Ab'e Galatia 6 - Baibuli Ekibono kya Katonda 2014

Abaikiriza bali n'okuyambagananga

¹ Aboluganda, omuntu yeenayeena bw'ayagaanibwa ng'akoze ekisobyo kyonakyona, abo abafugibwa Mwoyo mu imwe mugwaine okumugoloza, aye nga timukozesa bukambwe. Aye mwekuumenga mwena mulobe kukemebwa.

² Buli muntu ayambenga mwine, olwo mube nga mutuukiriiza eiteeka lya Kurisito.

³ Kuba oyo eyeebona nga kintu kikulu ate nga tali, yeesubagha mwene.

⁴ Aye buli muntu alinge mu by'akola abone oba nga mulimu ebikalamu, yeesiime mu mwoyo gwe, aye ti lwa kuba nga by'akola bikalamu okusinga eby'owundi.

⁵ Kuba buli muntu ali n'okubbeeda omugonero gwe.

⁶ Oyo ayegeresebwa ekibono, atoole ku bibye byonabyona agheeku oyo amwegeresa.

⁷ Muteesubaghanga: Katonda, ghazira asobola kumusirughaza. Kiisi muntu ky'asiga ky'alikungula.

⁸ Kuba asiga mu kwegomba kw'omubiri gwe, mu mubiri alikungula kufa aye asiga mu Mwoyo wa Katonda, mu Mwoyo oyo alikungula obulamu obutawaagho.

⁹ Kale ka tulobe kukoogha mu kukola obukalamu; kuba bwe tutawaamu maani, ekiseera eky'okukungula bwe kirituuka tulifuna okukungula okw'omwero.

¹⁰ Agho ni buli lwe tunaafunanga akaghagaanhia, tugwaine tukolerenga abantu boonaboona ebirungi n'okusingira irala abo be tuli nabo mu kika ekirala mu kwikiriza.

Okulabula n'okusiibula

¹¹ Mubone obunene obw'enukuta dhe mpandiise n'omukono gwange mwene!

¹² Abantu abo abagezaaku okubakaka okukeketebwa, n'abo abenda okwesuuta mu by'oku ngulu. N'ekindi, benda kweghala kukirigibwa olw'omusalaba gwa Kurisito.

¹³ Kuba n'abo beene abajiira ku ky'okukeketebwa tibagema Mateeka, aye benda imwe mukeketebwe olwo beesuute olw'okubapikiriza ni muganha omukolo obukolo ogwo ogukolebwa ku mubiri.

¹⁴ Aye nze neesuuta lwa musalaba gwa Musengwa waife Yesu Kurisito gwonka kuba ku musalaba okwo ensi ngibona nga kwe yakomererwa, yoona yambona nga kwe nakomererwa.

¹⁵ Kuba ekikulu n'okufuuka ekitonde ekiyaaka, aye ti kukeketebwa oba obutakeketebwa.

¹⁶ Emiraala n'okusaasira bibe ku abo boonaboona abajiira ku iteeka lino ni ku bantu ba Katonda boonaboona.

¹⁷ Nga mmaliriza mbakoba nti: ghatabanga kabiri ayongera kundaaza, kuba ku mubiri gwange ndiku enkovu olwa Yesu.

¹⁸ Aboluganda, enkabi dha Musengwa waife Yesu Kurisito dhibe n'imwe. Amiina.