2 Ab'e Thessalonika 3 - Baibuli Ekibono kya Katonda 2014

Mutusabirenga

¹ Ekisembayo baganda bange, mutusabirenga ekibono kya Musengwa kyeyongere okusansaana amangu, ate abakiwulira bakiteemu ekitiisa ng'oti bwe kyali mu imwe.

² Era mutusabire tuwone abantu ababi kuba okwikiriza ekibono tikwa boonaboona.

³ Aye Musengwa mwesigwa, era alibagumya yaabawonia Omubi.

⁴ Tubeesiga mu Musengwa era tukakasa nga mukola, era nga mwidhanga kukola nga bwe tubalagira.

⁵ Musengwa abatuuse ku kugonza kwa Katonda ni ku kuguminkiriza kwa Kurisito.

Okulabula ku bugayaavu

⁶ Aboluganda, tuli kubalagira mu liina lya Musengwa waife Yesu Kurisito, obutakolagananga na waluganda yeenayeena omugayaavu era atajiira ku bye twabeegeresa.

⁷ Kuba beene imwe mwidhi bukalamu nga bwe muteekwa okujiira ku bye tukola. Titwali bagayaavu nga tuli n'imwe.

⁸ Era titwakozesa kintu kya muntu yeenayeena nga titukisasuliire. Aye twakolanga inho obutagheera, era twafubanga omusana n'obwire tulobe kuzitoogherera muntu yeenayeena ku imwe.

⁹ Ti lwa kuba nga twali titugwaniire kubasaba bye twetaaganga, aye twayenda okubagha eky'okuboneraku kye mube mujiirengaku.

¹⁰ Ate ni bwe twali n'imwe twabagha ekiragiro kino tuti: “Oba ng'ole tayenda kukola, n'okulya alekere.”

¹¹ Kuba tuwulira mbu abandi ku imwe muli bagayaavu abatenda kukola, okutoolaku okwengiza mu bitabagemaku.

¹² Mu liina lya Musengwa Yesu Kurisito, abantu abali ng'oti n'abo tuli kubalagira era nga tubalamba bakolenga emirimo gyaibwe nga bwe bagwaine, beeyemerezeegho beene.

¹³ Aboluganda, mutakooghanga kukola bikalamu.

¹⁴ Ole bw'aloba okujiira ku kye tukobye mu mbaluwa eno, mumwekalirise bukalamu era mulobe kukolagana naye mu kintu kyonakyona, olwo aswale.

¹⁵ Mutamutwala ng'omuzigu aye mumulabule nga muganda waimwe.

Ebisembayo

¹⁶ Musengwa omugabi w'emiraala, mwene abaghenga emiraala buliidho era ni mu buli nsambo. Musengwa abenga n'imwe mwenamwena.

¹⁷ Ninze Paulo mpandiise okulamusa kuno n'omukono gwange gwene. Kano n'akamanhiso kange mu kiisi mbaluwa yange; ntyo bwe mpandiika.

¹⁸ Enkabi dha Musengwa waife Yesu Kurisito dhibe n'imwe mwenamwena.