2 Ab'e Korintho 9 - Baibuli Ekibono kya Katonda 2014

Okuyamba abaikiriza

¹ Tikineetaagisa kubaghandiikira ku bigema ku kuyamba abatuukirivu ab'omu Buyudaaya.

² Ndidhi nga muli beetegefu okuyamba era mbesiimiramu inho mu bantu ab'e Makedonia nga mbakoba nti: “Okuviira irala omwaka oguwoire aboluganda mu Akaia babairenga beetegefu okuyamba.” Obufubi bwaimwe buleeteire abantu kamaala boona okwenda okukola batyo.

³ Mperaano ndi kubatumira aboluganda bano, olwo okubeesimiramu kwaife kwe tubalimu kulobe kuba kwa bwereere. Aye nga bwenakoba nti mwidha kuba beetegefu, mube beetegefu.

⁴ Kuba bweghabaagho ku b'e Makedonia abaidha ninze, ni babaagaana nga timuli beetegefu, tuliswala inho olw'obwesige obungi bwe twabataamu, waire nga mwena muliswala.

⁵ Kale nakibona nga kikalamu okukoba aboluganda bano bansooke okwidha eyo, bategekere irala ekirabo kye mwasuubiza. Nze nje okwidha nga kirigho, kino kyoleke nga mugaba lwa kweyendera aye ti lwa nnaakola ntya.

⁶ Mwidhukire nti oyo alima ebitono era afuna bitono, ate oyo alima ebingi era afuna bingi.

⁷ Kale buli muntu ateekwa okukola nga bw'asazeegho mu mwoyo gwe, era nga ti lwa nnaakola ntya, oba lwa kukakibwa kuba Katonda ayenda oyo agaba nga musangaavu.

⁸ Era Katonda aghanga okubagha ebintu kamaala okusinga bye mwetaaga, olwo musobole buliidho okubanga ni bye mwetaaga, era mugabenga ebintu kamaala olwa buli mulimo omukalamu

⁹ nga bwe kyaghandiikibwa kiti: “Omuntu ow'omwoyo omugabi agabira abaavu; obugabi bwe bubaagho ebyanda n'ebyanda.”

¹⁰ Katonda oyo agha omulimi ensigo n'emere ey'okulya, anaabaghanga era yaayazanga ensigo dhaimwe, obugabi bwaimwe bweyongerengaku.

¹¹ Aidha kubakombaghaza mu byonabyona mweyongere okugaba, olwo abantu kamaala basiimenga Katonda olw'ebirabo byaimwe bye tubatwalira.

¹² Okugheereza kuno kwe mukola tikukanga ku kwiruukirira bwetaavu bwa batuukirivu kwonka, aye kuleetera n'abantu okweyanza einho Katonda.

¹³ Okugheereza kwaimwe kuno kukakasa abantu nga bwe muli. Olwo abantu kamaala baagha Katonda ekitiisa olw'okwikiriza n'okwatula Amawulire Amalungi aga Kurisito, era n'olw'obugabi bwaimwe eri abantu abo, era n'eri abandi boonaboona.

¹⁴ Kale banaabasabiranga n'okusiima kunene, olw'ekisa Katonda kye yabagha imwe.

¹⁵ Katonda yeekaza olw'ekirabo kye ekitaloodheka.