Amagezi ga Solomoni 2 - Baibuli Ekibono kya Katonda 2014

Ebidhuubo ebyonoonefu

¹ Abantu ababi baba bakyamu bwe bakoba mule bati: “Obulamu bwaife bumpi ate bwaidhula enaku, era enkomerero yaabwo bw'etuuka, omuntu azira gh'alumukira kwewonia. Ghazira muntu amanhiibwa eyavaayooku eyo e magombe n'aira.

² Okuzaalibwa kwaife kutugwaku bugwe, n'obulamu bwaife bwe buwaagho tuba ng'oti tituzaalibwangaku naire. Omuuka gwe tugheera guli ng'oti mwosi bwosi ogufuumuuka, n'ebidhuubo byaife byaba ng'oti n'obusambuka obuva ku myoyo gyaife nga giri kukuba.

³ Obusambuka obwo bwe buzikira, ng'olwo emibiri gyaife gisiriira gifuuka ivu, era ng'olwo omuuka gwe tugheera gufuuka mpewo buwewo eri agho etyo.

⁴ Ekiseera kiidha kutuuka ghabule aidhukira ekintu kyonakyona kye twakola, n'amaina gaife geene goona geerabirwe. Olwo obulamu bwaife bubitegho ng'ekinsense ky'ekire, era bubuliregho irala ng'olufu bwe luwaagho ng'endhuba erwaseeku.

⁵ Ekiseera kye tumala ku nsi kiri ng'oti kinsense ekiri kubita obubite. Ghazira asobola kuwona ng'olunaku olw'okufa kwe lumutuuseeku, kuba lwamala ira okuteebwagho lwakakasibwa nga tirukaaseesekayo mberi.”

⁶ Abantu ababi era bakoba bati: “Agho ni ka twesanhukize ku birungi ebiri mu bulamu, era tubeegho mu nsi muno nga ghazira kitweraliikiriza naire, ng'oti ni bwetwalinga nga tukaali bato.

⁷ Tunhwe omwenge ogusingamu kuba gwa mughendo, twekube n'obuwoowo obusingamu kuba bulungi, era ghalobe kubaagho kimuli kyonakyona ekitusuba mu biseera ebimuli ghe bimulikiza.

⁸ Tunoge ebimuli bya roza tubyetimbe ku mitwe ng'oti ngule, nga bikaali kuniala.

⁹ Twenatwena ka tuyoolookere mu bibinuko, buli ghantu tulekegho obumanhiso obwoleka okwedhalabya kwaife; kuba ogwo n'omugabo gwaife mu bulamu era ekyo kye tuli n'okukola.

¹⁰ “Ka tukirige abaavu ni bwebaba nga bakola ebituufu, tulobe kusaasira banamwandu, waire okuta akanhagansi mu bantu abakaire.

¹¹ Okughaguza n'amaani n'ekinaatuleetera okweyeta abatuufu, tusobole okufunanga kye twenda. Obunafu ghazira kye bugasa naire.

¹² Abantu abakola ebituufu batukaluubiriza bukaluubirize, kale tuli n'okunoonia engeri ey'okubeewonia. Batakania bye tukola, baatuvunaana okumenha Amateeka ga Musa n'obutajiira ku mpisa dha badhaadha baife.

¹³ Beefuula okuba abaidhi einho Katonda, era beeyeta mbu baana ba Musengwa.

¹⁴ Ekiseera kyonakyona baba nga bali kukontana n'endowooza yaife yoonayoona.

¹⁵ Titwenda na kubalingaku, kuba tibali ng'oti n'abantu abandi, n'engeri dhaibwe ti dhiri ng'oti n'edh'abantu abandi.

¹⁶ Eneebisa yaife bagibona nga nkyamu inho, olwo kyaba nti abantu abandi bali n'okwesamba kiisi kye tukola. Beenhuminkiriza mbu Katonda ni iseibwe, era baakitwala mbu abantu abakola ebituufu bonka n'abalifa obulungi.

¹⁷ Aye ka tuteege tubone oba nga bwenebwene kye bakoba kituufu. Ka tuteege tubone bwe biriba, nga saawa yaibwe ey'okufa etuuse.

¹⁸ Oba nga bwenebwene abakola ebituufu baana ba Katonda, Katonda oyo alibawonia abazigu baibwe.

¹⁹ Kale leka tubalebe, tubavumevume, tubatuuseeku n'obulumi. Memale tubone oba nga bwenebwene balisigala nga bakaali baikaikamu era nga baguminkiriza.

²⁰ Ka tubasalire ogw'okufa, okufa kule kwene okw'ensoni. Kasita beene bakoba bati Katonda aidha kubakuumanga.”

²¹ Abantu ababi batyo bwebalowooza, aye nga baba badaaliimye mu ndowooza yaibwe eyo. Ebibi byaibwe byene n'ebibaziba amaiso,

²² baaloba kumanha ntegeka dha Katonda edh'ekyama, waire okusuubira okugheebwa empeera ey'okwebisa mu bulamu obutukuvu era obuziraku kye bunenezebwa.

²³ Katonda yatutonda mu mboneka ye yeene, era nga tituli ba kufa.

²⁴ Yali nsaalwa ya Sitaani n'eyaleeta okufa mu nsi, era abo aba Sitaani n'abaja okufa.