Amateeka Agokubiri 1 - Baibuli Ekibono kya Katonda 2014

Ebyandhula

¹ Bino n'ebibono Musa bye yakoba Abaisiraeli boonaboona, nga bali mu irungu, ku luuyi olw'e buvandhuba olw'omwiga Yorudani. Baali mu kiiko kyagwo okumpi n'ekifo ekyetebwa Sufu, ghagati gh'ekibuga Parani nga kiri ku luuyi olundi, n'ebibuga Tofeli, Labani, Hazerothi ni Dizahabu, nga biri ku luuyi olundi.

² Omuntu kimutwalira enaku ikumi na lulala okutambula n'ebigere, okuva ku lusozi Sinai ng'ali kubitira mu nsi Edomu, okutuuka e Kadeshi Barinea.

³ Ku lunaku olusooka mu mwezi ogweikumi n'omulala, mu mwaka ogwamakumi ana (40) ng'Abaisiraeli baviire mu Misiri, Musa yaakobera Abaisiraeli byonabyona Musengwa Katonda bye yamulagira okubakobera.

⁴ Ebyo byabaagho ng'amaze okughangula kyabazinga Sihoni ow'Abamori eyafugiranga mu Heshiboni, ni kyabazinga Ogi ow'e Bashani eyafugiranga mu Ashitarothi ni mu Edurei.

⁵ Mu nsi Moabu, ere ng'omaze okusomoka omwiga Yorudani, Musa ye yatoolerera okwinhonhola amateeka ga Katonda, ng'akoba ati:

⁶ “Bwe twali ku lusozi Sinai, Musengwa Katonda waife yatukoba ati, ‘Ekiseera kye mumaze ku lusozi luno kimala.

⁷ Mpegaano mukole muje, mweyongere mu lugendo lwaimwe. Muje mu biketezo eby'oku nsozi eby'Abamori, ni mu biketezo byonabyona ebibiriiraine: mu kiiko kya Yorudani, ni mu biiko ebindi, ni mu nsozi, ni mu biketezo ebikalukalu eby'oku luuyi olw'omukono omusaadha olw'e buvandhuba, n'eby'oku Nhandha Eyaghagati. Muje mu nsi y'Abakanaani, ni mu nsozi edh'e Lebanoni, okutuukira irala ku mwiga omukologho Eufurate.

⁸ Eyo n'ensi nze Musengwa Katonda ye nasuubiza okugha badhaadha baimwe Aburahamu, ni Isaaka, ni Yakobo, ni baidhukulu baibwe. Yiiyo ngibooleike, muje mugitwale.’ ”

Musa alonda abakulembeze

⁹ Musa yaakoba abantu ati: “Bwe twali nga tukaali ku lusozi Sinai, nabakoba nti, ‘Tighanga kubakulembera zenka.

¹⁰ Musengwa Katonda waimwe abafiire bangi, era mpegaano muli bangi ng'oti n'emuunienie edh'oku igulu.

¹¹ Neeghemba Musengwa Katonda oyo Katonda, Katonda wa badhaadha baimwe, ayongere okubafuula abangi emikuzi lukumi (1,000) okusinga bwe muli buti, era abaghe enkabi nga bweyabasuubiza.

¹² Aye nze zenka nsobola ntya okwetwika obuvunaanizibwa obwaga agho, obw'okubalabirira n'okubagondhoola mu nsonga dhaimwe?

¹³ Mulonde okuva mu buli kika, abantu abagezi, abategeevu era abali n'obumanhirivu, nze mbateegho babe bakulembeze baimwe.’

¹⁴ Mwandhiramu muti, ‘Kikalamu tukole nga bw'okobye.’

¹⁵ Kale naatoola abakulembeze abagezi era abali n'obumanhirivu mu buli kika, naabataagho okuba abakulu baimwe. Abandi baakulira abantu olukumi olukumi, n'abandi ebikumi ebikumi, n'abandi amakumi ataanu ataanu, n'abandi eikumi eikumi. Naataagho n'abakulembeze abandi mu bika byaimwe.

¹⁶ “Era mu kiseera ekyo nga tukaali ku Lusozi Sinai, naasikirira abalamuzi baimwe nti, ‘Muwulirisenga ensonga era musalenga mu butuufu emisango ka gibe ghagati gha ab'eighanga lyaimwe beene na beene, oba ghagati gha ab'eighanga lyaimwe n'abasenze.

¹⁷ Mutasalirizanga mu nsala yaimwe, muwulirisenga ensonga edh'abaavu n'edh'abakombe mu nsambo n'endala. Mutabangaku muntu yeenayeena ye mutiisa maiso, kuba emisango mugisala mu buyinza bwa Katonda. Era ensonga enaabanga ebalemye, mugireetenga ye ndi ngiwulire.’”

¹⁸ Era mu kiseera kyene ekyo nga tukaali ku lusozi Sinai, nabalagira byonabyona bye mugwaine okukola.

Abakeesi batumibwa nga bava e Kadeshi Barinea

¹⁹ “Twakola nga Musengwa Katonda waife bweyatulagira, twava ku lusozi Sinai. Twatambula okubita mu irungu eryo lyonalyona einene era eritiisa lye mwabona, nga tugemye engira eja mu nsi y'ensozi ey'Abamori, twatuuka e Kadeshi Barinea.

²⁰ Naabakoba nti, ‘Mutuuse mu nsi ey'ensozi ey'Abamori, Musengwa Katonda waife y'ali kutugha.

