2 Bakyabazinga 1 - Baibuli Ekibono kya Katonda 2014

Omulanzi Eliya ni kyabazinga Ahazia

¹ Kyabazinga Ahabu owa Isiraeli bwe yamala okufa, ensi Moabu yaadheemera Isiraeli.

² Agho kyabazinga Ahazia owa Isiraeli, yaaghanuka ku lubalaza olwa ghaigulu ku ndhu ye, mu kisaagaati kye mu Samaria, yagwa ghansi yeerumiriza inho. Kale yaatuma abakwenda ng'abakoba ati: “Muje mwebuuze ku musambwa Baalizebubu ogw'e Ekuroni, mmanhe oba nga nnaawona.”

³ Aye malaika wa Musengwa Katonda yaakoba omulanzi Eliya ow'e Tishubi, ati: “Situka oje y'abakwenda ba kyabazinga Ahazia, obakobe oti, ‘Obwo muli kuja okwebuuza ku musambwa Baalizebubu ogw'e Ekuroni, lwa kuba mu Isiraeli muziramu Katonda?

⁴ Kale ni mukobe kyabazinga muti, Musengwa Katonda akoba ati toidha kuwona ove ku buliri okwo kw'oli, oli wa kufa.’ ” Kale Eliya yaaja.

⁵ Abakwenda bairayo ye kyabazinga, era kyabazinga yaababuuza ati: “Lwaki mwize?”

⁶ Baamwiramu bati: “Omusaadha aidhie, yaatukoba ati, ‘Mwireyo ye kyabazinga abatumye, mumukobe muti Musengwa Katonda akoba ati, obwo oli kutuma abakwenda okuja okwebuuza ku musambwa Baalizebubu ogw'e Ekuroni, lwa kuba mu Isiraeli muziramu Katonda? Kale ni toidha kuwona ove ku buliri okwo kw'oli, oli wa kufa.’ ”

⁷ Kyabazinga yaababuuza ati: “Omusaadha oyo aidhie n'abakoba ebibono ebyo, abaire afaanana atya?”

⁸ Bairamu bati: “Abaire avaire ekivaalo ekyakolebwa mu buviiri, era nga yeesibye mu nkende olusibiro olw'oluwu.” Kyabazinga yaakoba ati: “Oyo ni Eliya Omutishubi.”

⁹ Agho kyabazinga yaatuma omusaadha akulira abaisirukale amakumi ataanu, aje n'abaisirukale be amakumi ataanu, aleete Eliya. Omusaadha oyo yaaja yaaniina olusozi, yaayagaana Eliya ng'atyaime ku ngulu ku lusozi olwo. Yaamukoba ati: “Muntu wa Katonda iwe, kyabazinga alagiire ati, ‘Va ghaigulu ku lusozi oike.’ ”

¹⁰ Aye Eliya yairamu omusaadha oyo akulira abalwani amakumi ataanu, ati: “Oba nga ndi muntu wa Katonda, omuliro ka guve mu igulu gukwokye gukusaaniegho, iwe n'abaisirukale bo amakumi ataanu.” Era mu kiseera kyene ekyo, omuliro gwava mu igulu gwamusaaniagho n'abaisirukale be amakumi ataanu.

¹¹ Agho kyabazinga yaatuma omusaadha owundi akulira abaisirukale amakumi ataanu, ng'ali n'abaisirukale be amakumi ataanu, yaaniina olusozi era yaakoba Eliya ati: “Muntu wa Katonda iwe, kyabazinga alagiire ati, ‘Va mangu ghaigulu ku lusozi, oike.’ ”

¹² Aye Eliya yaabairamu ati: “Oba nga ndi muntu wa Katonda, omuliro ka guve mu igulu gukwokye gukusaaniegho, iwe n'abalwani bo amakumi ataanu.” Era mu kiseera kyene ekyo, omuliro gwava mu igulu gwamusaaniagho n'abalwani be amakumi ataanu.

¹³ Kyabazinga yaatuma omusaadha owokusatu akulira abaisirukale amakumi ataanu, ng'ali n'abaisirukale be amakumi ataanu, yaaniina olusozi yaakuba amakiryaivu mu maiso ga Eliya. Yaamwegayirira ng'akoba ati: “Nkweghembye muntu wa Katonda iwe, ngemerwa ekivunika owonie obulamu bwange n'obw'abagheereza bo bano amakumi ataanu.

¹⁴ Bwenebwene omuliro gwaviire mu igulu gwasaaniagho abasaadha ababiri abakulira abalwani ataanu ataanu abaasoose, ghalala n'abalwani baibwe. Aye mpegaano, nkusaba owonie obulamu bwange.”

¹⁵ Agho malaika wa Musengwa Katonda yaakoba Eliya ati: “Ika olusozi oje naye, otamutya.” Eliya yaasituka yaika olusozi ghalala n'omusaadha oyo akulira abaisirukale amakumi ataanu, yaaja ye kyabazinga.

¹⁶ Eliya oyo bwe yatuuka ye kyabazinga, yaakoba kyabazinga ati: “Musengwa Katonda akoba ati, ‘Nga bwe watuma abakwenda okuja okwebuuza ku musambwa Baalizebubu ogw'Ekuroni, ng'oti se mu Isiraeli muziramu Katonda, kale ni toidha kuwona ove ku buliri okwo kw'oli, bwenebwene oidha kufa.’ ”

¹⁷ Kale Ahazia yaafa nga Musengwa Katonda bwe yakoba ng'abita mu Eliya. Ahazia oyo yali aziraku mwana mulenzi, kale muganda we Yehoramu yaamusikira ku bwakyabazinga, mu mwaka ogwokubiri ogw'obufuzi bwa Yehoramu mutabane wa Yehoshafati kyabazinga wa Buyudaaya.

¹⁸ Ebindi byonabyona kyabazinga Ahazia bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.