Ab'e Galatia 4 - Baibuli Ekibono kya Katonda 2014

¹ Aye omusika bw'aba ng'akaali muto, ni bw'aba ng'asise ebintu byonabyona aba ng'omwiru;

² kuba aba mu mikono gya bakuza na basigire okutuusa ekiseera lata we kye yataagho.

³ Kityo bwe kyali n'ife, bwe twali tuli baana bato twali bairu ba misambwa gyonagyona egy'oku nsi kuno.

⁴ Aye ekiseera ekironde bwe kyatuuka, Katonda yaatuma Omwana we mwene. Yaazaalibwa omukazi era yaafugibwa Amateeka,

⁵ anunule abo abaali bafugibwa Amateeka ago, era twena olwo tusobole okufuuka abaana ba Katonda.

⁶ Era olw'okuba muli baana be, Katonda kyeyava n'atuma Mwoyo w'Omwana we angire mu myoyo gyaife. Mwoyo oyo ayeta ati: “Abba!” Ekitegeeza “Iseife.”

⁷ Kale olw'ekyo, timukaali bairu ba misambwa aye abaana ba Katonda. Era nga bwemuli abaana ba Katonda, Katonda oyo aja kubagha byonabyona by'agha abaana be.

Paulo alaga nga bw'alumirwa ab'e Galatia

⁸ Eira, bwe mwali nga mukaali kumanha Katonda, mwali bairu ba bintu, mu butuufu ebitali bakatonda.

⁹ Aye mperaano nga bwe mwidhi Katonda, oba ka nkobe nga Katonda bw'abaidhi, musobola mutya kabiri okwiramu okufugibwa emisambwa egy'oku nsi kuno, eminafu era egizira kye gigasa? Mwenda kabiri mube bairu ba bintu ng'oti n'ebyo?

¹⁰ Mukuza enaku, emyezi, n'ebiseera eby'endhawulo eby'omwaka, era n'emyaka.

¹¹ Mpulira okutya nti omulimo gwe nabakolamu gwandiba nga gwafa bwereere.

¹² Mbeeghembye aboluganda mufuuke ng'oti ninze, kuba era zeena nafuuka ng'oti niimwe. Mu butuufu bwene muzira kisobu kye mwankola

¹³ kuba bwe muba mwidhukira, yali nsonga ya bulwaire bwange n'eyandeetera okubakobera Amawulire Amalungi omukuzi ogwasooka.

¹⁴ Aye waire engeri omubiri gwange ye gwalimu yabakaluubiriza, timwannhooma oba okuneekanansa. Mwansangaalira ng'oti ndi malaika wa Katonda, kabiri oti ninze Kurisito Yesu mwene.

¹⁵ Okusangaala okwo kwaja gha? Kuba nkakasa nti nguli mwali musobola mwanditunduiremu n'amaiso gaimwe mwagampa naabonesa.

¹⁶ Olwo mperaano nfuuse muzigu waimwe olw'okubakobera ekituufu?

¹⁷ Abantu abo beefuula okuba ng'ababalumirwa einho, aye ng'ate ensonga ebakoza ekyo ti nkalamu. Kye benda n'okubatangira olwo mujiire ku byaibwe.

¹⁸ Okulumirwa okwo buliidho ti kubi ensonga bw'eba nga nkalamu, nze ni bwe mbaayo oba ni bwe ntabaayo.

¹⁹ Bwana bwange obugonzi, ng'omukazi bw'alumwa ng'azaala, zeena bwenumwa ku lwaimwe okutuusa Kurisito lw'alitondebwa mu myoyo gyaimwe.

²⁰ Neegombye inho okuba n'imwe buti nsobole okukyusaamu ku ndhogera yange. Nga muneeraliikiriiza inho!

Tutwale Sara ni Hagari ng'eby'okuboneraku

²¹ Munkobere, imwe abenda okufugibwa Amateeka, timuwulira Mateeka kye gakoba?

²² Kuba kyaghandiikibwa kiti Aburahamu yali ni batabane babiri, nga owundi yamuzaala mu mukazi mwiru, ate owundi yaamuzaala mu mukazi waagho.

²³ Mutabane we ow'omwiru omukazi yazaalibwa mu nsambo yabuliidho, aye ow'omukazi waagho yazaalibwa ng'ekisuubizo kya Katonda bwe kyali.

²⁴ Amakulu ga bino gali nga ga lufumo: Abakazi abo bombi obageza ku ndagaano eibiri. Owundi ava ku lusozi Sinai yaazaala abaana abairu, era oyo nga ni Hagari.

²⁵ Hagari oyo, n'olusozi Sinai oluli mu Buwarabu era afaanana ni Yerusalemu ekya mperaano, ekiri mu bwiru n'abantu baakyo boonaboona.

²⁶ Aye Yerusalemu eky'omu igulu kiziramu bwiru era ni inhaife.

²⁷ Kuba ebyaghandiikibwa bikoba biti: “Sagamba, iwe omugumba atazaala. Timbuka oseke era okube emirali iwe atawulirangaku ku bisa bya mwana! Kuba omukazi ye baaleka agho aliba n'abaana kamaala okusinga omukazi owa iba atavangaghooku.”

²⁸ Kale ife, aboluganda, tuli baana ba Katonda olw'ekisuubizo kye, ng'oti ni Isaaka bwe yali.

²⁹ Nga mu biseera ebyo bwe kyali, omulenzi eyazaalibwa mu nsambo yabuliidho bwe yakiriga ole eyazaalibwa ku bwa Mwoyo wa Katonda, ni mperaano bwekiri.

³⁰ Aye ebyaghandiikibwa bikoba ki? Bikoba biti: “Binga omukazi omwiru n'omwana we, kuba omwana w'omwiru taliba ni ky'agabana ku bintu bya ise n'omwana w'omukazi waagho.”

³¹ Kale aboluganda, ife tituli baana ba mukazi mwiru, tuli ba mukazi waagho.