Amagezi ga Solomoni 7 - Baibuli Ekibono kya Katonda 2014

Kyabazinga aba ng'omuntu owundi yeenayeena

¹ Zeena ndi muntu buntu, afa ng'abantu abandi boonaboona. Nsimuka mu muntu oyo eyasooka, eyawumbibwa mu itaka. Maama yatoola enda yange

² olw'ensigo ey'omusaadha, bwe baali bali kunhumirwa omukwano ogw'obufumbo mu buliri. Omubiri gwange gwazimbibwa mu musaayi mu nda ya maama okumala emyezi mwenda.

³ Bwe nazaalibwa, naidha mu nsi ng'omuntu owundi yeenayeena. Naatoolera okugheera empewo ndala eyo, abandi boonaboona ye bagheera. Era ng'abantu abandi boonaboona bwe bakola, amamiro gange agaasooka kwali kulira.

⁴ Banzingirira mu bugozi, bandabirira.

⁵ Ezira kyabazinga atoolera bulamu bwe mu ngeri yindi,

⁶ kuba twenatwena tuli n'engira ndala etwingiza mu bulamu obw'ensi, era twaba n'engira ndala ey'okubuvaamu.

Solomoni ayoleka nga bw'agonza amagezi

⁷ Bwe namala okukibona nti ndi muntu buntu, naasaba Katonda era yampa okutegeera. Omwoyo ogw'Amagezi gwandidhamu.

⁸ Naabona ng'amagezi ga kitiibwa inho okuwula ekityamo eky'obwakyabazinga kyonakyona oba engule. Era bwengageza ku bukombe, mbona ng'obukombe muzira.

⁹ Waire amabaale ag'omughendo einho tosobola kugageza ku magezi kuba; bw'ota zaabu aghalala nago aba ng'oti musenho busenho, ate feeza yaaba ng'oti itosi butosi.

¹⁰ Amagezi ago nagabona nga ga mughendo inho okuwula obulamu n'okuwula emboneka enungi. Naalondagho okuba mu butangaavu bwago okusinga okuba mu butangaavu obuva ku byaka ebindi byonabyona, kuba obwago tibukendeeraku naire.

¹¹ Bwe gaidha ye ndi, n'ebirungi ebindi byonabyona byaidhiraku. Gandeetera obukombe obutaloodheka.

¹² Ebintu ebyo byonabyona nabisangaalira inho, kuba amagezi n'agaabindeetera. Aye nali tikimanhangaku nti amagezi n'agavaamu ebintu ebyo byonabyona.

¹³ Nayega amagezi ago n'omwoyo mulala, era buti ndi musangaavu okumanhisa ku bandi ebirungi byago aghazira kubisirikira.

¹⁴ Ghazira asobola kumalirirayo bukombe obuli mu magezi. Ole bw'akozesa obukombe obwo aba mukagwa wa Katonda, kuba Katonda asiima omuntu oyo olw'ebirungi by'aba ayegeire ku magezi ago.

¹⁵ Nsaba Katonda ampe okwogeranga eby'amakulu n'okulowoozanga by'ayenda ebituukana n'ebyo bye nayega. Oyo n'agalagira amagezi eky'okukola, era yaagolola abagezi okubatoola mu nsobi.

¹⁶ Bwenebwene tuli mu buyinza bwe, ka tube ife beene, oba bye twogera, oba okutegeera kwaife kwonakwona, oba obumanhirivu bwaife bwonabwona obw'ekikugu.

¹⁷ Oyo n'eyampa okumanhira irala mu butuufu ekikula ky'ebintu ebiri mu butonde, n'okumanha ensi nga bweyakolebwa, n'ebigirimu nga bwebyebisa.

¹⁸ Yampa okumanha enaku, emyezi, n'ebiseera nga bwe bikyukakyuka nga bijiira ku ndhuba.

¹⁹ N'okumanha emuunienie, n'emyaka bwe gija nga giiraganwaku.

²⁰ Yampa okumanha ekikula ky'ebitonde ebiramu n'enkola yaabyo, okumanha ensolo edh'omu nsiko nga bwe dheebisa, okumanha amaani ag'empewo, okumanha endowooza y'abantu, okumanha ebimera ebya buli nsambo n'okukozesa emizi gyabyo ng'obulezi.

²¹ Nayega ebintu ebimanhiibwa obukalamu n'ebintu ebitamanhibwangaku naire;

²² kuba amagezi ago agaaleetera buli kintu ekiri ku nsi okuwumbibwa n'agansomesa ebintu ebyo. Amagezi gali n'omwoyo ogutegeera era omutukuvu. Omwoyo ogwo guli n'ekikula kirala, aye gweyoleka mu nsambo kamaala. Tigwakolebwa mu kintu ky'osobola okubona waire okugemaku, era gwa idembe okuja buli ghe guba gwenze okuja. Omwoyo ogwo mutangaavu, munaabuufu, gwekakasa mu buli kintu era ghazira kisobola kugukolaku kabi. Gugonza inho ebirungi, gwakola obwangu, era tigughangulwa.

Ekikula ky'amagezi

²³ Omwoyo ogwo gwa kivunika era gwa mukwano n'abantu. Mukakafu, gwesigika, era guzira kigweraliikiriza naire. Guli n'obuyinza ku buli kintu era gubona buli kintu. Gwingira mu myoyo gyonagyona egitegeera era eminaabuufu gwagiinhikiza bukalamu, waire nga tigyakolebwa mu kintu ky'osobola okubona oba okugemaku.

²⁴ Amagezi gatuuka buli ghantu amangu geene okuwula ebintu byonabyona. Era olw'obunaabuufu bwago, gaingira mu buli kintu gaakiinhikiza bukalamu.

²⁵ Amagezi n'omuuka Katonda ow'amaani gw'agheera. Era amagezi n'ekitiisa ekimesunkana nga kiva ku oyo Aghanga Ebintu Byonabyona. Ghazira kintu kitali kirongoofu kisobola kweibirira ni kigaingiramu.

²⁶ Amagezi ago n'okwaka okuva ku butangaavu obw'ebyanda n'ebyanda, era n'embonerwamu eziramu kamyamya eyoleka eby'ekitiisa Katonda by'akola, n'eyoleka n'obulungi bwe.

²⁷ Amagezi ni bwe gaba nga gali gonka, gasobola okukola ekintu kyonakyona. Buli kintu gakiiza buyaaka, waire nga geene gasigala nga tigakyuseeku naire. Mu buli luse olwiragho gaja nga gaingira mu myoyo egy'abantu abatukuvu, gaabafuula bakagwa ba Katonda era abalanzi.

²⁸ Ghazira Katonda ky'agonza inho kuwula muntu ali n'amagezi.

²⁹ Amagezi malungi inho mu mboneka okuwula endhuba n'emuunienie edha buli nsambo. Mu butuufu malungi inho okuwula n'obutangaavu bwene

³⁰ kuba waire buliidho omusana guvaagho ghairagho obwire, aye ekibi tikisobola kughangula magezi.