Ab'e Galatia 2 - Baibuli Ekibono kya Katonda 2014

Paulo n'Abatume abandi

¹ Bwe ghaabitagho emyaka eikumi n'ena, memale kabiri naaja e Yerusalemu, twaja ni Barunaba era naatwala ni Tito.

² Najaayo kuba Katonda yakindholeka nga kingwaniire okujaayo. Era nga tuli twenka n'abakulu, nayandha mu maiso gaibwe Amawulire Amalungi ge nalinga nga nkobera abamaghanga agandi. Ekyo nakikola omulimo gwe nali nkoze, ni gwe nali nja okukola gulobe kunfa busa.

³ Era waire Tito ye naja naye yali Mugureki, tiyakakibwa kukeketebwa.

⁴ Ghaligho abaakyogeraku nga beefuula okuba abaikiriza, beibirira baatweyimbaku. Kye baayenda n'okubona eidembe lye tuli nalyo mu Kurisito Yesu era n'okutwiza mu bwiru.

⁵ Aye olw'okukuuma obutuufu obw'Amawulire Amalungi ku lwaimwe ti twaganha kye baali bakoba naire.

⁶ Aye era abo abaaboneka ng'oti n'abakulu, oba bwenebwene bwe baali ekyo ku nze ti kya nsonga, kuba Katonda taboola mu bantu abakulu abo, nga bwe nkobye, mpaagho kiyaaka kye baanhongeraku.

⁷ Aye baakibona bubone nga Katonda yampa omulimo ogw'okukobera abatali bakekete Amawulire Amalungi, ng'oti ni bwe yagha Petero ogw'okugakobera abakekete

⁸ kuba olw'amaani ga Katonda nafuulibwa omutume eri abamaghanga agandi, ng'oti ni Petero bwe yafuulibwa omutume eri abakekete.

⁹ Yakobo, Petero ni Yoanne, abaabonekanga okuba nga n'abakulembeze, baakibona nga Katonda yangemya omulimo omukulu guno. Kale baatugema mu ngalo, nze ni Barunaba, ng'akamanhiso akooleka nga tuli bakozi banaibwe ku mulimo n'omulala. Era twaisania ife tuje mu bamaghanga agandi, ate beene baje mu bakekete.

¹⁰ Kirala kyonka kye baatukoba, buteerabira baghafu ab'omu kikunsu kyaibwe, era nga n'ekintu kyene ekyo kye mbaire ntangaku omwoyo gwange.

Paulo akoba ku Kefasi e Antiokia

¹¹ Kefasi bwe yaidha mu Antiokia namukobaku nga twenatwena tuli agho, kuba kye yakola nga kyeyoleka kyene nga kisobu:

¹² Abantu abaava ye Yakobo bwe baali bakaali kutuuka Kefasi yaliiranga ghalala n'abamaghanga agandi abaikiriza Yesu, aye olwatuuka bati yeefuula era yaabeeyawulaku olw'okutya abo abeekalangulira ku ky'okukeketa.

¹³ Abayudaaya abandi abaikiriza Yesu boona baatoolera okukola ekisobu ng'oti ni Kefasi, era ekyo kyaviiramu ni Barunaba yeena okujiira okwo.

¹⁴ Aye nze bwe nabona nga tibali kujiira ku mazima g'Amawulire Amalungi naakoba Kefasi nga boonaboona bali agho nti: “Iwe oli Muyudaaya, aye weebisa ng'oti n'abamaghanga agandi, ate ng'oli Muyudaaya. Kale osobola otya okukaka abamaghanga agandi okwebisa ng'oti Bayudaaya?”

Mu kwikiriza Yesu n'omuli okulokolebwa

¹⁵ Ife twazaalibwa mu mubiri nga tuli Bayudaaya nga tituli bamaghanga gandi aboonooni.

¹⁶ Aye twidhi ng'omuntu abalibwa okuba omutuukirivu lwa kuba na kwikiriza mu Yesu Kurisito, aye ti lwa kukola nga Mateeka bwe galagira. N'ife twena twali n'okwikiriza mu Kurisito Yesu, olwo tubalibwe okuba abatuukirivu lwa kwikiriza Kurisito aye ti lwa kukola ng'Amateeka bwe galagira. Ghazira abalibwa kuba mutuukirivu lwa kukola ebyo amateeka bye galagira.

¹⁷ Aye mu kwefubiriza kwaife okubalibwa okuba abatuukirivu mu Kurisito, bwe twagaanibwa nga tuli boonooni, olwo Kurisito atwalibwa nga mugheereza wa kibi? Busa naire.

¹⁸ Aye bwe nzimba kabiri ekintu kye nasansula, olwo neeyolekera irala nga ndi mwonooni.

¹⁹ Kuba nze, mu Mateeka ntwalibwa nga ndi mufu, nga ndhitibwa Amateeka olwo mbe omulamu eri Katonda. Naitirwa ghalala ni Kurisito ku musalaba gwe,

²⁰ era tiri mulamu ku bwange aye Kurisito n'omulamu mu nze. Obulamu buno bwe ndi nabwo mperaano mu mubiri, ndi nabwo lwa kwikiriza Mwana wa Katonda eyangonza n'aghaayo obulamu bwe ku lwange.

²¹ Tidibya kisa kya Katonda. Aye oba omuntu asobola okubalibwa okuba omutuukirivu olw'okugema Amateeka, olwo Kurisito aba yafiira busa.