2 Samueli 10 - Baibuli Ekibono kya Katonda 2014

Daudi aghangula Abammoni n'Abasiria

¹ Ebyo bwe byawa, kyabazinga Nahashi ow'Abammoni yaafa, mutabane we Hanuni yaamusikira ku bwakyabazinga.

² Daudi yaakoba mule ati: “Ndidha kulaga Hanuni mutabane wa Nahashi omukwano ogw'amazima, nga ise gwe yandaganga.” Kale Daudi yaatuma ku bagheereza be baje ye Hanuni, bamumusaasirire olw'okufiirwa ise. Agho abagheereza ba Daudi baatuuka bukalamu mu nsi ey'Abammoni.

³ Aye abakulembeze ab'Abammoni baakoba musengwa waibwe Hanuni bati: “Olowooza oti Daudi akutumiire abagheereza be okukusaasira, lwa kwenda kuta mu lata wo kinhagansi? Busa naire. Atumye abagheereza be kwagaaza kibuga bakikeete, era olumaliira bakigeme.”

⁴ Kale Hanuni yaagema abagheereza ba Daudi, buli muntu yaamusalaku oluuyi olw'ekirevu kye era yaamusalaku ebivaalo bye okutuusa mu nkende, memale yaabalekula baaja.

⁵ Daudi bwe baamukobera ebibairegho, yaatuma abakwenda y'abagheereza abo, kuba baali bali kuwulira ensoni. Yaabakoba basigale mu kibuga Yeriko okutuusa ng'ebirevu byaibwe bimaze okumera memale baireyo.

⁶ Abammoni bwe baabona nga baleeteire Daudi okubakyagha, baapangisa abalwani ab'oku bigere Abasiria ab'e Betherehobu n'ab'e Zoba nga baghera emitwalo ebiri (20,000), baapangisa ni kyabazinga w'e Maaka yaidha n'abalwani lukumi (1,000), era baapangisa n'abalwani omutwalo mulala n'enkumi ibiri (12,000) abaava e Tobu.

⁷ Daudi bwe yakiwulira yaatuma Yoabu n'eigye lyonalyona ery'abalwani ab'amaani.

⁸ Abammoni beesowolayo baasimba enhiriri gha mulyango ogwingira mu kibuga kyaibwe, nga beetegeike okulwana olutalo. Ate Abasiria ab'e Zoba n'ab'e Rehobu, n'abalwani ab'e Tobu n'e Maaka, baaba bonka mu irungu.

⁹ Yoabu bwe yabona ng'abazigu baidha kumulumba nga bamuva emberi n'emugongo, yaalonda mu balwani ba Isiraeli abasaadha abasinga kulwana, baasimba enhiriri nga boolekeire Abasiria.

¹⁰ Abalwani abaasigalagho yaabagemya muganda we Abishai, yaabasimbya enhiriri okwolekera Abammoni.

¹¹ Yoabu oyo yaakoba Abishai ati: “Abasiria bwe banansinga amaani munaidha mwambeera, mwena Abammoni bwe banaabasinga amaani tunaidha twababeera.

¹² Guma omwoyo, tulwane kisaadha ku lw'abantu baife n'ebibuga bya Katonda waife. Ka tusabe Musengwa Katonda akole ekyo ky'abona nga n'ekigwaine.”

¹³ Kale Yoabu ni be yali nabo baaja okulumba Abasiria, Abasiria baabalumuka.

¹⁴ Abammoni bwe baabona ng'Abasiria balumwike, boona baalumuka Abishai bangira mu kibuga. Agho Yoabu yaakyuka yaavaayo y'okulwana n'Abammoni, yaira e Yerusalemu.

¹⁵ Aye Abasiria bwe baabona ng'Abaisiraeli babaghangwire, beesololeza ghalala.

¹⁶ Kyabazinga Hadadezeri yaatumisa Abasiria abaali ere ng'osomoike omwiga Eufurate, baidha e Helamu nga Shobaki omuduumizi ow'eigye lya Hadadezeri n'ali kubakulembera.

¹⁷ Ekyo bwe baakikobera Daudi, yeena yaasoloza Abaisiraeli boonaboona ghalala, baasomoka omwiga Yorudani baatuuka e Helamu. Abasiria baasimba enhiriri nga boolekeire Daudi, baalwana naye.

¹⁸ Abasiria baalumuka Abaisiraeli. Daudi yaita abalwani Abasiria ab'oku bigaali eby'omu lutalo lusanvu, n'ab'oku mbalaasi emitwalo ena (40,000). Era baafumita Shobaki omuduumizi ow'eigye ly'Abasiria, yaafiira mu lutalo.

¹⁹ Bakyabazinga boonaboona abaali abagheereza ba Hadadezeri bwe baabona nga Abaisiraeli babaghangwire, baakola endagaano ey'emiraala n'Abaisiraeli, era Abaisiraeli abo baabafuganga. Agho Abasiria baatya okwirayo kabiri okubeera Abammoni.