Ab'Efeso 4 - Baibuli Ekibono kya Katonda 2014

Okwisa ekirala ng'omubiri omulala

¹ Kale nze eyasibwa olw'okugheereza Musengwa, mbeeghemba mwebise mu nsambo egwanira obulamu bwe mwayeterwa.

² Mube bawombeefu, abatali ba ikabyo era abaguminkiriza. Mulage okugonzania kwaimwe, nga buli muntu aguminkiriza mwine.

³ Mufube okukalangula okwisa ekirala Mwoyo kw'abagheera mu miraala egibayunga aghalala.

⁴ Omubiri guli mulala, ni Mwoyo mulala, ng'era ekisuubizo kye mwayeterwa bwekiri ekirala.

⁵ Musengwa mulala, okwikiriza kulala n'okubatizibwa kulala

⁶ Katonda mulala, Lata w'abantu boonaboona, afuga byonabyona, akolera mu byonabyona, era aba mu byonabyona.

⁷ Aye buli mulala mu ife yagheebwa ekirabo eky'endhawulo nga Kurisito bwe yamugerera.

⁸ Ebyaghandiikibwa kye biva ni bikoba biti: “Bwe yaniina eyo ghaigulu, yaatwala abanhage kamaala era yaagha abantu ebirabo.”

⁹ Okukoba tuti, “yaniina”, kitegeeza ki? Kitegeeza kiti yasooka kwika ghansi mu nsi.

¹⁰ Oyo eyaika ghansi n'oyo era eyaniina ghaigulu irala, olwo abe ng'aba buli ghantu.

¹¹ Era n'oyo eyagha abandi okuba abatume, abandi okuba abalanzi, abandi okukobera abantu Amawulire Amalungi, abandi okulabirira abantu ba Katonda, n'abandi okuba abeegeresa.

¹² Ekyo yakikola olw'okutegeka abatuukirivu basobole okukola omulimo ogw'okugheereza, era n'okuzimba omubiri gwa Kurisito,

¹³ okutuusa twenatwena lwe tulituuka okuba omuntu mulala mu kwikiriza ni mu kumanha Omwana wa Katonda. Olwo tukakate mu by'omwoyo, era tube abatuukiriire mu bulamu bwa Kurisito.

¹⁴ Era tube nga titukaali baana bato abayuuzibwayuuzibwa era abatwalibwa kiisi mpewo ey'endhegeresa y'abantu abaguya, abakiidhamya abandi n'obuguya bwaibwe.

¹⁵ Aye tube ba mazima mu kugonzania, tukakate mu byonabyona okutuuka ku kubeera irala abatuukiriire mu bulamu bwa Kurisito, omutwe gwaife.

¹⁶ Kurisito oyo n'aleetera omubiri gwonagwona okuyungibwa, obuyungiro bwonabwona obugulimu bwagugemerera, kiisi kitundu kyagwo kyakola omulimo gwakyo bukalamu. Olwo omubiri gwakula, era gwazimbibwa mu kugonzania.

Obulamu obuyaaka mu Kurisito

¹⁷ Kye nhenda okubakobera, era nga mbasikirira mu Musengwa, ni kino: Mukange agho okwebisa ng'abamaghanga agandi bwe beebisa, nga bajiira ku birowoozo byaibwe ebiziramu.

¹⁸ Emyoyo gyaibwe giidhwire nzikiiza. Bazira mugabo mu bya bulamu Katonda bw'agaba, kuba baidhwire obutamanha, era emyoyo gyaibwe mikalangafu.

¹⁹ Tibakaali na nsoni beemaliire mu bya budankaanu, balulunkanira okukola ebibi ebya buli nsambo.

²⁰ Aye imwe Kurisito ti bwe mwamwega mutyo.

²¹ Nkakasa nga mwamuwuliraku, era imwe ng'ababe, mwayegeresebwa amazima agali mu Yesu.

²² Kale mwesambe obulamu obw'eira bwe mwalimu, obwayoneka n'okwegomba kwabwo okuguya.

²³ Mwizibwe buyaaka mu myoyo ni mu bidhuubo byaimwe.

²⁴ Mufuuke bantu bayaaka, abaatondebwa mu kifaananie kya Katonda mu bwesimbu ni mu butukuvu obw'amazima.

²⁵ Agho ni mulekere okuguya buli muntu akobere mwine amazima, kuba tuli bitundu bya mubiri mulala.

²⁶ Bwe musungughala, obusungu butabasindikanga mu kwona. Mutagwisanga ndhuba nga mukaasibye obusungu ku mwoyo,

²⁷ era mutaghanga Sitaani kaghagaanhia.

²⁸ Abaire aiba akange agho, aye afube kukola ng'akozesa emikono gye asobole n'okugabiraku abaavu.

²⁹ Eminwa gyaimwe girobenga kwogera bibono bitasaana, aye gyogerenga ebyo byonka ebikalamu ebizimba era ebisaine, bisobole okuleetera ababiwulira emikisa.

³⁰ Era mutanakughazanga Mwoyo Mutukuvu wa Katonda, kuba Mwoyo n'akamanhiso ke mwateebwaku okutuuka ku lunaku olw'okununulibwa.

³¹ Mulekeyo enge, ekiruyi, obusungu, okwereega, okuvumagana n'okukyaghagana kwonakwona.

³² Aye mubenga ba kisa, buli muntu alumirwenga mwine, era musonighaganenga nga Katonda bwe yabasonigha mu Kurisito.