Amagezi ga Solomoni 1 - Baibuli Ekibono kya Katonda 2014

Okunoonia obutuufu

¹ Imwe abafuzi abali mu nsi muno mugonzenga okukola ebituufu. Ebidhuubo byaimwe mubimalirenga ku Musengwa, mumunoonienga n'obwesimbu.

² Abo abatagezaaku kumuleba bulebe bamubona, era yeeyoleka eri abo abamwesiga.

³ Endowooza enkyamu ereetera abantu okwawukana ku Katonda, era obuyinza bwa Katonda oyo buleetera abasiru abagezaaku okumuleba okuswala.

⁴ Amagezi tigaja kuba mu muntu muguya, waire okuba mu oyo eyafuuka omwiru w'ekibi.

⁵ Omuntu yeenayeena omutukuvu yeefuga era yeesamba abantu abaguya. Yeeghala abo abaleeta ebidhuubo eby'ekisiru, era tawulira miraala nga ghaligho ebikolwa ebitali bya butuufu.

Katonda amanha bye tuja okwogera

⁶ Amagezi mwoyo era gabisa bukalamu abantu. Aye tigasonigha muntu yeenayeena avuma Katonda, kuba Katonda amanha buli muntu ekimuli mule mu mwoyo era yaawulira na buli kibono ky'ayogera.

⁷ Nga bwekiri nti Omwoyo gwa Musengwa gubunie ensi yoonayoona era gwagemerera ebintu byonabyona, Musengwa oyo amanha buli kibono abantu kye boogera.

⁸ Kale ghazira muntu yeenayeena ayogera kibi ni kitamanhibwa, ekiseera kija kutuuka afune ekibonerezo ekimujaamu.

⁹ Abantu abatatya Katonda buli kye bategeka kirinoonerezebwaku. Musengwa aliwulira buli kibono kye boogera, olwo baafuna ekibonerezo ekigwanira ebibi byaibwe.

¹⁰ Katonda awuliza buli kantu ng'oti n'omuntu ow'ensaalwa, kale ozira bw'omugisa kwemuluguunhia kwo.

¹¹ Kale weekuumenga olobe kwemuluguunhia, waire okwogera ebisongovu. Ebyo ghazira kye bikugasa, kuba kiisi ky'oyogera waire nga kya mu kyama inho tikiribulaku bikivaamu. Era okwogera eby'obuguya kuja kuzikiriza omwoyo gwo.

Katonda ti n'eyatonda okufa

¹² Oteereeteranga mwene kufa ng'okola ebibi.

¹³ Katonda ti n'eyaleeta okufa, era ebintu ebiramu bwe bifa tasangaala naire.

¹⁴ Yatonda ebintu byonabyona nga bya kubangagho ekiseera kyonakyona nga biramu bukalamu, nga birungi era nga biziramu kiita. Bwenebwene okufa tikufuga nsi eno,

¹⁵ kuba obutuufu bwa Katonda tibuja kuwaagho.

¹⁶ Abantu abatatya Katonda n'abeereetera beene okufa olw'ebyo bye boogera ni bye bakola. Beesumba okubona okufa ng'oti n'ole bwe yeesumba okubona ku mugonzi we. Baamala baataagho n'enkolagana n'okufa okwo, era mu nsambo eyo baaba ng'eky'okufa n'ekibagwaniire.