungula, n'eky'Entindi. Era tibaidhenga mu maiso ga Musengwa Katonda nga bazira kye baleese.

¹⁷ Buli muntu aidha kughangayo nga bw'aghanga, ng'ajiira ku bungi bw'ebyo Musengwa Katonda by'amughaire.”

Okusala ensonga mu butuufu

¹⁸ Musa yaakoba Abaisiraeli ati: “Mwidha kutangagho abalamuzi n'abakulembeze mu bibuga byaimwe byonabyona Musengwa Katonda waimwe by'abagha, nga mubatoola mu buli kika kyaimwe. Baidha kusaliranga abantu ensonga mu butuufu.

¹⁹ Batasalirizanga, waire okwekubiranga, oba okulyanga enguzi, kuba enguzi etulughaza amaiso g'omugezi gaava ku kituufu, era ereetera omuntu okufuulaniafuulania by'akoba.

²⁰ Buliidho musalenga ensonga mu butuufu, olwo musobole okutwala ensi Musengwa Katonda waimwe y'ali kubagha, era mugighangaaliremu.

²¹ Bwe munaabanga nga mukolera Musengwa Katonda waimwe alutaari, mutasimbangagho mu mbali mwayo muti gwa kamanhiso ka musambwa omukazi, Ashera.

²² Era mutasimbangagho mpango ya ibaale ey'okusinzizangaku ebitali Katonda ebyo Musengwa Katonda waimwe tabyenderaku irala.