Abalevi 18 - Baibuli Ekibono kya Katonda 2014

Amateeka agagema ku bufumbo

¹ Musengwa Katonda yaalagira Musa ati:

² “Kobera Abaisiraeli oti: Ninze Musengwa Katonda, Katonda waimwe.

³ Muteebisanga ng'abantu ab'e Misiri ye mwabanga, oba ng'abantu ab'omu nsi Kanaani, ye ndi kubatwala. Mutajiiranga ku mpisa dhaibwe.

⁴ Mugonderenga amateeka gange, era mukolenga bye mbalagira. Ninze Musengwa Katonda waimwe.

⁵ Agho ni mugemenga amateeka n'ebiragiro bye mbagha. Anaabituukirizanga, anaabanga mulamu. Ninze Musengwa Katonda.

⁶ “Ghatabangagho ku imwe aseeta eri muntu amuliku luganda n'aba naye mu buliri. Ninze Musengwa Katonda.

⁷ Otawemulanga lata wo ng'oba n'inhoko mu buliri. Oyo ni inhoko, otamuwemulanga.

⁸ Otawemulanga lata wo ng'oba n'owundi ku bakazi be mu buliri.

⁹ Otabanga na mwanhoko mu buliri, waire mwanhoko ku lata wo ow'omukazi owundi, oba mwanhoko ku inhoko ow'omusaadha owundi, k'abe nga yakulira ghalala n'iwe ghaka, oba nga yakulira ghandi.

¹⁰ Otabanga na mwana wa mutabane wo mu buliri, oba owa mughala wo, kuba agho oba oghemwike.

¹¹ Otabanga na mughala wa muka lata wo mu buliri, kuba yeena mwanhoko.

¹² Otabanga na songa wo mu buliri, kuba mwanhina lata wo.

¹³ Otabanga na muganda wa inhoko, mu buliri, kuba yeena inhoko.

¹⁴ Otabanga na muka muganda wa lata wo mu buliri. Oyo yeena aba inhoko.

¹⁵ Otabanga na muka mutabane wo mu buliri,

¹⁶ era otabanga na muka muganda wo mu buliri.

¹⁷ Otabanga na mukazi mu buliri, kabiri n'omala n'oba na mughala we mu buliri, oba mughala wa mutabane we, oba mughala wa mughala we. Ekyo kiive, kuba abo bakuliku obuko.

¹⁸ Otabayizanga muganda wa mukazi wo n'aba mughalikwa we.

¹⁹ “Otabanga na mukazi mu buliri ng'ali mu biseera bye eby'okulwala, kuba abalibwa obutaba mulongoofu.

²⁰ Otabanga na muka beene mu buliri. Ekyo kikufuula atali mulongoofu.

²¹ Otaghangayo waire omulala ku baana bo, okukozesebwa mu kusinza omusambwa Moleki, n'ovumagania eriina lya Katonda wo. Ninze Musengwa Katonda.

²² Otabanga na musaadha mwino mu buliri, mu nsambo abasaadha ye babaamu n'abakazi. Ekyo kyenhinhalwa.

²³ Omusaadha oba omukazi atabanga na nsolo, mu nsambo abasaadha ye babaamu n'abakazi mu buliri. Obudankaanu obwo bumufuula atali mulongoofu.

²⁴ “Mutakolanga ekindi ku bintu ebyo waire ekirala kiti, kuba kibafuula abatali balongoofu. Ebyo byonabyona n'ebyafuula abantu abamaghanga agandi agatantya okuba abatali balongoofu, ge ndi kubinga mu nsi eno okuleetamu imwe.

²⁵ Ebikolwa byaibwe byafuula ensi eno obutaba nongoofu, kye nva ndi kubabonereza nga mbabingira kuliya okubamaliramu irala.

^26-27 Abantu abo baakolanga ebyenhinhalwa ebyo byonabyona, baaleetera ensi obutaba nongoofu. Aye imwe mutabikolanga. Mwenamwena Abaisiraeli n'abasenze abaasenga mu imwe, mugemenga amateeka n'ebiragiro byange,

²⁸ mulobe kubingibwa mu nsi eno ng'oti n'abantu abamaghanga abaabasooka okugibaamu bwe baagireetera obutaba nongoofu ni babingibwamu.

²⁹ Kuba kiisi anaakolanga ekyenhinhalwa kyonakyona ku ebyo, anaabanga nga takaabalirwa mu bantu bange.

³⁰ “Kale mugonderenga bye mbalagira, mulobenga kujiiranga ku mpisa edho edheenhinhalwa, edh'abo abaabasooka okuba mu nsi eno, era mulobenga kwereetaku butali bulongoofu nga mukola ebyo. Ninze Musengwa Katonda waimwe.”