Ab'e Galatia 3 - Baibuli Ekibono kya Katonda 2014

Kwikiriza oba Mateeka

¹ Imwe abantu ab'e Galatia abazira magezi, muli baloge? Abantu abainhonholwa obukalamu, ni mubona Yesu Kurisito nga bwe yakomererwa ku musalaba!

² Ka mbabuuzeeku kino kyonka: Mwafuna Mwoyo lwa kukola ng'Amateeka bwe galagira oba lwa kuwulira nakwikiriza bya Yesu?

³ Musobola okuba abasiru okwaga agho? Mwatoolera na Mwoyo wa Katonda, mperaano mwenda kufundikira na maani gaimwe imwe beene?

⁴ Okubita kwaimwe mu bintu ebingi bityo, bwene kwali kudaagira bwereere? Aye tirowooza nga bwene kwali kudaagira bwereere!

⁵ Katonda oyo abagabira Mwoyo era n'akola ebyewuunhio mu imwe, akola atyo lwa kuba mukola ng'Amateeka bwe galagira oba lwa kuba muwulira era mwaikiriza?

⁶ Ebyaghandiikibwa bikoba ku Aburahamu biti: “Yaikiriza Katonda, yaabalibwa okuba omutuukirivu.”

⁷ Kale agho mubona ng'abali n'okwikiriza ni baidhukulu ba Aburahamu beene.

⁸ Era ebyaghandiikibwa byakirengera nga Katonda aligha abamaghanga agandi obutuukirivu olw'okwikiriza, kye byava ni birangirira eri Aburahamu Amawulire Amalungi nga n'ebiseera bikaali ghala biti: “Mu iwe amaghanga goonagoona mwe galigheerwa omukisa.”

⁹ Agho ni, abo boonaboona abali n'okwikiriza kyebava ni bagheebwa omukisa nga Aburahamu yeena bwe yagheebwa olw'okwikiriza.

¹⁰ Abo abeesigama ku kukola ng'Amateeka bwe galagira bakolimirwe, kuba ebyaghandiikibwa bikoba biti: “Omuntu yeenayeena ataatuusenga buliidho ebyo byonabyona ebyaghandiikibwa mu kitabo kino eky'Amateeka, akolimirwe!”

¹¹ Mperaano, kyeyoleka bukalamu nga ghazira aba mutuukirivu lwa Mateeka, kuba kyaghandiikibwa kiti: “Oyo aba omutuukirivu olw'okwikiriza aliba mulamu.”

¹² Aye Amateeka tigeesigama ku kwikiriza, kuba ebyaghandiikibwa era bikoba biti: “Oyo akola ebyo byonabyona bye galagira aliba omulamu olw'Amateeka.”

¹³ Aye ife Kurisito yatununula okuva mu kikolimo ekireetebwa Amateeka mwene bwe yakolimirwa ku lwaife kuba kyaghandiikibwa kiti: “Omuntu yeenayeena aghanikibwa ku muti, akolimirwa.”

¹⁴ Kurisito yakola atyo, olw'omukisa Katonda gwe yasuubiza Aburahamu gugheebwe n'abamaghanga agandi mu Kurisito Yesu, era olw'okwikiriza tusobole okufuna Mwoyo Katonda ye yasuubiza.

Eiteeka tiridibya kisuubizo

¹⁵ Aboluganda, ka mbaghe eky'okuboneraku eky'omu bulamu obwabuliidho: Ghazira aghanga kudibya oba kukookera mu ndagaano emaze okukakasibwa.

¹⁶ Ebisuubizo byasuubizibwa Aburahamu ni mwidhukulu we. Ebyaghandiikibwa tibikoba “baidhukulu” ekitegeeza abantu abangi, aye “mwidhukulu” ekitegeeza omuntu omulala yenka era nga ni Kurisito.

¹⁷ Kino ni kye nkoba, Amateeka agaateebwagho nga ghabiseegho emyaka bikumi bina n'asatu (430), tigaadibya ndagaano yamala kukakasibwa Katonda, era tigaadibya kisuubizo kye.

¹⁸ Kale oba Katonda agha omuntu ekirabo lwa kutuusa Mateeka, agho kiba nga tikikaali kisuubizo aye ekirabo Katonda kye yagha Aburahamu kyava mu kisuubizo.

Ekyateesaagho Amateeka

¹⁹ Olwo kiki ekyateesaagho Amateeka? Gaateebwagho okwoleka okwona, era gaali nga ga kubaagho okutuusa ku kwidha kwa mwidhukulu wa Aburahamu. Omwidhukulu oyo n'oyo ayogerwaku mu kisuubizo ekyasuubizibwa Aburahamu. Amateeka bamalaika baagaleeta nga gabita mu muntu eyagemagania Katonda n'abantu.

²⁰ Aye omuntu agemagania okubaagho, kyoleka nga ghaligho endhuyi ibiri aye ate Katonda ali mulala.

²¹ Tukobe tuti Amateeka gakontana n'ebisuubizo bya Katonda? Busa naire. Kuba nguli abantu baagheebwa Amateeka agasobola okuleeta obulamu, nguli mu kutuukiriza bye galagira n'omuva obutuukirivu.

²² Aye ng'ebyaghandiikibwa bwe bikoba, ensi yoonayoona esibiibwa mu maani ag'ekibi, olwo ekirabo ekyasuubizibwa olw'okwikiriza mu Yesu Kurisito kibe nga kigheebwa abo abaikiriza.

²³ Aye ng'okwikiriza kuno kukaali kutuuka, Amateeka gaatukuumanga butiribiri ng'abasibe, okutuusa okwikiriza kuno lwe kwayolekebwa.

²⁴ Kale Amateeka gaatukuumanga ng'omukuza okutuusa Kurisito lwe yaidha olwo tugheebwe okuba abatuukirivu olw'okwikiriza.

²⁵ Aye nga mperaano okwikiriza bwe kwaidha, titukaakuumibwa mukuza.

²⁶ Kuba mu Kurisito Yesu, mwenamwena muli buti baana bakulu aba Katonda olw'okwikiriza.

²⁷ Kuba mwenamwena abaabatizibwa mu Kurisito, Kurisito oyo mwamuvaala oti kivaalo.

²⁸ Mperaano ghazira ati ono Muyudaaya ate ole Mugureki, ono mwiru ate ole yeetaaya, oba ati ono musaadha ate ole mukazi kuba mwenamwena mwafuuka muntu mulala mu Kurisito Yesu.

²⁹ Era oba nga muli ba Kurisito, agho ni muli baidhukulu ba Aburahamu era mulifuna Katonda kye yasuubiza.