Ab'e Roma 15 - Baibuli Ekibono kya Katonda 2014

Okuyamba abanafu

¹ Ife ab'amaani mu kwikiriza tugwaine okuyambanga abo abanafu mu kwikiriza, aye ti kwefaaku twenka.

² Kiisi muntu afubenga okukola ekisanhusa mwine olw'okumuzimba mu kwikiriza

³ kuba ni Kurisito tiyefaaku yenka, era kyaghandiikibwa kiti: “Ebivumo by'abo abakuvuma, byaira ku nze.”

⁴ Byonabyona Ebyaghandiikibwa eira, byaghandiikibwa olw'okutwegeresa tusobole okubanga n'eisuubi olw'okuguminkiriza n'olw'amaani, ebiva mu Byaghandiikibwa.

⁵ Era Katonda ensimuko y'okuguminkiriza era atwizaamu amaani, abaghe okwisania nga Kurisito Yesu bw'asiima.

⁶ Musaake Katonda Lata wa Musengwa waife Yesu Kurisito nga mwogera n'omwoyo mulala.

Amawulire Amalungi ag'abamaghanga agandi

⁷ Buli muntu asangaazenga mwine nga Kurisito bwe yabasangaaza, olwo Katonda agheebwe ekitiisa.

⁸ Ka mbakobere, Kurisito yafuuka omugheereza w'abayudaaya, ayoleke nga Katonda bw'ali omwesigwa, era atuukirize ebisuubizo Katonda bye yasuubiza badhaadha baife,

⁹ era abamaghanga agandi basobole okusaaka Katonda olw'okusaasira kwe. Nga bwe kyaghandiikibwa kiti: “Kale ni nnaakwebazanga mu bamaghanga agandi; nnaayemba nga nsaaka eriina lyo.”

¹⁰ Ate kabiri ekyaghandiikibwa kikoba kiti: “Imwe abamaghanga agandi, musagambire ghalala n'abantu be.”

¹¹ Era kabiri kiti: “Mwenamwena abamaghanga agandi musaake Musengwa. Era abantu boonaboona bamusaake.”

¹² Era ni Isaia akoba ati: “Mwidhukulu wa Yesse aliidha, baamutaagho okufuga abamaghanga agandi. Era mu oyo eisuubi lyaibwe mwe liriba.”

¹³ Katonda, ensimuko ey'okusuubira, abaidhuze eisanhu n'emiraala olw'okumwikiriza, mughange okweyongeranga okuba n'eisuubi olw'amaani ga Mwoyo Mutukuvu.

Ensonga lwaki Paulo aghandiika n'obugumu

¹⁴ Zeena mwene, aboluganda, nkakasa nga mwidhwire empisa enkalamu era n'okumanha okwidhuvu, era nga musobola okulambagana.

¹⁵ Aye mu mbaluwa eno, aghandi mpandiise n'obugumu nga ndiku ni bye mbaidhukiza. Kino nkikoze kuba Katonda yansaasira

¹⁶ okuba omugheereza we mu bamaghanga agandi. Nkola omulimo ogw'obwakabona nga nkobera abantu Amawulire Amalungi agava ewa Katonda, abamaghanga agandi babe ng'ekirabo ky'asiima nga kitukuziibwa Mwoyo Mutukuvu.

¹⁷ Kale ni mu Kurisito Yesu mpanga okwesuuta olw'omulimo gwe nkoleire Katonda.

¹⁸ Ndidha kuguma ndhogere ku ebyo byonka Kurisito bye yankolera okusobozesa abamaghanga agandi okugondera Katonda. Yakozesa ebibono byange n'ebikolwa byange

¹⁹ mu maani ag'obumanhiso n'ebyewuunhio, ni mu maani aga Mwoyo Mutukuvu. Kale ntyo okuviira irala e Yerusalemu okutuukira irala mu Iluriko, nkobera abantu Amawulire Amalungi aga Kurisito.

²⁰ Kye nuyirira buliidho n'okukobera abantu Amawulire Amalungi mu bifo ebyo Kurisito y'atawulirwangaku, ndobe kuzimba ku musingi gwa muntu wundi.

²¹ Aye nga bwe kyaghandiikibwa kiti: “Abo abatakoberwanga bimugemaku balimubona, era n'abatamubonangaku balimutegeera.”

Entegeka ya Paulo okukyalira ab'e Roma

²² Eno n'ensonga eyandobera emikuzi kamaala okwidha okubakyalira.

²³ Aye, mperaano nga bwe nfundikiire emirimo gyange mu biketezo bino, nga mmaze emyaka kamaala nga neegomba okwidha okubabonaku,

²⁴ bwe ndiba nga nja mu Supania, nsuubira okubitiraku ewaimwe eyo mbaboneku enaku edhigheraku. Bwe ndiba mmaze okusanhukiraku aghalala n'imwe, nhenda munhambe okuntuusa mu Supania.

²⁵ Aye mperaano nja Yerusalemu okutwalira abantu ba Katonda obuyambi,

²⁶ kuba ab'omu Bikunsu by'Abaikiriza mu Kurisito eby'e Makedonia n'eby'omu Akaia, baasiima ku bwaibwe okuyamba abantu ba Katonda abaavu abali mu Yerusalemu.

²⁷ Ekyo beene n'abaasalagho okukikola, aye era baali n'eibandha okuyamba abaavu abo kuba Abayudaaya baagabiraku amaghanga agandi ku birungi byaibwe eby'omwoyo. Kale abamaghanga agandi boona bateekwa okuyamba Abayudaaya mu by'omubiri.

²⁸ Kale bwe ndimala okukola omulimo ogwo era nga mmaze okubagemya byonabyona ebyabagheerezebwa, ndivaayo, naabitira e waimwe nga nja e Supania.

²⁹ Bwe ndiidha, ndidhi nga ndiidha n'emikisa gya Kurisito gyonagyona.

³⁰ Aboluganda, mbeeghemba ku bwa Musengwa waife Yesu Kurisito era n'olw'okugonza kwa Mwoyo Mutukuvu mweyimbe ghalala ninze mu kunsabira.

³¹ Munsabire mpone abataikiriza abali mu Buyudaaya, era n'abantu ba Katonda abali mu Yerusalemu basiime bye mbatwalira.

³² Olwo ni Katonda bw'aliba nga asiimye ndiidha okubakyalira nga ndi n'eisanhu lingi, mpuumulireku e waimwe.

³³ Katonda mwene kugaba miraala, abe n'imwe mwenamwena. Amiina.