Ab'e Roma 5 - Baibuli Ekibono kya Katonda 2014

Ebiva mu kutukuzibwa

¹ Kale oba nga mu maiso ga Katonda tubalibwa okuba abatuukirivu lwa kwikiriza, tuba n'emiraala ku lwa Musengwa waife Yesu Kurisito.

² Ku lulwe twafuna okusaasirwa kwa Katonda kuno kwe tulimu, era tusagamba nga twesunga okugabana ku kitiisa kya Katonda.

³ Era tusagamba ni mu kudaagadaaga kwaife kuba twidhi tuti okudaagadaaga kuvaamu okuguminkiriza,

⁴ okuguminkiriza kwavaamu okusiimibwa Katonda, era okusiimibwa okwo kwavaamu eisuubi.

⁵ Eisuubi lino tirituswaza, kuba Katonda ayugha okugonza kwe mu myoyo gyaife ku lwa Mwoyo Mutukuvu ye twagheebwa.

⁶ Bwe twali nga tukaali mu bibi byaife, Kurisito yafiirira aboonooni, mu kiseera Katonda kye yalonda.

⁷ Kiba kikalangafu ole okufiirira omuntu akola ebituufu, waire nga ghasobola okubaagho akana okufiirira omuntu omukalamu.

⁸ Aye Katonda ayolekera irala nga bw'atugonza, kuba bwe twali nga tukaali mu bibi byaife, Kurisito yatufiirira.

⁹ Mperaano nga bwe tubalibwa okuba abatuukirivu olw'okufa kwe, tuja kulokolebwa tuwone obusungu bwa Katonda

¹⁰ kuba bwe twali nga tukaali bazigu ba Katonda, okufa kw'Omwana we kwatuleetera okwisania naye. Mperaano nga bwe twisania naye, obulamu obw'Omwana we bwidha kutulokolera irala.

¹¹ Aye ti ekyo kyonka, aye tusagambira mu Katonda ku lwa Musengwa waife Yesu Kurisito atusobozeisa okwisania ni Katonda.

Adamu ali oti ni Kurisito

¹² Ng'ekibi bwe kyaidha mu nsi olw'omuntu omulala ni kireeta okufa, okufa kwabuna abantu boonaboona kuba baayonoona.

¹³ Ekibi kyaligho mu nsi ng'Amateeka gakaali kugheebwa, aye aghazira Mateeka ghazira avunaanwa kibi.

¹⁴ Aye okuviira irala ku Adamu okutuukiza irala ku Musa, okufa kwafuga abantu boonaboona ng'omwo mw'otwaliire abataayonoona ng'oti ni Adamu eyadheemera Katonda. Adamu yali afaananaku n'oyo eyali aja okwidha.

¹⁵ Aye ekirabo kya Katonda tikyagayaga na kibi kya Adamu. Kuba oba nga abantu kamaala baafa olw'ekibi eky'omuntu omulala, ekisa kya Katonda n'ekirabo kye, kye yagha ng'abita mu muntu omulala Yesu Kurisito kibuna abantu kamaala okusingagho.

¹⁶ Ekirabo kya Katonda, n'ebyava mu kibi eky'omuntu oyo omulala tibifaanana kuba ebyava mu kibi ekyo byali bantu kusalirwa musango kubasinga. Aye kye baafuna olumaliira olw'ebibi kamaala, kwali kugheebwa butuukirivu.

¹⁷ Oba nga olw'ekibi eky'omuntu omulala, okufa kwaligho nga kufuga olw'omuntu oyo omulala, memale abo abafuna okusaasirwa kwa Katonda okungi einho n'ekirabo eky'obutuukirivu, tibalisingagho inho okufugira mu bulamu, olw'omuntu omulala Yesu Kurisito?

¹⁸ Kale ng'ekibi eky'omuntu omulala bwe kyasingisa abantu boonaboona omusango, mu nsambo n'endala ekikolwa eky'obutuufu ekyakolebwa omuntu omulala, kyaleetera abantu boonaboona okutoolebwaku omusango n'okugheebwa obulamu.

¹⁹ Era ng'okudheema okw'omuntu omulala bwe kwaleetera abantu kamaala okuba aboonooni, n'obuwulize obw'omuntu omulala butyo bwe bulireetera abantu kamaala okuba abatuukirivu.

²⁰ Amateeka gaidha ekibi kyeyongere. Aye ekibi ye kyakoma okweyongera, n'ekisa kya Katonda ye kyakoma okweyongera.

²¹ Kale ng'ekibi bwe kyafugira mu kufa, n'ekisa kya Katonda kityo bwe kyafugira mu butuufu, okutuusa ku bulamu obutawaagho, ku lwa Yesu Kurisito Musengwa waife.