Ab'e Galatia 1 - Baibuli Ekibono kya Katonda 2014

¹ Ninze Paulo omutume, obutume buno tibwampeebwa muntu waire okubisibwa mu muntu, aye bwampeebwa Yesu Kurisito mwene, ni Katonda Lata waife eyamuzuukiza.

² Nze n'aboluganda boonaboona be ndi nabo ghano, tughandiikira Ebikunsu eby'Abaikiriza mu Kurisito byonabyona mu Galatia.

³ Enkabi n'emiraala ebiva ye Katonda Lata waife, ni ye Musengwa waife Yesu Kurisito bibenga n'imwe.

⁴ Yesu Kurisito ono n'eyeeghaayo olw'okwona kwaife atununule mu byanda bino bye tulimu buti ebyonooni, nga Katonda Lata waife bwe yayenda.

⁵ Katonda oyo agheebwenga ekitiisa ebyanda n'ebyanda. Amiina.

Ezira Mawulire Malungi gandi

⁶ Mbeewuunhiiza, mu kaseera akatono kati muli kuva ku oyo eyabeeta mu kisa kya Kurisito, mwakyukira ku kintu ekindi kye muli kweta amawulire amalungi!

⁷ Bwenebwene ghazira Mawulire Malungi gandi, aye ghaligho ababatabula nga benda okukiidhamya Amawulire Amalungi aga Kurisito.

⁸ Aye ka tube nga niife, oba abe malaika ava mu igulu, abakobera ky'ayeta Amawulire Amalungi agataisania n'ago ge twabakobera, akolimirwe.

⁹ Nga bwe twakoba, ni mperaano ka nkiiremu nti omuntu yeenayeena bw'abakoberanga mwene g'ayeta amawulire amalungi aye nga tigaisania n'ago ge mwaikiriza, akolimirwe.

¹⁰ Mudhuuba muti ndi kunuyirira kusiimibwa bantu aye ti Katonda? Oba ndi kugezaaku kusangaaza bantu? Bwemba nga nkaagezaaku okusangaaza abantu mba tiri mugheereza wa Kurisito.

Engeri Paulo ye yafuukamu omutume

¹¹ Ka mbakobere aboluganda, Amawulire Amalungi ge mbakobera tigaava mu bantu buntu.

¹² Ghazira muntu yagankobera oba okugandhegeresa; Yesu Kurisito mwene n'eyagandholeka.

¹³ Mwawulira eby'obulamu bwange obwasooka, nga bwe neemalira ku nsinza ey'Ekiyudaaya, ni nkiriganga Ekikunsu eky'Abaikiriza mu Kurisito ekya Katonda nga nziramu na ntete naire, era ni ngezaaku okukisaaniagho.

¹⁴ Bayudaaya banange bwe twaisuka, nabaswikirira inho mu kugema empisa edh'endhikiriza ey'Ekiyudaaya, era ni mu kwekalangulira ku mpisa dha badhaadha baife.

¹⁵ Aye Katonda yali yamala ira okuunonda nga nkaali na kuzaalibwa, yandhawula era yantaagho okumukolera omulimo olw'ekisa kye.

¹⁶ Era bwe yasalagho okundholeka Omwana we nsobole okukobera abamaghanga agandi Amawulire Amalungi agamufaaku, tyebuuzaaku ku muntu yeenayeena,

¹⁷ waire okuja e Yerusalemu y'abo abansooka okuba abatume aye najiiragho mu Buwarabu, kabiri naira e Damasiko.

¹⁸ Ghaabitagho emyaka esatu memale olwo naaja e Yerusalemu okukyaliraku Kefasi era naabaayo enaku ikumi na itaanu.

¹⁹ Aye ghazira ku batume bandi ye nabonaku okutoolaku Yakobo muganda wa Musengwa.

²⁰ Ndayira mu maiso ga Katonda nga bye ndi kubaghandiikira, tiri kusubagha!

²¹ Olwo naaja mu biketezo by'e Siria n'e Kilikia.

²² Era nali nkaali kumanhibwa bikunsu bya baikiriza mu Kurisito ab'e Buyudaaya.

²³ Okutoolaku okukoberwa obukoberwe bati: “Eyali atukiriga buti ali ku gwa kukobera abantu ku kwikiriza kwe yagezaaku okusaaniagho.”

²⁴ Era baasaaka Katonda ku lw'ekyo ekyantuukaku.