Ab'Efeso 6 - Baibuli Ekibono kya Katonda 2014

Abazaire n'abaana baibwe

¹ Abaana, abazaire baimwe mubawulirenga mu Musengwa, kuba ekyo n'ekigwaine.

² “Lata wo n'inhoko obatangamu ekinhagansi.” Kino n'ekiragiro ekisooka ekirimu ekisuubizo ekikoba kiti:

³ “Lw'onaasobola okuba obukalamu era n'okughangaala ku nsi.”

⁴ Imwe abazaire, mutasoononkerezanga baana baimwe kubaleetera kunakughala, aye mubakuze nga mubagalagira era nga mubeegeresa ebya Musengwa.

Abairu ni basengwa baibwe

⁵ Abairu mwisenga inho ekitiisa mu basengwa baimwe ab'oku nsi, era mubawulirenga mu mwoyo oguziramu buguya, nga bwe mwandiwuliire Kurisito.

⁶ Ekyo mutakikolanga lwa bantu kubabona, babasiime, aye mukolenga nga Katonda bw'ayenda n'omwoyo gwaimwe gwonagwona, ng'abagheereza ba Kurisito.

⁷ Mukolerenga mu mwoyo mukalamu ng'oti n'abakolera Musengwa, aye ti ng'abakolera abantu.

⁸ Mumanhe muti buli muntu, oba mwiru oba ti mwiru, Musengwa alimusasula buli kikalamu ky'akola.

⁹ N'imwe basengwa b'abairu, mwena mubisenga mutyo abairu baimwe, nga timubeesoomera. Mumanhe muti oyo Musengwa waibwe era owaimwe, ali mu igulu era oyo tasaliriza.

Eby'okulwanisa bya Katonda

¹⁰ Ekisembayo, mube bagumu mu Musengwa, n'obuyinza bwe obw'amaani.

¹¹ Mukozesenga eby'okulwanisa bya Katonda, musobole okutala nga Sitaani abalumbye n'obukodyo bwe;

¹² kuba tituli kulwana na bantu buntu aye tuli kulwana n'emizimu emibi egy'omu ibbanga kamaala. Tuli kulwana n'abafuzi n'ab'obukumu, n'emisambwa egy'omu luse luno olw'ekizikiiza.

¹³ Kale ni mutoole eby'okulwanisa byonabyona ebya Katonda, mughange okuguma ku lunaku omuzigu lw'abalumba, era bwe mulimaliriza okulwana okutuuka ku nkomerero, musigale nga muli bagumu.

¹⁴ Mwemerere nga muli bagumu, ng'amazima n'olusibiro lwe mwesibye mu nkende, ate obutuufu nga n'ekivaalo eky'omu kifuba eky'ekyuma.

¹⁵ Okuba abeetegefu okulangirira Amawulire Amalungi, agaleeta emiraala, kubabeere ng'engaito mu bigere byaimwe.

¹⁶ Mugemerere okwikiriza kubabeere engabo, musobole okuzimya obusaale bwonabwona obw'omuliro obulasibwa Omubi.

¹⁷ Muvaale obulokofu ng'enkuufiira ey'ekyuma, mugeme ekibono kya Katonda ng'empiima Mwoyo y'abagha.

¹⁸ Buliidho musabenga, nga Mwoyo bw'anaabanga abagalagiire. Mubenga beetegefu nga timwiririra, musabirenga abatuukirivu boonaboona.

¹⁹ Zeena munsabire, bwe naabanga nga ndhogera, mpeebwe eby'okwogera, era mbyogere nga titya, nga mmanhisa abantu ekyama eky'Amawulire Amalungi.

²⁰ Ndi mukwenda wa Mawulire ago Amalungi waire ndi mu ikomera. Munsabire ndobe kutya mu kugamanhisa abantu nga bwe kigwaniire.

²¹ Tukiko, owoluganda omugonzi era omugheereza omwesigwa mu Musengwa, aidha kubakobera byonabyona, mumanhe ebinfaaku ni bye ndi kukola.

²² Kye nviire ni mmutuma ye muli, mumanhe bwe tuli, era abagumye emyoyo.

²³ Katonda Iseife ni Musengwa Yesu Kurisito, aghe aboluganda boonaboona emiraala n'okugonza n'okwikiriza.

²⁴ Enkabi dha Katonda dhibe n'abo boonaboona abagonza Musengwa waife Yesu Kurisito n'okugonza okutakoma.