Amagezi ga Solomoni 4 - Baibuli Ekibono kya Katonda 2014

¹ Omala gaba agho otyo ng'oziraku baana aye waaba n'empisa enkalamu, kuba empisa enkalamu dhisiimibwa Katonda n'abantu, era dhiidha kukuleetera okwidhukirwanga ebyanda n'ebyanda.

² Empisa enkalamu dhigha abantu eky'okuboneraku kye babe bajiireku, era bwe dhiba nga dhiziragho baba ni kye bafiirwa inho. Okuva eira n'eira, empisa enkalamu n'ekirabo ekisinga byonabyona okuba eky'omughendo, era n'edhisinga byonabyona okufuula omuntu okuba omukalamu abantu ye bataamu ekinhagansi.

³ Abaana abazaalibwa mu bumenhi bw'amateeka ka babe bangi batya, baidha kunhoomebwanga bunhoomebwe; kuba ti baana beene mu mateeka aye baghambule. Bali ng'oti n'ebimera ebinafu ebizira kikolo kigumu, waire okuba n'emizi egija ghansi mu itaka.

⁴ Bali ng'oti miti egiba n'emizi ku ngulu, ni gitaaku amakaba okumala akaseera obuseera. Aye olw'obutabaaku mizi gija ghansi mu itaka, empewo egiyuuza eno n'ere, kiwunga yaidha yaagikuukulagho.

⁵ Ensaga dhaagyo dhimogokaku nga dhikaali nto. N'ebibala byagyo tibyenga, okutoolaku okuba obwagho nga biziraku mugaso naire.

⁶ Ku lunaku olw'okusalirwaku omusango, abaana abaazaalibwa mu bumenhi bw'amateeka n'abaliba abadhulizi abalirumiriza abazaire baibwe ekibi kye baakola.

⁷ Aye abantu abakola ebituufu baja kufuna ekiwuumulo, ni bwebafa nga bato

⁸ kuba bwe tuta mu bakaire ekitiisa, titujiira ku kiseera kya myaka gye bamaze ku nsi.

⁹ Ku magezi ni ku kukola ebituufu, kwe tumanhira obukulu bw'omuntu n'obukaire bwe.

Enoka ng'eky'okuboneraku

¹⁰ Agho olwatuuka, ghaabaagho omusaadha nga bamweta Enoka, eyasiimyanga Katonda era nga Katonda amugonza. Katonda yatoola Enoka oyo mu boonooni, be yabanga nabo aghalala, yaamutwala.

¹¹ Katonda yamutwala alobere ebibi n'obuguya okwonoona ebirowoozo bye n'omwoyo gwe;

¹² kuba omuntu bw'atwalirizibwa einho okukola ebibi, ekyo kisobola okumuziba amaiso yaaloba kubona kirungi. Ate n'okwegomba kwona kusobola okuleetera omuntu omulungi okutwalirizibwa ebiziramu.

¹³ Omusaadha oyo Enoka yasobola okutuukiriza ebintu mu kiseera kitono kiti, ebyanditwaire emyaka n'emyaka.

¹⁴ Musengwa yasiima obulamu bwa Enoka oyo, kyeyava n'amutoola amangu mu nsi eno ey'ebibi. Abantu ekyo baakibona aye tibaakitegeera, waire okukitaaku omwoyo bakyege,

¹⁵ nti Katonda wa kivunika era asaasira abantu be, yaakuuma abalonde be abo.

Ebija okutuuka ku bakozi b'ebibi

¹⁶ Abantu abakola ebituufu ni bwebafa, balisalira omusango abakozi b'ebibi abasigala nga bakaali balamu. N'abaisuka abaatuukirira amangu mu buto bwaibwe, balireetera abakozi b'ebibi abakaire okuswala.

¹⁷ Abakozi b'ebibi balibona omugezi ng'afa, aye tibalisobola kutegeera ng'eyo n'ensambo Musengwa ye yategeka okumutwaliramu eyo ezira kibi kirimutuukaku.

¹⁸ Bwebalimubona ng'afiire balimunhooma, aye Musengwa alibasekerera busekerere. Beene bwe balifa tibaliziikibwa mu kitiisa naire. N'abafu be balyagaana e magombe balibanhoomanga era baabavumiriranga ebyanda n'ebyanda.

¹⁹ Katonda alibakuba ekigwo ghansi kyabasirisa nga tibakaasobola na kwogera ng'oti kasiru. Baliba ng'oti mmungo dha bifunfugu edh'ebizimbe ebitengeeseibwa okuva ku musingi gwene. Baliba mu bulumi bungi, era tibaliirayo kwidhukirwa kabiri.

²⁰ Baliidha okusalirwa omusango nga bali kutya, baababalira ebibi byaibwe. Ebikolwa byaibwe byene ebibi n'ebiribaleetera omusango okubasinga.