Ab'e Roma 6 - Baibuli Ekibono kya Katonda 2014

Okuba abalamu mu Kurisito

¹ Kale tunaakoba tutya? Tweyongere okukola ebibi memale ekisa kya Katonda kyeyongere?

² Busa naire. Oba nga olw'ekibi twafa, kabiri tughanga tutya okuba nga tukaali balamu mu kibi?

³ Bwenebwene ife abaabatizibwa mu Kurisito Yesu, twabatizibwa ni mu kufa kwe.

⁴ Bwe twabatizibwa, twaziikibwa naye era twagabana ku kufa kwe. Kale nga Kurisito bwe yazuukizibwa mu bafu olw'ekitiisa kya Lata, twena tubenga mu bulamu obuyaaka.

⁵ Kale oba nga twafiira ghalala naye, bwenebwene tulizuukirira ghalala naye.

⁶ Twidhi ng'obulamu bwaife obw'eira bwakomererwa ghalala ni Kurisito ku musalaba, omubiri ogukola ebibi gusobole okuzikirizibwa, tulobe kwirayo kabiri kuba bairu ba kibi.

⁷ Omuntu bw'afa aba takaafugibwa kibi.

⁸ Twena oba nga twafiira ghalala ni Kurisito, twikiriza nga tuliba balamu ghalala naye.

⁹ Kuba twidhi tuti nga Kurisito bwe yazuukira mu bafu taja kufa kabiri, okufa tikukaamufuga.

¹⁰ Okufa kwe yafa kwali kufa olw'ekibi yafa omukuzi mulala byawa, mperaano mulamu mu bulamu bwa Katonda.

¹¹ Mu nsambo n'endala mwena muteekwa okwetwala ng'abaafa olw'ekibi, aye atenga muli balamu mu bulamu bwa Katonda mu Kurisito Yesu.

¹² Kale ni timuganhanga kibi kufuga mu mibiri gyaimwe egifa, ni mugondera okwegomba kwagyo okubi.

¹³ Timughangayo bitundu bya mibiri gyaimwe y'ekibi okubikozesa mu kwonoona. Aye mweghengayo ye Katonda oti n'abantu abaviire mu kufa ni baira mu bulamu, era mwegheereyo irala ye Katonda abakozesenga ebikolwa eby'obutuufu.

¹⁴ Ekibi kitairangayo kubafuga, kuba Amateeka ti n'agabafuga, aye ekisa kya Katonda.

Abairu ab'ebikolwa eby'obutuufu

¹⁵ Kale tukole tutya? Tukole ekibi kuba tufugibwa ekisa kya Katonda? Busa naire.

¹⁶ Timwidhi nga bwe mweghaayo ng'abairu abawulize, muba bairu b'ekyo kye mugondera? Bwe mutaba bairu ba kibi ekireeta okufa, muba bairu ba buwulize obubaleetera okuba abatuukirivu ye Katonda.

¹⁷ Aye Katonda yeekaza, kuba mwali nga muli bairu ba kibi, aye mwaganha n'omwoyo gwaimwe gwonagwona ebyo ebyali mu kwegeresebwa kwe mwagheebwa.

¹⁸ Mwava mu kibi mwafuuka abairu b'obutuufu bwa Katonda.

¹⁹ Ndhogera ng'omuntu obuntu, olw'obunafu obw'okutegeera kwaimwe. Ng'era bwe mweghangayo ni muba abairu mu kukola eby'eiko ni mu kwonoona, ni mukola ebibi, kale ni mperaano mwegheereyo irala ng'abairu ab'obutuufu, musobole okutukuzibwa.

²⁰ Bwe mwali nga muli bairu ba kibi mwali nga timufugibwa butuufu.

²¹ Aye mwaganhulwamu ki okukola ebintu ebyo ebibagemya n'ensoni mperaano? Kuba enkomerero y'ebintu ebyo kufa.

²² Aye mperaano mwava mu kibi mwafuuka abairu ba Katonda. Kino kibaleeteire okutukuzibwa n'okufuna obulamu obutawaagho.

²³ Empeera y'ekibi kufa, aye ekirabo kya Katonda n'obulamu obutawaagho bwe tufuna mu Kurisito Yesu Musengwa waife.