Amateeka Agokubiri 11 - Baibuli Ekibono kya Katonda 2014

Okwidhukiza Abaisiraeli Katonda bye yabakolera

¹ Musa yaakoba Abaisiraeli ati: “Mugonzenga Musengwa Katonda waimwe buliidho, era mutuukirizenga byonabyona by'ayenda mukole: amateeka ge, n'ebiragiro bye, n'okulamba kwe.

² Mukimanhe olwaleero muti tiri kwogera na baana baimwe abakaali kumanha na kubona nga Musengwa Katonda waimwe bw'akangaivula. Niimwe omwabona nga bw'ali omukologho, era ow'amaani amangi agataloodheka.

³ Mwabona ebyewuunhio n'ebyewuninkiriza, bye yakolera e Misiri ku kyabazinga waayo, ni ku nsi Misiri yoonayoona.

⁴ Mwabona nga Musengwa Katonda bweyasaanizaagho irala eigye ly'Abamisiri, n'embalaasi dhaibwe, n'ebigaali byaibwe eby'omu lutalo. Yaabayoolookezaaku amaadhi g'Enhandha Emyufu, gaabamira bwe baali nga bali kulumuukirira imwe.

⁵ Mwidhi bye yabakolera nga muli mu irungu, okutuusa lwe mwatuuka mu kifo kino.

⁶ Era mwidhukira kye yakola Dathani ni Abiramu batabane ba Eliabu ow'omu kika kya Reubeni. Musengwa Katonda oyo yaleetera eitaka okwasama ng'Abaisiraeli boonaboona babona, lyamira abantu abo, n'ab'omu maka gaibwe, n'eweema dhaibwe, na kiisi kiramu kye baali nakyo.

⁷ Bwenebwene mwabona eby'amaani ebyo byonabyona Musengwa Katonda bye yakola.

⁸ “Kale ni mutuukirizenga ebiragiro byonabyona bye ndi kubagha olwaleero, mughange okuba n'amaani, musomoke omwiga, muje mutwale ensi ye muli kumpi okwingiramu.

⁹ Era olwo musobole okughangaalira mu nsi eyo engimu era erimu ebirungi kamaala, Musengwa Katonda ye yasuubiza okugha badhaadha baimwe n'eizaire lyaibwe.

¹⁰ Ensi ye muli kuja okwingiramu okutwala, teri ng'oti ni Misiri ye mwavaamu, mwe mwasiganga ensigo ni mukola n'amaani okudhifukirira, ng'enimiro y'eiva.

¹¹ Aye nsi ya nsozi na biiko, efukirirwa amaadhi agagwa.

¹² Ensi eyo Musengwa Katonda waimwe agirabirira ekiseera kyonakyona, okuva omwaka lwe gutoolera okutuusa lwe guwaaku.

¹³ “Kale ni mufubenga okutuukiriza ebiragiro, bye mbaghaire olwaleero. Mugonzenga Musengwa Katonda waimwe, mumugheerezenga n'omutima gwaimwe gwonagwona, n'omwoyo gwaimwe gwonagwona.

¹⁴ Olwo aidha kugwisanga amaadhi mu nsi yaimwe mu biseera byago eby'omusambya n'eby'omutoigo. Olwo musobolenga okukungula engaano, n'okufuna omwenge ogw'emizabbibu n'omuzigo ogw'ebibala eby'emiti emyoliva.

¹⁵ Aidha kubaghanga eisubi ery'ensolo dhaimwe mu byayiro byaimwe. N'imwe beene mwidhanga kufuna emere yoonayoona ye mwetaaga.

¹⁶ Mwekuume mulobenga kusendebwasendebwa ni muva ku Musengwa Katonda, ni musinza bakatonda abandi era ni mubagheereza.

¹⁷ Bwe mulikola mutyo, obusungu bwa Musengwa Katonda bulibatumbukiraku ng'oti muliro, Musengwa Katonda oyo yaalobera amaadhi okugwa, ensi yaakala yaaloba kubaza mere, era mwazikirira mangu, waire nga muliba mu nsi engimu Musengwa Katonda y'ali kubagha.

¹⁸ “Mukuumenga ebiragiro byange ebyo mu mitima ni mu myoyo gyaimwe. Mubyesibenga ku mikono gyaimwe, era mubyetimbenga mu byeni byaimwe ng'akamanhiso.

¹⁹ Mubyegeresenga abaana baimwe. Era mubyogerengaku nga muli ghaka, oba nga muli mu ngira muli kutambula, nga mulambaire, oba nga musitwikegho.

²⁰ Mubighandiikenga ku myango egy'emiryango egy'endhu dhaimwe, ni ku miryango gy'ebibuga byaimwe.

²¹ Olwo imwe n'abaana baimwe, mughange okughangaalira mu nsi Musengwa Katonda ye yasuubiza okugha badhaadha baimwe. Era mugibeemu ekiseera kyonakyona eigulu kye lirimala nga liri ghaigulu gh'ensi.

²² “Mukuumenga amateeka ge mbateereiregho obutagavangaku, nga mugonza Musengwa Katonda waimwe, nga mujiira ku ebyo by'abalagira, era nga muba beesigwa y'ali.

²³ Olwo aidha kubingangamu amaghanga agandi ago goonagoona nga mukaali kugatuukaku. Olwo imwe mwingire mutwale ensi ey'amaghanga agasinga eryaimwe obukologho n'amaani.

²⁴ Buli kifo kye munaaniinangaku ekigere, kiidha kubanga kyaimwe. Ensalosalo dhaimwe dhinaavanga ku irungu ku luuyi olw'omukono omusaadha olw'e buvandhuba, dhaatuuka ku nsozi dh'e Lebanoni ku luuyi olw'omukono omugooda olw'e buvandhuba. Era dhinaavanga ku mwiga Eufurate mu buvandhuba, dhaatuuka ku Nhandha Eyaghagati mu bugwandhuba.

²⁵ Tighaliba muntu waire omulala alighanga kubeekiikamu. Kuba buli ye munaajanga, Musengwa Katonda waimwe aidha kuleeteranga abantu baayo kubatya butye, nga bweyabasuubiza imwe.

²⁶ “Olwaleero ndi kubagha mulondegho, okugheebwa enkabi oba okukolimirwa.

²⁷ Mwidha kugheebwanga enkabi, bwe munaawuliranga ebiragiro bya Musengwa Katonda waimwe bye ndi kubagha olwaleero.

²⁸ Mwidha kukolimirwanga bwe mutaawulirenga biragiro bya Musengwa Katonda waimwe, ni mukyuka okuva ku bye ndi kubalagira olwaleero, aye ni mwira mu kusinza bakatonda be mutasinzangaku.

²⁹ Kale ni Musengwa Katonda waimwe bw'alibatuusa mu nsi ye muja okutwala, mulirangirira enkabi nga muli ku lusozi Gerizimu, ate mwalangirira ekikolimo nga muli ku lusozi Ebali.

³⁰ Ensozi edho dhombi dhiri ere ng'osomoike omwiga Yorudani, mu nsi y'Abakanaani ababa mu kiiko kya Yorudani okwolekera Giligali, mu mbali mw'omuti omukologho ogw'e More.

³¹ Muli kumpi okusomoka omwiga Yorudani, okwingira okutwala ensi Musengwa Katonda waimwe y'ali kubagha. Bwe muligitwala ni mugibaamu,

³² mwegenderezanga okutuukiriza amateeka goonagoona n'ebiragiro bye ndi kubagha olwaleero.”