Amateeka Agokubiri 10 - Baibuli Ekibono kya Katonda 2014

Musa airamu okugheebwa ebiragiro ku bibaadho

¹ Musa yaakoba Abaisiraeli ati: “Agho Musengwa Katonda yankoba ati, ‘Baadhayo ebibaadho bibiri eby'amabaale, ebiri ng'oti ni bire ebyasooka, era okoleyo esanduuku ey'embaawo, memale oniine oidhe ye ndi ku lusozi.

² Ndidha kughandiika ku bibaadho ebyo ebibono ebyali ku bibaadho bire ebyasooka, bye wamenha, olwo obite mu sanduuku eyo.’

³ “Agho naakolayo esanduuku ey'embaawo edh'omuti ogwetebwa akasia, naabaadha n'ebibaadho bibiri eby'amabaale, ebiri ng'oti ni bire ebyasooka, memale naaniina olusozi nga ngemye ebibaadho byombi mu ngalo.

⁴ Musengwa Katonda yaaghandiika ku bibaadho ebyo ebibono ebiri ng'oti ni bire ebyasooka, amateeka eikumi, ge yabagha ng'ali mu muliro ghagati, ku lunaku lwe mwesololezaaku ku lusozi. Musengwa Katonda yampa ebibaadho ebyo,

⁵ naika nabyo okuva ku lusozi. Era nga bweyandagira, naabita mu sanduuku ye nakola, mwe bikaali ni mpegaano.”

⁶ (Agho Abaisiraeli baasimbuka, baatambula nga bava ku nsulo edh'Abayaakani, baatuuka e Mosera. Aaroni yaafiira eyo, era yaaziikibwa eyo. Mutabane we Eleazari yaamusikira nga kabona.

⁷ Eyo baavaayo, baatambula okutuuka e Gudugoda. Baava e Gudugoda baatuuka e Yotubatha, ensi erimu obwiga obw'amaadhi kamaala.

⁸ Mu biseera ebyo Musengwa Katonda yaayawula ab'ekika kya Levi okubbeedanga Esanduuku ey'Endagaano ye, n'okumugheerezanga, n'okughanga abantu enkabi mu liina lye. Egyo n'emirimo gyaibwe n'okutuusa mpegaano.

⁹ Eyo n'ensonga lwaki ab'ekika kya Levi tibaafuna mugabo gwa itaka lya nsikirano ng'oti n'ab'ebika ebindi. Bo baagabanaku kya kuba bakabona ba Musengwa Katonda, nga Musengwa Katonda waimwe bweyabakoba beene.)

¹⁰ Musa yaayongera okukoba Abaisiraeli ati: “Naba ku lusozi okumala enaku amakumi ana omusana n'obwire, nga bwe nakola ku mukuzi ogwasooka. Ni ku mukuzi guno, Musengwa Katonda yaawulira kye namusaba, yaaganha obutabazikiriza imwe.

¹¹ Agho yankoba ati, ‘Situka weeyongere okutambula olugendo lwo okulemberemu abantu, baje batwale ensi ye nasuubiza badhaadha baibwe okubagha.’ ”

Katonda by'ayenda Abaisiraeli bakole

¹² Musa yaayongera okukoba Abaisiraeli ati: “Mpegaano ni, imwe Abaisiraeli, Musengwa Katonda waimwe ky'ayenda mukole ni kino: Mumutyenga era mujiirenga ku ebyo byonabyona by'abalagira. Mumugonzenga era mumusinzenga n'omutima gwaimwe gwonagwona, n'omwoyo gwaimwe gwonagwona,

¹³ era mukuumenga amateeka ge n'ebiragiro bye, bye ndi kubagha olwaleero, mughange okubanga obukalamu.

¹⁴ Bona eno, eigulu lyonalyona eyo ye likoma okweruupiika, lya Musengwa Katonda waimwe, era n'ensi n'ebigirimu byonabyona bibye.

¹⁵ Aye Musengwa Katonda yagonza inho badhaadha baimwe, kyeyava n'alonda imwe baidhukulu baibwe mu b'amaghanga agandi goonagoona. Era n'okutuusa mpegaano mukaali abantu be abalondemu.

¹⁶ Kale ni mubenga bawulize y'ali, mulekere agho okubanga n'empwitu,

¹⁷ kuba Musengwa Katonda waimwe, ni Katonda afuga bakatonda boonaboona, era ni Musengwa Katonda afuga basengwa boonaboona. Musengwa Katonda oyo, n'omukologho era ow'amaani ali n'okutiibwa. Tasaliriza era talya nguzi.

¹⁸ Asala mu butuufu ensonga dha bamulekwa ni banamwandu. Yaagonza abasenze abali mu imwe, yaabagha eby'okulya n'eby'okuvaala.

¹⁹ Agho ni, mugonzenga abasenze abo, kuba mwena mwali basenze mu Misiri.

²⁰ Mutyenga Musengwa Katonda waimwe, era yenka ye mube musinzenga. Mubenga beesigwa y'ali, era eriina lye lyonka, lye mube mulayirenga.

²¹ Mumusaakenga, oyo ni Katonda waimwe. Mweboneraku n'amaiso gaimwe eby'amaani era ebitiisa bye yabakolera.

²² Ebiseera badhaadha baimwe bye baajiiramu e Misiri baali abantu nsanvu bonka. Aye mpegaano Musengwa Katonda waimwe abafiire bangi ng'oti n'emuunienie edh'oku igulu.”