Ab'Efeso 3 - Baibuli Ekibono kya Katonda 2014

Omulimo gwa Paulo mu bamaghanga agandi

¹ Ekyo kindeetera nze Paulo, omusibe olwa Kurisito Yesu ku lwaimwe abamaghanga agandi, okubasabira eri Katonda.

² Ndhuuba nti mwawulira nga Katonda olw'ekisa kye yangemya omulimo guno ku lwaimwe.

³ Katonda yandholeka naamanha ekyama kye nga bwe nabaghandiikira mu bumpimpi.

⁴ Bwe munaabisoma munaaghanga okubona nga nze bwe ntegeera ekyama eky'entegeka ya Kurisito.

⁵ Mu byanda eby'eira ghazira muntu yeenayeena eyamanhisibwaku ku kino mu nsambo oti n'eno Mwoyo y'akyolekamu Abatume be n'abalanzi be abatukuvu.

⁶ Ekyama ni kino: olw'Amawulire Amalungi, abamaghanga agandi boona baagabana ku birungi ebyo Katonda by'agha Abayudaaya. Baafuuka omuntu mulala mu Kurisito Yesu, era baagabana ku ebyo Katonda bye yabasuubiza mu Kurisito oyo.

⁷ Katonda olw'ekisa kye, yampa ekirabo eky'okubunisa Amawulire Amalungi, ng'amaani ge gakola mu nze.

⁸ Waire nga ninze asembayo mu batuukirivu boonaboona, Katonda yampa omukisa okukobera abamaghanga agandi Amawulire Amalungi, ag'obukombe obuli mu Kurisito obutaloodheka.

⁹ Era n'okumanhisa abantu boonaboona ebifa ku ntegeka, Katonda eyatonda byonabyona ye yali agisiiza okumala ebyanda.

¹⁰ Mperaano ng'abita mu Kikunsu ky'Abaikiriza mu Kurisito, Katonda ayenda amanhise abafuzi n'ab'obukumu abali mu igulu amagezi ge agatakoma.

¹¹ Katonda yakola kino ng'ajiira ku kigendererwa eky'ebyanda n'ebyanda era kye yatuukiriza mu Kurisito Yesu Musengwa waife.

¹² Nga tubita mu Kurisito oyo, olw'okumwikiriza, tuguma twaseeta ye Katonda nga titutya.

¹³ Kyenva mbeeghemba, mulobe kuwaamu maani olw'okubona nga ndaagadaaga ku lwaimwe, kuba ekyo kibagheesa ekitiisa.

Okugonza kwa Kurisito

¹⁴ Kyenva ni nkuba amakiryaivu mu maiso ga Lata,

¹⁵ ebika byonabyona eby'omu igulu n'eby'oku nsi mwe bisimuka.

¹⁶ Naamusaba olw'ekitiisa ekyodo, abagumye ng'abagha amaani, mule munda, ng'abita mu Mwoyo we,

¹⁷ Kurisito abe mu myoyo gyaimwe olw'okwikiriza kwaimwe. Musimbire irala emizi mu kugonza era mukalangukiremu.

¹⁸ Olwo imwe, aghalala n'abatuukirivu boonaboona, musobole okumanha okugonza kwa Kurisito bwe kuli okunene, ate nga kuleeyi, mu bugungumavu, ni mu kwika ghansi.

¹⁹ Mbasabira mumanhe okugonza okwo okulemye abamanhi boonaboona okumanha, olwo mwidhulire irala Katonda.

²⁰ Katonda oyo asobola okukola ebisinga n'ebyo bye tusaba, oba ebyo bye tutegeera, olw'amaani ge agakolera mu ife,

²¹ agheebwe ekitiisa mu Kikunsu ky'Abaikiriza mu Kurisito, ni mu Kurisito Yesu, ni mu nse dhoonadhoona, ebyanda n'ebyanda. Amiina.