3 Yoanne 1 - Baibuli Ekibono kya Katonda 2014

Okulamusa

¹ Ninze omukaire, mpandiikira Gayo omugonzi, ye ngonza mu mazima.

² Mukagwa, nkusabira byonabyona bikujiire bukalamu era obe mulamu mu mubiri nga bw'oli mu mwoyo.

³ Nasangaala inho okubona abaana ba Lata abaidha ni bakakasa nga bw'okalangukiire ku mazima era nga bw'ogakoleraku.

⁴ Ghazira kinsangaaza kisinga kuwulira nti abaana bange batambulira mu mazima.

Okusiima Gayo

⁵ Mukagwa, okola bukalamu ebyo by'okolera aboluganda waire nga tobaidhi.

⁶ Abo baakakasa ab'omu Kikunsu eky'Abaikiriza mu Kurisito okugonza kwe wabalaga. Era onaaba okoze bukalamu bw'onaabayamba ni beeyongerayo mu lugendo lwaibwe mu nsambo esiimya Katonda;

⁷ kuba ku lw'Eriina lye baasituka baaja nga tibaganha kintu kyonakyona ekiva ku batali baikiriza.

⁸ Kale tuteekwa okuyambanga abantu oti n'abo memale tube bakozi banaibwe mu mazima.

Dioterefe ni Demetirio

⁹ Naghandiikira Ekikunsu ky'Abaikiriza mu Kurisito aye Dioterefe ayenda okwefuula omukulu taganha bye mmukoba.

¹⁰ Kale bwe ndiidha ndyogera ku bintu by'akola byonabyona ng'alabankana n'ebibono ebitusiiga enziro. Tiyakoma okwo, aye tasangaalira baluganda ababa nga baidhie era yaalobera n'abo abandyenze okubasangaalira, yaagezaaku n'okubabinga mu Kikunsu ky'Abaikiriza mu Kurisito.

¹¹ Mukagwa, mu bikolwa byo otaboneranga ku bakozi ba bibi, aye boneranga ku bakozi ba bikalamu. Yeenayeena akola ebikalamu aba wa Katonda ate kiisi akola bibi ng'oyo tabonanga ku Katonda.

¹² Abantu boonaboona boogera bikalamu ku Demetirio era nga kya mazima. N'ife twena tumwogeraku bikalamu ate era oidhi nga bye tukoba bya mazima.

Okusiibula

¹³ Mbaire na kamaala eby'okukughandiikira aye tyenze kukozesa lupapula na kalaamu.

¹⁴ Nsuubira okubabona mu ntangama ti ya ghala, era tulyogera maiso ku maiso.

¹⁵ Mube n'emiraala. Bakagwa bo boonaboona bakulamwisa. Bakagwa baife batulamukize kiisi mulala.