2 Ab'e Korintho 8 - Baibuli Ekibono kya Katonda 2014

Obugabi

¹ Aboluganda, ka tubakobere ekisa kya Katonda kye kikoze mu Bikunsu eby'Abaikiriza mu Kurisito eby'e Makedonia.

² Baabita mu kulebwa okunene nga badaazibwadaazibwa, aye baasigala nga basangaavu inho. Era baali baavu inho, aye baaba bagabi inho.

³ Mbakakasa nti baagaba nga bwe basobola, ate n'okusinga baasinzaagho nga ghazira kukakibwa.

⁴ Baatweghemba inho tubaghe akaghagaanhia babeeku ni kye bagha abatuukirivu ab'omu Buyudaaya.

⁵ Baakola kye twali titubasuubira kukola. Okusooka beeghaayo ye Musengwa era n'eri ife, olw'okwenda kwa Katonda.

⁶ Kale kye twava tukoba Tito nga bwe yainhama omulimo guno ogw'okugaba mu imwe, agumalirize.

⁷ Mperaano musinga abandi mu byonabyona mu kwikiriza, mu kwogera, mu kumanha, mu kufuba kwonakwona era ni mu kutugonza. Kale twenda mubasinge ni mu mulimo guno ogw'okugaba.

⁸ Kino tikikoba ng'ekiragiro, aye nhenze okubalaga obufubi obw'abandi, mukakase oba nga okugonza kwaimwe kutuufu.

⁹ Mwidhi ekisa kya Musengwa waife Yesu Kurisito, waire yali mukombe yafuuka omwavu olwaimwe, memale olwo obwavu bwe bubafuule abakombe.

¹⁰ Ku kino amagezi ge mbagha, n'okumaliriza ekyo kye mwatoolereza okukola omwaka oguwoire. Niimwe abaatoolereza. Ate nga ti kukola bukole, aye nga kye mukola mukyenda.

¹¹ Obumalirivu bwe mwali nabwo mu kwenda okukikola, bwe mube mube nabwo ni mu kukimaliriza, nga mukozesa ebyo bye muli nabyo buti.

¹² Kuba omuntu ayenda okugaba, asiimibwa Katonda olw'okugaba ekyo ky'ali nakyo se ti ekyo ky'azira.

¹³ Tikoba nti mu kubeera abandi imwe mwekaluubirize,

¹⁴ aye kye nkoba n'okubaagho okwazayaza. Nga mperaano bwe muli n'ebintu kamaala, mu bayambe mu bwetaavu bwaibwe. Mwena bwe muliba mu bwetaavu, era nga bali n'ebintu kamaala, balibayamba, olwo ghabeegho okwazayaza.

¹⁵ Oti n'ebyaghandiikibwa bwe bikoba biti: “Eyasoloza ebingi tiyasigazaagho, ate eyasoloza ebitono tiyadhulirira.”

Tito ni bagheereza baine

¹⁶ Katonda yeekaza, eyagha Tito omwoyo ogubalumirwa ng'ogwaife.

¹⁷ Kuba tiyakanga ku kuganha buganhe kye twamukoba, aye n'okuba yali mwetegefu, era aidha kwidha ye muli nga yeetuma mwene.

¹⁸ Aghalala n'oyo tuli kubatumira owoluganda amanhiibwa einho mu Bikunsu eby'Abaikiriza mu Kurisito, olw'okukobera abantu Amawulire Amalungi.

¹⁹ Ate ti n'ekyo kyonka, aye era Ebikunsu eby'Abaikiriza mu Kurisito bimulonze okubita n'ife ku mulimo ogw'okugaba, gwe tukola olw'okugheesa Musengwa ekitiisa n'okwoleka nga bwe twenda okuyamba.

²⁰ Tuli kwegendereza ghalobe kubaagho muntu atwogeraku bubi olw'okwona ebirabo bino ebigheebwayo n'omwoyo omugabi.

²¹ Ekiruubirirwa kyaife n'okukola ekituufu, ti mu maiso ga Katonda gonka aye ni mu maiso g'abantu.

²² Aghalala n'abo, tubatumiire owoluganda owundi ye tulebye emikuzi kamaala era ni tumubona nga mufubi mu bintu kamaala. Ate era mperaano yeeyongera okuba omufubi einho, kuba abeesiga inho.

²³ Tito oyo, ni mukozi munange bwetubagheereza, ate aboluganda bale, bakwenda ba Bikunsu eby'Abaikiriza mu Kurisito, olw'okugheesa Kurisito ekitiisa.

²⁴ Kale mu maiso g'Ebikunsu eby'Abaikiriza mu Kurisito byonabyona, mubalage okugonza okutuufu okukakasa nga tuli batuufu okukoba tuti twesiimye n'imwe.