Ab'e Galatia 5 - Baibuli Ekibono kya Katonda 2014

Musigale nga mwetaaya

¹ Okutuuka ku kwetaaya kuno, Kurisito n'eyatuteekuza okuva mu bwiru. Kale ni mwekalangule mulobe kweiza kabiri mu bwiru obwo.

² Nze mwene Paulo mbakobera nti, bwe muganha okubakeketa, kiba kitegeeza nga Kurisito azira muganhulo ye muli.

³ Era kabiri nhenda okubalabula, nti kiisi muntu aganha okumukeketa ateekwa okutuukiriza Amateeka goonagoona.

⁴ Era abo ku imwe abenda okuba abatuukirivu olw'okutuukiriza Amateeka, mwekutwire ku Kurisito beene era muviire mu kisa kya Katonda.

⁵ Aye ife nga tubita mu Mwoyo olw'okwikiriza, tuteegerera nga tuli n'eisuubi ery'okugheebwa obutuukirivu;

⁶ kuba bwe tweyimba mu Kurisito Yesu, okukeketebwa n'obutakeketebwa byaga. Ekikulu n'okwikiriza okweyolekera mu kugonza.

⁷ Ate ni, mwali mukola bukalamu naani eyabalekeza okugondera amazima?

⁸ Okusendasenda okwo tikwava eri oyo eyabeeta.

⁹ Aye nga bwe bakoba: “Kaba kazimbulukusa katono kaazimbulukusa ogutole ogw'engaano gwonagwona.”

¹⁰ Mu Musengwa nkakasa nti timwidha kuja na birowoozo bindi bitafaanana na byange era nti oyo abatabula ni bw'aliba ani alibonerezebwa.

¹¹ Aye aboluganda, oba nga mu kwegeresa kwange nkaakoba abantu okukeketebwa, lwaki bakankiriga? Era nguli ekyo kityo bwekiri, nguli bye ndhegeresa ku musalaba tibikaali kitimuguunha.

¹² Abantu abo ababatabula, kye mbendeza kweketeraku irala!

¹³ Aye imwe aboluganda, mwayetebwa kwetaaya. Aye mutaganha kwetaaya kwaimwe okwo kubaviiramu kufugibwa kwegomba kwa mibiri gyaimwe. Aye mu kugonzania mugheerezaganie

¹⁴ kuba Amateeka goonagoona gatuukirizibwa lino eirala erikoba liti: “Ogonzanga muntu mwino oti ni bwe weegonza mwene.”

¹⁵ Aye bwe munaira agho okumoodhagana n'okudaazadaaza banaimwe mugwaine mwekuume, kuba musobola okwezikiriza beene na beene.

Okufugibwa omwoyo n'okufugibwa omubiri

¹⁶ Kino ni kye nkoba, muleke obulamu bwaimwe bufugibwe Mwoyo, mulobe kugondera kwegomba kwa mubiri.

¹⁷ Kuba omubiri bye gwenda Mwoyo by'atenda, ate Mwoyo by'ayenda omubiri bye gutenda. Kiisi kirala kitakania kiinaakyo, waaloba kusobola kukola nga bw'oyenda.

¹⁸ Aye Mwoyo bw'aba nga n'akugalagira oba tofugibwa Mateeka ago.

¹⁹ Omubiri bye gukola tibyegisa era ni bino: Okwenda, obudankaanu, okughemula,

²⁰ okusinza ebitali Katonda, okuloga, enzigu, okukanamuka, ensaalwa, okudhuunadhuuna, okwebitiriza, okuba n'obutaisania, okweyawulamu,

²¹ okweyendeza eby'abandi, okutamiira, okwemalira mu bibinuko, n'ebindi ebiri ng'oti n'ebyo. Mbalabula ng'oti bwe nabalabulaku eira, nti abantu abakola ebintu ebyo tibaliba na mugabo mu Bwakyabazinga bwa Katonda.

²² Aye Mwoyo aleeta kugonzania, kusagamba, kwisania, kuguminkiriza, kisa, kubisa bandi bukalamu, kwesigibwa,

²³ buwombeefu, na kwefuga. Ebyo biziraku iteeka libitakania.

²⁴ Era abo aba Kurisito Yesu, baakomerera ku musalaba omubiri gwaibwe, n'empisa dhaagwo n'amairu gaagwo.

²⁵ Oba nga Mwoyo yatugha obulamu, tuleke afuge obulamu bwaife.

²⁶ Tulobe kwegungumaza, waire owundi okwesonsa ku mwine, oba okumugemerwa ensaalwa.