Amainhama 8 - Baibuli Ekibono kya Katonda 2014

Omwidhuzo gw'amaadhi gulekera

¹ Katonda yaidhukira Noa, era n'ensolo edh'omu nsiko, n'edho enfuge dhe yali nadho mu lyato. Katonda yaasindika empewo yaafuuwa ku nsi, amaadhi gaakendeera.

² Enhindo edh'amaadhi ghansi mu itaka dhaasembwa, n'ebituli eby'amaadhi ku igulu byaigalwa. Amaadhi gaalekera okugwa okuva ku igulu

³ amaadhi gaatoolera mpolampola okuva ku nsi. Oluvainhuma olw'enaku ekikumi n'ataanu (150), amaadhi gaakendeera,

⁴ era ku lunaku olweikumi n'omusanvu mu mwezi ogwomusanvu, eryato lyatyama ku nsozi edh'e Ararati.

⁵ Amaadhi geeyongera okukendeera, era ku lunaku olusooka mu mwezi ogweikumi, emitwe egy'ensozi gyaboneka.

⁶ Nga ghabiseegho enaku makumi ana, Noa yaigula eidinisa ku lyato lye yakola,

⁷ yaasindika eikoova ku luya. Eikoova lino lyaja nga ligulukira ghano ni ghale, lyaloba kwira, okutuusa amaadhi lwe gaakamuka ni gakala ku nsi.

⁸ Agho yaasindika eighemba okubona oba nga amaadhi gakendeire ku nsi.

⁹ Aye olw'okuba ng'amaadhi gaali gaidhwire woonawoona ku itaka, eighemba tiryafuna gha kugwa. Agho lyairayo ku lyato, Noa yaafulumya omukono yaaligema, yaalingiza munda.

¹⁰ Yaateega enaku musanvu dhaabitagho, kabiri yasindika eighemba ku luya.

¹¹ Eighemba eryo lyaira y'ali eigulo nga liri n'eikaba eibisi ery'oku muti omwoliva. Agho Noa yaamanha ng'amaadhi gaali gakendeire.

¹² Kabiri yaateega enaku musanvu edhindi dhaabitagho, era yaasindika kabiri eighemba ku luya aye ku mukuzi guno tiryaira y'ali kabiri.

¹³ Mu mwaka ogwolukaaga n'omulala (601) ogw'obulamu bwa Noa, mu mwezi ogusooka, ku lunaku olusooka omwezi ogwo, amaadhi gaakamuka ku nsi. Noa yaaghembula ghaigulu ku lyato, yaalinga ku luya, yaabona nga ku itaka kukalu.

¹⁴ Mu mwezi ogwokubiri, ku lunaku olwabiri n'omusanvu olw'omwezi ogwo, ensi yaakala bukalamu.

¹⁵ Agho Katonda yaakoba Noa ati:

¹⁶ “Fuluma mu lyato iwe ni mukazi wo, ni batabane bo, era ni bakazi baibwe.

¹⁷ Ja na buli kintu ekiramu ekiri n'omubiri ekiri n'iwe: enhonhi, ensolo n'ebyeghaluliza ku itaka, bisobole okuzaalagana, byale, era bibune ensi.”

¹⁸ Kale Noa yaafuluma mu lyato ni mukazi we, ni batabane be, era ni baka batabane be.

¹⁹ Ensolo, n'ebyo ebyeghaluliza ku itaka, n'enhonhi, na buli kintu ekitambula ku nsi, byonabyona byafuluma mu lyato mu bika byabyo.

Noa aghaayo omusengo

²⁰ Agho Noa yaazimbira Musengwa Katonda alutaari, era yatoola ku buli nsolo nongoofu, ni ku buli nhonhi nongoofu, yaaghaayo ebigheebwayo ebyokebwa ebiromba ku alutaari.

²¹ Musengwa Katonda yaawunhiza akawoowo, yaasangaala, yaakoba mule ati: “Tikairayo kukolima nsi kabiri olw'omuntu by'akola, kuba omwoyo gwe gwidhwire bubi bwereere okuva mu buto bwe. Tikairayo kabiri kuzikiriza bintu biramu byonabyona nga bwe nkoze.

²² Ensi ng'ekaaligho: okusiga n'okukungula, obwinhogovu n'olwota, ebiseera eby'endoboozi n'eby'ekiinhogogo, omusana n'obwire, ebyo byonabyona tibija kuwaagho.”