²¹ Eyo n'ensi Musengwa Katonda waimwe y'abooleike. Muje mugitwale nga Musengwa Katonda oyo, Katonda wa badhaadha baimwe bw'abakobye, aghazira kutyamu naire.’

²² “Aye mwenamwena mwaidha ye ndi mwankoba muti, ‘Tusooke tutumeyo abantu batukeetere ensi eyo, baire batukobere engira ye tunaabitamu, era n'ebibuga bye tunaayagaanayo bwe biri.’”

²³ “Naabona ng'ekyo kirungi. Naalonda mu imwe abasaadha ikumi na babiri, mulala mulala okuva mu buli kika.

²⁴ Baaja mu nsi ey'ensozi, baatuuka ku kiiko kya Eshikoli, baakikeeta.

²⁵ Baanoga ku bibala byayo, baabireeta ye tuli. Baatukobera bati, ‘Ensi Musengwa Katonda waife y'ali kutugha, ngimu.’

²⁶ “Aye imwe mwadheemera ekiragiro kya Musengwa Katonda waimwe, mwaloba okwingira mu nsi eyo.

²⁷ Mwemuluguunhiza mu weema dhaimwe nga mukoba muti, ‘Musengwa Katonda yatukyagha, kyeyava n'atutoola e Misiri okutughaayo mu ngalo dh'Abamori, olwo atuzikirize.

²⁸ Kifo ki kye tuli kujaamu ekyo? Banaife be twatumye yo, batumazeemu amaani nga bakoba bati abantu abaliyo bakologho era baleeyiriri okutusinga. Ebibuga byayo bikologho era byezungulwirwa ebimante ebigumu ebituuka ku igulu. Era bati baabonayo n'abantu Abanaki!’”

²⁹ “Aye nze naabakoba nti, ‘Mutatya era abantu abo batabamalamu maani.

³⁰ Musengwa Katonda waimwe abakulemberamu, n'aidha okubalwaniragho, nga bwe mwabona byonabyona bye yakolera e Misiri

³¹ ni mu irungu. Mu lugendo lwonalwona lwe mwatambula nga muli eyo mu irungu okutuusa lwe mwatuuka mu kifo kino, mwabona Musengwa Katonda waimwe nga bweyababbeeda, ng'oti n'omuntu bw'abbeeda omwana we.’

³² Aye waire nga nabakobera ebyo byonabyona, timwaikiriza kwesiga Musengwa Katonda waimwe,

³³ eyabakulemberangamu okubaagalira ekifo eky'okusimbamu weema dhaimwe. Obwire ng'aba mu muliro oguli ng'oti mpango, ate omusana yaaba mu kire ekiri ng'oti mpango, okubooleka engira ye munaabitamu.”

Musengwa Katonda abonereza Abaisiraeli

³⁴ “Agho Musengwa Katonda yaawulira okwemuluguunhia kwaimwe yaasungughala. Era yaalayira ng'akoba ati,

³⁵ ‘Ghazira muntu waire omulala ku b'oluse luno olubi alibona ku nsi engimu ye nasuubiza okugha badhaadha baimwe,

³⁶ okutoolaku Kalebu mutabane wa Yefunne. Oyo n'aligingiramu. Era mwene n'abaana be, ndibagha ensi ye yalambuula. Kuba yasigala nga mwesigwa ye ndi mu byonabyona.’

³⁷ Era ku lwaimwe, zeena Musengwa Katonda yansungughalira, yankoba ati, ‘N'iwe Musa, weena tolingira mu nsi eyo,

³⁸ aye omubeezi wo Yoshua, mutabane wa Nuni n'aligingiramu. Kale gumya Yoshua oyo omwoyo, kuba n'alituusa Abaisiraeli mu nsi eyo ni bagitwala ng'obutaka bwaibwe’.

³⁹ “Agho Musengwa Katonda yaatukoba twenatwena ati, ‘Abaana baimwe, abakaali na kwawulagho kirungi na kibi, be mwakoba muti baidha kunhagibwa abazigu, n'abalingira mu nsi eyo. Abo be ndigigha yaaba yaibwe.

⁴⁰ Aye imwe mukyuke mutambule nga mwira mu irungu, nga mugemye engira eja ku Nhandha Emyufu.’

⁴¹ “Mwandhiramu muti, ‘Twakola ekibi, twasungughaza Musengwa Katonda. Aye mpegaano ka tuje, tulwane nga Musengwa Katonda waife bweyatulagira.’ Olwo buli muntu yaagema eby'okulwanisa bye, nga mudhuuba muti kiidha kuba kyangu okulumba ensi ey'ensozi.

⁴² Aye Musengwa Katonda yankoba ati, ‘Bakobe batageza kuja kulwana kuba nze tiidha kuba ghalala nabo. Abazigu baibwe baidha kubaghangula?’

⁴³ Nze naabakobera Musengwa Katonda bye yakoba, aye mwaloba kumpulirisa, mwadheemera ekiragiro kya Musengwa Katonda. Era mwekuluntaza, mwaja mu nsi ey'ensozi.

⁴⁴ Agho Abamori abaali mu nsi eyo ey'ensozi, baavaayo okubalumba nga bali ng'oti muzinga gwa ndhuki: Baababinga okutuukira irala e Horuma, era baabaghangulira eyo mu nsi ey'ensozi Edomu.

⁴⁵ Olwo mwaira, mwalirira Musengwa Katonda ababeere. Aye Musengwa Katonda yaaloba okubawulirisa, waire okubataaku omwoyo.

⁴⁶ Kale mwasigala eyo e Kadeshi okumala entangama ndeeyi.”