Amainhama 28 - Baibuli Ekibono kya Katonda 2014

Isaaka asindika Yakobo ewa Labani

¹ Agho Isaaka yaayeta Yakobo, yaamwendeza enkabi, yaamusikirira ati: “Tobayizanga mukazi Mukanaani.

² Situkiramu oje e Paddanarama mu maka ga dhaadha wo Bethueli azaala inhoko, ofune eyo omukazi ow'okubayiza ku baghala ba Labani mwanhina inhoko.

³ Katonda Aghanga Ebintu Byonabyona akughe enkabi, ozaale abaana kamaala, osimukemu amaghanga kamaala.

⁴ Era akughe enkabi iwe ni baidhukulu bo nga dhe yagha Aburahamu, mutwale ensi eno y'obairemu ng'omusenze ebe yaimwe, ensi Katonda ye yagha Aburahamu oyo.”

⁵ Kale, Isaaka yaasindika Yakobo e Paddanarama ewa Labani. Labani oyo n'eyali mutabane wa Bethueli Omuarami era mwanhina Rebekka, inhina wa Esau ni Yakobo.

Esau abayiza omukazi owundi

⁶ Agho Esau yaakitegeera ati Isaaka yasabira Yakobo enkabi, era yaamusindika e Paddanarama afune eyo omukazi ow'okubayiza. Era yaakitegeera ati bweyamusabira enkabi, yamusikirira obutabayizanga mukazi Mukanaani,

⁷ era yaakitegeera nga Yakobo bweyagondera ise n'inhina, naaja e Paddanarama.

⁸ Esau bweyakitegeera nga ise tasiima bakazi Bakanaani,

⁹ yaaja ewa Ishimaeli, mutabane wa Aburahamu, yaabayiza mughala we Mahalathi, mwanhina Nebaiothi, yaamwongera ku bakazi be abandi.

Yakobo alootera e Betheli

¹⁰ Yakobo yaava mu Beerisheba, yaaja ng'ayolekeire Harani.

¹¹ Yaatuuka mu kifo aghantu yaasula agho, kuba endhuba yali egwire. Yaalambaala agho nga yeeziziike y'omutwe erindi ku mabaale ag'omu kifo ekyo.

¹² Yaaloota amadaala agasimbiibwa ku itaka, nga gatuuka ku igulu yaja okubona nga bamalaika ba Katonda bali kuganiina bwe baika!

¹³ Era okuja okubona, nga Musengwa Katonda ayemereire ghaigulu ghaago. Yaakoba ati: “Ninze Musengwa Katonda, Katonda wa dhaadha wo Aburahamu, era Katonda wa Isaaka. Ensi eno gy'olambaireku ndigikugha iwe ni baidhukulu bo.

¹⁴ Baidhukulu bo baliba bangi ng'oti nkungu ey'oku nsi. Balibuna mu nsonda dhoonadhoona edh'ensi. Era mu iwe, ni mu baidhukulu bo, amaghanga goonagoona mwe galigheerwa enkabi.

¹⁵ Bona, ndi n'iwe, ndidha kukukuumanga yoonayoona y'onaajanga, era ndidha kukwiza mu nsi eno; tirikulekulira agho, okutuusa nga mmaze okutuukiriza ebyo bye nkukobye.”

¹⁶ Yakobo yaazuuka mu ndoolo, yaakoba mule ati: “Bwenebwene Musengwa Katonda ali mu kifo kino! Aye nze mbaire tiidhi!”

¹⁷ Yaatya era yaakoba mule ati: “Ekifo kino nga kitiisa! Kiteekwa okuba nga n'endhu ya Katonda, era nga n'omulyango ogw'eigulu!”

¹⁸ Yakobo yaasituka ku nkyo, yaatoola eibaale lye yeezizika y'omutwe, yaalisimbagho yaalifukaku omuzigo libe ekiidhukizo.

¹⁹ Yaatuuma ekifo ekyo eriina Betheli. Aye ng'ekibuga ky'eyo mu kusooka kyali kyetebwa Luzi.

²⁰ Agho Yakobo yaagha obweyamo eri Musengwa Katonda ati: “Bw'onaabanga ghalala ninze, ng'onkuuma mu lugendo lwange luno, era ng'ompa eby'okulya n'eby'okuvaala,

²¹ era bw'olindhiza obukalamu mu ndhu ya lata, olwo onaabanga Katonda wange.

²² Eibaale lino lye nsimbye okuba ekiidhukizo, liriba ndhu yo, iwe Katonda, era ndikugha ekintu kirala ku buli bintu ikumi ku byonabyona by'olimpa.”