Ab'e Kolosai 1 - Baibuli Ekibono kya Katonda 2014

Okulamusa

¹ Ninze Paulo omutume wa Kurisito Yesu olw'okwenda kwa Katonda, aghalala n'owoluganda Timotheo.

² Mpandiikira abatuukirivu n'aboluganda abeesigwa mu Kurisito ab'e Kolosai. Enkabi n'emiraala ebya Katonda Iseife bibe n'imwe.

Okusiima

³ Buli kaakyeire twebaza Katonda Lata wa Musengwa waife Yesu Kurisito nga tubasabira,

⁴ kuba twawulira okwikiriza kwe muli nakwo mu Kurisito Yesu, n'okugonza kwe mugonzaamu abatuukirivu boonaboona

⁵ olw'ebyo bye musuubira, ebyabakuumirwa mu igulu. Bino mwabiwuliraku mu bibono eby'amazima, Amawulire Amalungi.

⁶ Amawulire gano agaabakoberwa era agaakoberwa ensi yoonayoona, galeese ebibala ng'oti ni bwe gabaire gakola mu imwe okuva ku lunaku lwe mwawulira era ni mumanha ekisa kya Katonda mu mazima.

⁷ Mwakyega okuva ku Epafura mugheereza munaife era ye tugonza einho, omugheereza wa Kurisito omwesigwa ku lwaife.

⁸ Era n'eyatukobera okugonza kwe muli nakwo, Mwoyo kw'abagha.

Kurisito ni by'akola

⁹ Olw'ekyo, kyetuva ni tubasabira buliidho okuva lwe twawulira ebibafaaku, nga tusaba Katonda abaghe mu bwidhuvu okumanha by'ayenda era abaghe amagezi n'okutegeera byonabyona Mwoyo we by'agaba.

¹⁰ Agho musobole okwebisa nga Musengwa bw'ayenda era nga mukola ebimusangaaza mu buli nsambo nga kiisi kye mukola kikalamu era nga kyania ebibala, era mweyongere n'okumanha Katonda.

¹¹ Mukalanguke olw'amaani goonagoona agaabagheebwa okuva mu bukumu bwe obw'ekitiisa, mughange okugumira buli kintu n'obuguminkiriza era n'okusagamba.

¹² Mweyanzenga Lata eyatugwaniza okuba aghalala n'abatuukirivu mu butangaavu.

¹³ Yatutoola mu bufuge obw'ekizikiiza yaatwiza mu Bwakyabazinga obw'Omwana we omugonzi.

¹⁴ Mu oyo mwe tufunira okununulibwa era n'okusoniyibwa ebibi.

¹⁵ Kurisito ye tuboneramu Katonda ataboneka, omwana omuberi akulira ebitonde byonabyona.

¹⁶ Mu oyo ebintu byonabyona mwe byatonderwa: Ebiri mu igulu, ebiri mu nsi, ebiboneka, n'ebitaboneka. Ka bibe bityamo bya bakyabazinga oba bakyabazinga beene, oba abaami oba ab'obuyinza ebintu byonabyona byatonderwa mu oyo, era ku lulwe.

¹⁷ Oyo yaligho ng'ebintu byonabyona bikaali kubaagho era mu oyo ebintu byonabyona bibaagho.

¹⁸ Oyo n'omutwe ate Ekikunsu ky'Abaikiriza mu Kurisito n'omubiri gwe, oyo n'entoolerezo era n'omwigula nda mu kuzuukira memale abe emberi wa byonabyona.

¹⁹ Kuba Katonda mwene yasiima mu kwenda kwe Obwakatonda bwe bube mu oyo mu bwidhuvu,

²⁰ era abite mu oyo okwiza ebintu byonabyona y'ali ka bibe ebiri mu igulu oba ebiri ku nsi. Katonda atyo bwe yaleeta emiraala ng'abita mu kufa kw'Omwana we ku musalaba.

²¹ Eira mwali ghala ni Katonda, era nga muli bazigu be olw'ebidhuubo byaimwe n'ebikolwa ebibi bye mwakolanga.

²² Aye mperaano olw'okufa kwa Kurisito mu mubiri, yabafuula bakagwa be, musobole okuba mu maiso ge nga muli batukuvu, abaziraku kimyamya kyonakyona era waire kibi kyonakyona.

²³ Aye niini, muli n'okuba n'okwikiriza nga mwekalangwire aghazira kwekyusa, era nga timuviire ku kusuubira okw'Amawulire Amalungi ge mwawulira. Zeena Paulo nafuuka mugheereza w'Amawulire gano agaakoberwa buli kitonde kyonakyona ekiri ghansi gh'eigulu.

Emirimo gya Paulo mu Kikunsu eky'Abaikiriza mu Kurisito

²⁴ Ndi musangaavu buti olw'okudaaga kwe ndaaga ku lwaimwe, era mu mubiri gwange nhambaku okumaliriza ebyo ebyasigalira mu kudaazibwadaazibwa kwa Kurisito ku lw'omubiri gwe. Omubiri gwe guno n'Ekikunsu eky'Abaikiriza mu Kurisito.

²⁵ Katonda yanfuula omugheereza ow'ekikunsu kino ku lwaimwe mbaleetere ekibono kye mu bwidhuvu.

²⁶ Okubamanhisa ekyama ekyali kigisiibwa ebyanda n'ense, aye buti ekyabwikulirwa abatuukirivu be.

²⁷ Abo Katonda be yasiima okumanhisa obukombe obw'ekitiisa obuli mu kyama ekyo, mu bamaghanga agandi. Ekyama ekyo ni Kurisito ali mu imwe era eisuubi ery'ekitiisa ekiri kwidha.

²⁸ Oyo, ife ye tukobera buli muntu. Tulabula era twegeresa buli muntu mu magezi goonagoona tughange okuleeta buli muntu ewa Katonda ng'atuukiriire mu Kurisito.

²⁹ Kino kye ntakabanira era ni nfaabiikana, mwene nga n'akolera mu nze n'amaani ge.